ລາວເຜີຍແຜ່ຜົນກອງປະຊຸມການພັດທະນາການສຶກສາກ່ອນໄວຮຽນ
ໃນວັນທີ 22 ມິຖຸນານີ້, ກົມການສຶກສາກ່ອນໄວຮຽນກະຊວງສຶກສາທິການ ແລະ ກິລາ ໄດ້ຈັດກອງປະຊຸມເຜີຍແຜ່ນະໂຍບາຍລະດັບພາກພື້ນອາຊີ-ປາຊີຟິກຄັ້ງທີ 3 ກ່ຽວກັບການສຶກສາ ແລະ ການດູແລເດັກກ່ອນໄວຮຽນ “ການນໍາເອົາ SDG 4.2 ຈາກນະໂຍບາຍສູ່ການປະຕິບັດ” ແລະ ກອງປະຊຸມພັດທະນາເດັກກ່ອນໄວຮຽນພາກພື້ນອາຊີ-ປາຊີຟິກປີ 2018 ເພື່ອຜັນຂະຫຍາຍໃຫ້ຜູ້ທີ່ຮັບຜິດຊອບວຽກງານການສຶກສາກ່ອນໄວຮຽນໃນລາວນໍາໄປຈັດຕັ້ງປະຕິບັດໃຫ້ໄດ້ຮັບຜົນສໍາເລັດ, ໂດຍການເປັນປະທານຂອງທ່ານ ມີທອງ ສຸວັນວິໄຊ ຫົວໜ້າກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ, ທ່ານນາງ ຈຸດີ ຟານເຊກາ ຜູ້ອໍານວຍການອົງການເລີນຂອງອົງການແພຣນສາກົນ ແລະ ຜູ້ຕາງໜ້າອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນໍາດ້ວຍ.
ໃນກອງປະຊຸມໄດ້ສະເໜີຍຸດທະສາດການຈັດຕັ້ງປະຕິບັດພາກພື້ນອາຊີ-ປາຊີຟິກ (ຖະແຫລງການພຸດທະຈະຍາ 2), ສະເໜີຜົນການເຂົ້າຮ່ວມກອງປະຊຸມ ແລະ ສົນທະນາແລກປ່ຽນຄວາມເຫັນກ່ຽວກັບຍຸດທະສາດຈັດຕັ້ງປະຕິບັດພາກພື້ນອາຊີ-ປາຊີຟິກ ທີ່ເອົາເຂົ້າໃນແຜນຈັດຕັ້ງປະຕິບັດສໍາລັບລາວໃນບົດລາຍງານພຽງພໍແລ້ວບໍ? ຈະຜັນຂະຫຍາຍແຜນການແນວໃດ, ພາກສ່ວນໃດທີ່ຈະມີທ່າແຮງຊ່ວຍສະໜັບສະໜູນ ແລະ ຜັນຂະຫຍາຍແຜນດັ່ງກ່າວໃຫ້ບັນລຸຜົນສໍາເລັດໃນຕໍ່ໜ້າ.
ກົມການສຶກສາກ່ອນໄວຮຽນໃຫ້ຮູ້ວ່າ: ກອງປະຊຸມນະໂຍບາຍລະດັບພາກພື້ນອາຊີ-ປາຊີຟິກຄັ້ງທີ 3 ກ່ຽວກັບການສຶກສາ ແລະ ການດູແລເດັກກ່ອນໄວຮຽນໄດ້ຈັດຂຶ້ນໃນວັນທີ 5-6 ມິຖຸນາ ແລະ ກອງປະຊຸມພັດທະນາເດັກກ່ອນໄວຮຽນພາກພື້ນອາຊີ-ປາຊີຟິກປີ 2018 ແມ່ນໄດ້ຈັດຂຶ້ນໃນວັນທີ 5-7 ມິຖຸນາຜ່ານມານີ້ທີ່ນະຄອນຫລວງຄັດມັນດູປະເທດເນປານ, ເຊິ່ງມີຜູ້ຄະນະຜູ້ແທນຈາກ 28 ປະເທດເຂົ້າຮ່ວມ 700 ກວ່າທ່ານທີ່ມາຈາກພາກພື້ນປາຊີຟິກ, ອາຊີກາງ, ອາຊີໃຕ້, ອາຊີຕາເວັນອອກ-ຕາເວັນຕົກ ແລະ ອາຊີຕາເວັນອອກສ່ຽງໃຕ້ ເພື່ອໃຫ້ໂອກາດແກ່ຜູ້ສ້າງນະໂຍບາຍ ແລະ ຜູ້ປະຕິບັດເອົາໃຈໃສ່ວຽກພັດທະນາການສຶກສາກ່ອນໄວຮຽນ ທີ່ເປັນວາລະຂອງສາກົນນໍາໄປປັບໃຊ້ໃນປະເທດຂອງຕົນ, ສ້າງຄວາມເຂັ້ມແຂງເພື່ອສະໜັບສະໜູນການພັດທະນາເດັກກ່ອນໄວຮຽນແບບເລັ່ງດ່ວນ ແລະ ຕໍ່ເນື່ອງ, ແລກປ່ຽນຄວາມຮູ້, ວິທີການ ແລະ ການປະຕິບັດນະໂຍບາຍ ແລະ ໂຄງການພັດທະນາເດັກກ່ອນໄວຮຽນ, ໂດຍສະເພາະການຮ່ວມກັບຫລາຍພາກສ່ວນ ແລະ ສາມາດຈັດຕັ້ງປະຕິບັດເພື່ອຂະຫຍາຍໃນວົງກວ້າງ, ສ້າງຄວາມເຂັ້ມແຂງການມີສ່ວນຮ່ວມພັດທະນາເດັກກ່ອນໄວຮຽນລະຫວ່າງຜູ້ມີສ່ວນຮ່ວມທີ່ມີຢູ່ ແລະ ຜູ້ທີ່ມີທ່າແຮງຊ່ວຍໃນດ້ານນີ້.
