ທ່ານ ສອນໄຊ ສີພັນດອນ ຮອງນາຍົກລັດຖະມົນຕີເຂົ້າຮ່ວມງານວາງສະແດງສິນຄ້າຈີນ-ອາຊີໃຕ້ ຄັ້ງທີ 5
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ເຂົ້າຮ່ວມງານວາງສະແດງສິນຄ້າຈີນ-ອາຊີໃຕ້ ຄັ້ງທີ 5 ແລະ ງານວາງສະແດງແລກປ່ຽນສິນຄ້າຂາເຂົ້າ-ຂາອອກ ຄັ້ງທີ 25 ໃນວັນທີ 13-16 ມິຖຸນານີ້ ທີ່ເມືອງຄຸນໝິງ, ແຂວງ ຢຸນໜານ, ສປ ຈີນ.
ງານວາງສະແດງດັ່ງກ່າວໄດ້ໄຂຂຶ້ນຢ່າງເປັນທາງການ ໃນວັນທີ 14 ມິຖຸນານີ້ ທີ່ສູນວາງສະແດງສາກົນ ເມືອງຄຸນໝິງ ເປັນກຽດໃນພິທີມີ ທ່ານ ຫູ ສຸ່ນຮົວ ຮອງນາຍົກລັດຖະມົນຕີ ແຫ່ງ ສປ ຈີນ ພ້ອມດ້ວຍບັນດາຄະນະຜູ້ແທນຈາກປະເທດຕ່າງໆ ແລະ ຜູ້ປະກອບການ ທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫລວງຫລາຍ.
ງານວາງສະແດງຄັ້ງນີ້, ເປັນເວທີສຳຄັນ ໃນການເສີມຂະຫຍາຍການຮ່ວມມື ທາງດ້ານເສດຖະກິດ-ການຄ້າ ແລະ ການແລກປ່ຽນວັດທະນະທຳ ແລະ ການພັດທະນາ ລະຫວ່າງ ຈີນ ກັບບັນດາປະເທດອາຊີໃຕ້-ອາຊີຕາເວັນອອກສຽງໃຕ້ ແລະ ບັນດາປະເທດ ໃນພາກພື້ນຕ່າງໆຂອງໂລກ ໂດຍຜ່ານການຍົກຖານະບົດບາດ ໃນການສົ່ງເສີມດ້ານການຄ້າ-ການບໍລິການ, ການລົງທຶນ, ການທ່ອງທ່ຽວ, ການແລກປ່ຽນ ທາງດ້ານວິທະຍາສາດ ແລະ ວັດທະນະທຳ. ສຳລັບ ສປປ ລາວ ໃນປີນີ້ ແມ່ນມີ 07 ແຂວງ ແລະ 21 ບໍລິສັດ ເຂົ້າຮ່ວມວາງສະແດງ ລວມ 84 ຫ້ອງວາງສະແດງ ເຊິ່ງລວມມີ ຜະລິດຕະພັນສິນຄ້າ ທີ່ເປັນເອກະລັກຂອງລາວຫຼາຍຊະນິດ ທີ່ຄາດວ່າຈະເປັນທີ່ປະທັບໃຈ ຂອງຜູ້ທີ່ມາເຂົ້າຮ່ວມງານວາງສະແດງຄັ້ງນີ້.
ໂອກາດນີ້, ທ່ານ ສອນໄຊ ສີພັນດອນ ໄດ້ກ່າວໃນງານວາງສະແດງຄັ້ງນີ້ວ່າ: ການກຳນົດເອົາຫົວຂໍ້ “ການເຊື່ອມໂຍງເຂົ້າສູ່ຂໍ້ລິເລີ່ມ ຫນຶ່ງແລວ ຫນຶ່ງເສັ້ນທາງ ເພື່ອການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ” ເຫັນວ່າເປັນຫົວຂໍ້ທີ່ມີຄວາມໝາຍສຳຄັນ ແລະ ສອດຄ່ອງກັບທ່າອ່ຽງລວມຂອງຍຸກສະໄຫມ ທີ່ບັນດາປະເທດໃນພາກພື້ນ ແລະ ສາກົນ ກຳລັງພ້ອມກັນສຸມໃສ່ການຮ່ວມມື ເພື່ອການພັດທະນາດ້ວຍບັນຍາກາດທີ່ຟົດຟື້ນ. ປັດຈຸບັນການຄ້າລະ ຫວ່າງ ສປປ ລາວ ແລະ ສປ ຈີນ ແມ່ນມີມູນຄ່າເພີ່ມຂຶ້ນທຸກປີ, ສະເພາະໃນປີ 2017 ມູນຄ່າການຄ້າສອງຝ່າຍແມ່ນບັນລຸໄດ້ 3 ຕື້ 2 ແສນ ໂດລາສະຫະລັດ, ສ່ວນການລົງທຶນຂອງ ສປ ຈີນ ຢູ່ລາວແມ່ນຢູ່ອັນດັບໜຶ່ງ, ເຊິ່ງໃນ 5 ປີ ຜ່ານມາມູນຄ່າການລົງທຶນຂອງ ສປ ຈີນ ຄິດເປັນມູນຄ່າ 6 ຕື້ 100 ລ້ານ ໂດລາສະຫະລັດໃນ 775 ໂຄງການ, ເຊິ່ງເຫັນວ່າລັດຖະບານລາວ ໄດ້ໃຫ້ຄວາມສຳຄັນໃນການເປີດກ້ວາງການຮ່ວມມື ແລະ ສົ່ງເສີມຂະແໜງການລົງທຶນຂອງຕ່າງປະເທດ ແລະ ອີກຂະແໜງການຫນຶ່ງທີ່ທັງສອງປະເທດມີທ່າແຮງ ແມ່ນການທ່ອງທ່ຽວ ຊຶ່ງເຫັນວ່າຕົວເລກ ຂອງການໄປມາຫາສູ່ລະຫວ່າງປະຊາຊົນສອງຊາດ ນັບມື້ເຕີບໃຫຍ່ຂຶ້ນ ຊຶ່ງໃນປີຜ່ານມາ, ຕົວເລກນັກທ່ອງທ່ຽວຈີນເຂົ້າໄປ ສປປ ລາວ ແມ່ນສູງເຖິງ 7 ແສນ 6 ໝື່ນ ເທື່ອຄົນ.
ພ້ອມນີ້, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະກັບຄູ່ຮ່ວມຕຳແໜ່ງ ທ່ານ ຫູ ສຸ່ນຮົວ, ຮອງນາຍົກລັດຖະມົນຕີ ແຫ່ງ ສປ ຈີນ ແລະ ໄດ້ພົບປະກັບເຈົ້າແຂວງຢຸນໜານ ທ່ານ ຢວນ ເຊິງຟ້າ, ໃນຕອນບ່າຍຂອງວັນທີ 14 ມິຖຸນາ 2018, ເຊິ່ງການພົບປະຄັ້ງນີ້ ຕ່າງຝ່າຍ ຕ່າງກໍ່ໄດ້ຕີລາຄາສູງ ຕໍ່ສາຍພົວພັນ ການເປັນຄູ່ຮ່ວມມືຍຸດທະສາດຮອບດ້ານລະຫວ່າງ ລາວ-ຈີນ ກໍ່ຄື ສປປ ລາວ ກັບແຂວງຢຸນນານ ທີ່ນັບມື້ນັບຂະຫຍາຍຕົວຂຶ້ນ ແລະ ຕ່າງກໍ່ມີບົດບາດຫຼາຍຂຶ້ນ ໃນພາກພື້ນ ແລະ ເວທີສາກົນ. ພ້ອມນັ້ນ, ທ່ານ ຮອງນາຍົກລັດຖະມົນຕີ ຍັງໄດ້ໄປຢ້ຽມຢາມບໍລິສັດຕ່າງໆ ເປັນຕົ້ນແມ່ນ ບໍລິສັດ ຢຸນໜານ ອາລູມິນຽມ, ບໍລິສັດຢຸນໜານກໍ່ສ້າງ ແລະ ບໍລິສັດຜະລິດຕະພັນສຸກຂະພັນເພື່ອແລກປ່ຽນບົດຮຽນທີ່ກ້າວໜ້າ ມາໜູນໃຊ້ຢູ່ ສປປ ລາວ.
