ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ

ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ - Vice president of vietnam - ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ
ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ - Untitled design - ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ

ໂດຍຕອບສະໜອງຕາມການເຊື້ອເຊີນຂອງສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ສະຫາຍນາງ ດັ້ງ ຖິ ຫງ໋ອກ ທິ້ງ ກຳມະການຄະນະບໍລິຫານງານສູນກາງພັກກອມມູນິດຫວຽດນາມ, ຮອງປະທານປະເທດແຫ່ງ ສສ.ຫວຽດນາມ ພ້ອມຄະນະຜູ້ແທນຂັ້ນສູງ, ໄດ້ມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 19-22 ມິຖຸນານີ້, ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດລາວ-ຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ ແລະ ການຢ້ຽມຢາມດັ່ງກ່າວກໍໄດ້ຮັບຜົນສຳເລັດຢ່າງຈົບງາມ.

ໃນການຢ້ຽມຢາມ ສປປ ລາວ ຄັ້ງນີ້, ສະຫາຍຮອງປະທານປະເທດຫວຽດນາມ ແລະ ຄະນະ ກໍໄດ້ຮັບການຕ້ອນຮັບຢ່າງສົມກຽດ, ໂດຍພິທີຈັດຂຶ້ນໃນວັນທີ 19 ມິຖຸນານີ້, ທີ່ທໍານຽບປະທານປະເທດ ໂດຍສະຫາຍ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ ແລະ ໄດ້ມີການພົບປະສອງຝ່າຍ, ຊຶ່ງຝ່າຍລາວນໍາໂດຍສະຫາຍຮອງປະທານປະເທດ ພັນຄຳ ວິພາວັນ.

ໃນການພົບປະຄັ້ງນີ້, ສອງ​ຝ່າຍໄດ້ສະແດງຄວາມເພິ່ງ​ພໍ​ໃຈ​ເປັນ​ຢ່າງ​ຍິ່ງທີ່​ເຫັນວ່າ​ການ​ພົວ​ພັນ​ມິ​ດ​ຕະ​ພາບອັນ​ຍິ່ງໃຫຍ່, ຄວາມ​ສາ​ມັກ​ຄີ​ພິ​ເສດ ແລະ ການຮ່ວມ​ມື​​ຮອບ​ດ້ານລະ​ຫວ່າງລາວ-ຫວຽດ​ນາມ ສືບ​ຕໍ່​ໄດ້​ຮັບ​ການຜັນຂະ​ຫຍາຍຢ່າງ​ບໍ່​ຢຸດ​ຢັ້ງໄປ​ສູ່​ລວງ​ເລິກ ແລະ ລວງກວ້າງໃນ​ທຸກ​ຂົງ​ເຂດວຽກງານ ບໍ່ວ່າຈະເປັນທາງດ້ານການ​ເມືອງ, ການປ້ອງ​ກັນ​ຊາດ, ປ້ອງ​ກັນ​ຄວາ​ມ​ສະ​ຫງົບ, ເສດ​ຖະ​ກິດ, ວັດ​ທະ​ນະ​ທໍາ-ສັງ​ຄົມ, ການ​ຕ່າງ​ປະ​ເທດ ແລະ ດ້ານອື່ນໆ. ສອງຝ່າຍໄດ້ຕີລາຄາສູງຕໍ່ການແລກປ່ຽນການຢ້ຽມຢາມຂອງຄະນະຜູ້ແທນຂອງສອງປະເທດໃນທຸກລະດັບຢ່າງເປັນປົກກະຕິ ເພື່ອຊຸກຍູ້ສົ່ງເສີມສາຍພົວພັນຮ່ວມມືສອງຝ່າຍ, ຮ່ວມກັນປຶກສາຫາລືແກ້ໄຂບັນຫາທີ່ຍັງຄ້າງຄາຢ່າງທັນການ ເຮັດໃຫ້ຫລາຍໂຄງການຮ່ວມມື-ການລົງທຶນສາມາດຈັດຕັ້ງປະຕິບັດໄດ້. ພິເສດໃນປີ 2017 ຜ່ານມາ, ສອງປະເທດໄດ້ຮ່ວມກັນຈັດກິດຈະກຳເຄື່ອນໄຫວສະເຫລີມສະຫລອງປີສາມັກຄີມິດຕະພາບຢ່າງເປັນຂະບວນຟົດຟື້ນທີ່ສຸດນັບແຕ່ສູນກາງລົງຮອດທ້ອງຖິ່ນ, ເຊິ່ງເຫັນໄດ້ວ່າທຸກກິດຈະກໍາເຄື່ອນໄຫວລ້ວນແຕ່ໄດ້ສ່ອງແສງໃຫ້ເຫັນເຖິງສາຍພົວພັນຮ່ວມມືອັນຍິ່ງໃຫຍ່, ສະເໝີຕົ້ນສະເໝີປາຍ, ບໍລິສຸດ ແລະ ໂປ່ງໃສ​ ເປັນສາຍພົວພັນທີ່ບໍ່ສາມາດຕັດແຍກອອກຈາກກັນໄດ້. ພ້ອມນີ້, ສອງຝ່າຍ ກໍເຫັນດີສືບຕໍ່ເອົາໃຈໃສ່ ແລະ ຫາວິທີອັນເໝາະສົມໃນການສຶກສາອົບຮົມມູນເຊື້ອຄວາມສາມັກຄີພິເສດ ລາວ-ຫວຽດນາມໃນຖັນແຖວພະນັກງານ ແລະ ປະຊາຊົນສອງປະເທດ ເປັນຕົ້ນແມ່ນຊາວໜຸ່ມ-ເຍົາວະຊົນຂອງສອງປະເທດ, ສືບຕໍ່ເພີ່ມທະວີການຮ່ວມມືຢ່າງແໜ້ນແຟ້ນກ່ຽວກັບວຽກງານຊາຍແດນລະຫວ່າງສອງປະເທດໃນການຮັກສາຄວາມສະຫງົບ, ສະກັດກັ້ນການຕ້ານອາດສະຍາກໍາຂ້າມຊາດ, ການຄ້າມະນຸດ, ຂົນສົ່ງຢາເສບຕິດຂ້າມແດນ, ຄ້າຂາຍເຖື່ອນ, ການລັກລອບຂຸດຄົ້ນຊັບພະຍາກອນທຳມະຊາດຢູ່ບໍລິເວນຊາຍແດນ, ບໍ່ໃຫ້ຄົນບໍ່ດີສວຍໃຊ້ມາມ້າງເພຄວາມບໍ່ສະຫງົບສຸກຂອງສອງຊາດ ເພື່ອໃຫ້ຊາຍແດນສອງປະເທດ ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ມີການພັດທະນາຢ່າງຮອບດ້ານ ແລະ ຍືນຍົງ, ເອົາໃຈໃສ່ຮ່ວມກັນແກ້ໄຂບັນຫາການຍົກຍ້າຍຕັ້ງພູມລຳເນົາຕາມລຳພັງໃຈ ແລະ ການແຕ່ງດອງແບບ​ບໍ່​ຖືກ​ຕ້ອງ​ຕາມ​ຮີດຄອງປະເພນີ ແລະ ກົດໝາຍຂອງ ສປປ ລາວ ຢູ່​ຕາມ​ບໍ​ລິ​ເວນ​ຊາຍ​ແດນ​ຂອງ​ສອງ​ປະ​ເທດ​ຢ່າງ​ຕັ້ງ​ໜ້າ ລວມທັງການຄຸ້ມຄອງແຮງງານເລື່ອນລອຍ ໃຫ້ເປັນໄປຕາມ​ຂໍ້​ຕົກ​ລົງ​ທີ່​ໄດ້​ຮ່ວມ​ລົງ​ນາມ​ນໍາ​ກັນ, ເອົາ​ໃຈ​ໃສ່​ຕິດ​ຕາມກວດ​ກາ, ຊຸກ​ຍູ້​ບັນ​ດາ​ວິ​ສາ​ຫະ​ກິດ​ຂອງ​ຫວຽດ​ນາມ​ທີ່​ລົງ​ທຶນ​ຢູ່​ລາວ, ຈັດ​ຕັ້ງ​ຜັນ​ຂະ​ຫ​ຍາຍ​ບັນ​ດາ​ໂຄງ​ການ​ທີ່​ໄດ້​ຮັບ​ອະ​ນຸ​ຍາດ​ລົງ​ທຶນ​ແລ້ວ​ນັ້ນ​ໃຫ້ມີປະສິດທິພາບ, ປະສິດທິຜົນ, ​ທ່ວງ​ທັນ​ຕາມ​ສັນ​ຍາ​, ຖືກ​ຕ້ອງ​ຕາມ​ລະ​ບຽບ​ກົດ​ໝາຍ​ຂອງສ​ປ​ປ ລາວ ແລະ ຫລີກລ້ຽງການຟູມເຟືອຍ ແລະ ສືບຕໍ່ເອົາ​ໃຈ​ໃສ່ຊຸກຍູ້​ໃຫ້​ມູນ​ຄ່າ​ການ​ຄ້າ​ລະ​ຫວ່າງ​ສອງ​ປະ​ເທດໃຫ້ບັນລຸໄດ້ຕາມເປົ້າໝາຍທີ່ສອງລັດຖະບານໄດ້ຕົກລົງກັນ. ນອກນີ້, ສອງຝ່າຍຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງຕົນໃຫ້ກັນຊາບ, ພ້ອມທັງແລກປ່ຽນຄຳຄິດເຫັນຕໍ່ສະພາບການອັນພົ້ນເດັ່ນຂອງສາກົນ ​ແລະ ພາກ​ພື້ນທີ່​ສອງ​ຝ່າຍ​ມີ​ຄວາມ​ສົນ​ໃຈຮ່ວມກັນ.

ໃນໂອກາດການຢ້ຽມຢາມ, ສະຫາຍນາງ ດັ້ງ ຖິ ຫງ໋ອກ ທິ້ງ ແລະ ຄະນະ ກໍໄດ້ເຂົ້າຢ້ຽມຂໍ່ານັບສະຫາຍ ບຸນຍັງ ວໍລະຈິດ ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ, ໄດ້ທຳການພົບປະຢ້ຽມຢາມສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແລະ ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ. ໃນໂອກາດດັ່ງກ່າວ, ບັນດາການນຳຂັ້ນສູງຂອງລາວຕ່າງກໍສະແດງຄວາມປິຕິຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ໃນຄັ້ງນີ້, ທີ່ໄດ້ນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມຂອງພັກ-ລັດ ແລະ ປະຊາຊົນຫວຽດນາມອ້າຍນ້ອງມາຍັງພັກ-ລັດ ແລະ ປະຊາຊົນລາວ, ພ້ອມທັງເປັນການປະກອບສ່ວນອັນສຳຄັນເຂົ້າໃນການເພີ່ມທະວີ ແລະ ເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມອ້າຍນ້ອງ ທີ່ມີມາແຕ່ດົນນານແລ້ວນັ້ນໃຫ້ມີຄວາມແຫນ້ນແຟ້ນຈະເລີນງອກງາມ ແລະ ເກີດດອກອອກຜົນຍິ່ງໆຂຶ້ນ. ພ້ອມນີ້, ການນຳຂອງລາວກໍໄດ້ສະແດງຄວາມຊົນເຊີຍຕໍ່ບັນດາຜົນສຳເລັດອັນສຳຄັນ, ຮອບດ້ານທີ່ປະຊາຊົນຫວຽດນາມອ້າຍນ້ອງ ຍາດມາໄດ້ພາຍໃຕ້ການນຳພາອັນຖືກຕ້ອງຂອງພັກກອມມູນິດຫວຽດນາມໃນໄລຍະຜ່ານມາ, ພ້ອມທັງສະແດງຄວາມຂອບໃຈຢ່າງສູງຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອແບບພິເສດ ແກ່ ສປປ ລາວ ໃນດ້ານຕ່າງໆເຊັ່ນ: ການຊ່ວຍໃຫ້ ສປປ ລາວ ມີຊາຍຝັ່ງທະເລໂດຍການໃຫ້ ສປປ ລາວ ສຳປະທານພັດທະນາທ່າເຮືອຫວຸ້ງອ້າງທ່າທຽບເຮືອ 1, 2 ແລະ 3, ການຊ່ວຍເຫລືອໂຄງການກໍ່ສ້າງຫໍສະພາແຫ່ງຊາດຫລັງໃໝ່, ໂຄງການປຸກສ້າງໂຮງຮຽນແຂວງບໍລິຄຳໄຊ ທີ່ເປັນຂອງຂວັນຈາກສະຫາຍເລຂາທິການໃຫຍ່ ຫງວຽນ ຝູ ຈ໋ອງ, ໂຄງການປຸກສ້າງໂຮງຮຽນແຂວງເຊກອງທີ່ເປັນຂອງຂວັນຈາກປະທານປະເທດ ເຈີນ ດ໋າຍ ກວາງ, ການໃຫ້ທຶນຊ່ວຍເຫລືອດ້ານການສຶກສາ ແລະ ການຊ່ວຍເຫລືອດ້ານອື່ນໆ, ຊຶ່ງເປັນການປະກອບສ່ວນອັນໃຫຍ່ຫລວງໃຫ້ແກ່ການຫລດຜ່ອນຄວາມທຸກຍາກ ແລະ ການພັດທະນາ ສປປ ລາວ.

ໃນຂະນະດຽວກັນ, ສະຫາຍນາງ ດັ້ງ ຖິ ຫງ໋ອກ ທິ້ງ ກໍໄດ້ສະແດງຄວາມຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຕ້ອນຮັບອັນອົບອຸ່ນໃນການຢ້ຽມຢາມ ສປປ ລາວ ໃນຄັ້ງນີ້ ແລະ ສະແດງຄວາມຂອບໃຈຕໍ່ການສະໜັບສະໜູນ, ຊ່ວຍເຫລືອອັນໃຫຍ່ຫລວງ ແລະ ລໍ້ຄ່າໃຫ້ແກ່ພັກ-ລັດ ແລະ ປະຊາຊົນຫວຽດນາມໃນເມື່ອກ່ອນ ກໍຄືປັດຈຸບັນ, ພ້ອມທັງສະແດງຄວາມໝາຍໝັ້ນວ່າຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດຫວຽດນາມ-ລາວ ໃຫ້ນັບມື້ນັບໄດ້ຮັບການເສີມຂະຫຍາຍທັງລວງກວ້າງ ແລະ ລວງເລິກ ຢ່າງມີປະສິດທິຜົນ, ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດຫວຽດນາມ-ລາວ.

ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ - Wave100S AD to Website 2020 0 - ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ

ໃນເວລາເຄື່ອນໄຫວຢ້ຽມຢາມຢູ່ນະຄອນຫຼວງວຽງຈັນ, ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ຍັງໄດ້ຕ້ອນຮັບການເຂົ້າຢ້ຽມຂຳ່ນັບຂອງ ສະຫາຍ ວິໄລວົງ ບຸດດາຄຳ, ປະທານກຳມາທິການແຜນການ, ການເງິນ ແລະ ການກວດສອບ, ສະພາແຫ່ງຊາດ, ປະທານສະມາຄົມມິດຕະພາບ ລາວ-ຫວຽດນາມ; ໄດ້ຢ້ຽມຢາມ ສູນກາງສະຫະພັນແມ່ຍິງລາວ ແລະ ພົບປະກັບ ສະຫາຍ ນາງ ອິນລາວັນ ແກ້ວບຸນພັນ, ປະທານສູນກາງສະຫະພັນແມ່ຍິງລາວ; ຢ້ຽມຢາມ ໂຮງຮຽນພອນສະຫວັນ, ໂດຍໄດ້ຮັບການຕ້ອນຮັບຈາກ ສະຫາຍ ສົມສີ ຍໍພັນໄຊ, ວ່າການອະທິການບໍດີ ມະຫາວິທະຍາໄລແຫ່ງຊາດ; ແລະ ສະຫາຍ ນາງ ດັ້ງ ຖິ ຫງ໋ອກ ທິ້ງ ແລະ ຄະນະ ຍັງໄດ້ໄປວາງພວງມາລາ ຢູ່ອານຸສາວະລີນັກຮົບນິລະນາມ ແລະ ຢ້ຽມຊົມພະທາດຫຼວງວຽງຈັນ.

ໃນລະຫວ່າງວັນທີ 21-22 ມິຖຸນາ 2018, ສະຫາຍ ຮອງປະທານປະເທດຫວຽດນາມ ແລະ ຄະນະ ກໍໄດ້ສືບຕໍ່ເຄື່ອນໄຫວຢ້ຽມຢາມນະຄອນຫຼວງພະບາງ ແລະ ໄດ້ຕ້ອນຮັບການເຂົ້າຢ້ຽມຂຳ່ນັບຂອງ ສະຫາຍ ຄຳຂັນ ຈັນທະວີສຸກ, ເຈົ້າແຂວງໆຫຼວງພະບາງ, ໂດຍໄດ້ຈັດພິທີບາສີສູ່ຂວັນ ແລະ ງານລ້ຽງອາຫານຄຳ່ ໃຫ້ ສະຫາຍຮອງປະທານປະເທດຫວຽດນາມ ແລະ ຄະນະ ຢ່າງສົມກຽດ. ນອກຈາກນັ້ນ, ຄະນະຍັງໄດ້ຢ້ຽມຊົມສະຖານທີ່ສຳຄັນຕ່າງໆ ທາງວັດທະນະທຳ ແລະ ປະຫວັດສາດ ຂອງແຂວງຫຼວງພະບາງ ເຊັ່ນ: ຢ້ຽມຊົມຫໍພິພິຕະພັນແຫ່ງຊາດ ແຂວງຫຼວງພະບາງ, ວັດຊຽງທອງ ແລະ ສູນຫັດຖະກຳແຜ່ນແພ ບ້ານສ້າງຄ້ອງ.

ໃນຕອນແລງວັນທີ 22 ມິຖຸນາ 2018, ສະຫາຍ ນາງ ດັ້ງ ຖິ ຫງ໋ອກ ທິ້ງ, ຮອງປະທານປະເທດ ແຫ່ງ ສສ. ຫວຽດນາມ ແລະ ຄະນະ ກໍໄດ້ເດີນທາງກັບຄືນປະເທດ ດ້ວຍຄວາມສະຫວັດດີພາບທຸກປະການ.

ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ - WhatsApp Image 2020 05 27 at 5 - ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ
ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ - WhatsApp Image 2020 05 27 at 5 - ຜົນສຳເລັດການຢ້ຽມຢາມທາງການ ສປປ ລາວ ຂອງຮອງປະທານປະເທດແຫ່ງ ສສ. ຫວຽດນາມ
error: Alert: ເນື້ອຫາຂ່າວມີລິຂະສິດ !!