ອາເຈນຕີນາ ເຂົ້າຮອບວຸດວິດ ບານໂລກ 2018 ທີ່ຣັດເຊຍ

ວັນ​ທີ 26 ມິຖຸນາ ບານໂລກ 2018 ນັດສຸດທ້າຍຂອງກຸ່ມດີ ອາເຈນຕີນາ ແຊ້ມໂລກ 2 ສະໄຫມ, ຮອງແຊ້ມຄັ້ງຜ່ານມາ 2014 ທີ່ບຣາຊິລ ຜ່ານມໍລະສຸມເຂົ້າສູ່ຮອບ 16 ທີມແບບຫວຸດຫວິດ ຫລັງເອົາຊະນະ ໄນຈີເຣຍ 2-1 ໃນທ້າຍເກມ.

ອາ​ເຈນ​ຕີ​ນາ ຂຶ້ນນໍາ​ກ່ອນຈາກຈັງຫວະ ເອແວ ບາເນກ້າ ວາງບານຍາວໃຫ້ ລີໂອເນວ ເມສຊີ ພັກບານດ້ວຍເຂົ່າ ແຕ່ງບານຫນຶ່ງຈັງຫວະດ້ວຍຊ້າຍ ແລະ ຍິງດ້ວຍຂວາຢ່າງສວຍງາມ ນາທີ 14, ມາເຄິ່ງຫລັງ ​ໄນ​ຈີ​ເຣຍ ມາໄດ້ຈຸດໂທດຈາກຈັງຫວະ ຈາເວຍ ມາສເຊຣາໂນ້ ໄປດຶງ ບາໂລກັນ ລົ້ມໃນເຂດໂທດ ແລະ ເປັນ ວິກເຕີ ໂມເຊສ ກອງກາງຈາກເຊລຊີ ຮັບຫນ້າທີ່ສັງຫານບໍ່ຜິດພາດ ນາທີ 51. ເວລາທີ່ເຫລືອ ອາ​ເຈນ​ຕີ​ນາ ບຸກຫນັກ ແລະ ມາປະສົບຜົນສຳເລັດໃນນາທີ 86 ຈາກຈັງຫວະ ກາບ້ຽວ ເມີຊາໂດ້ ວາງບານຈາກຟາກຂວາໃຫ້ ມາຄັອສ ໂຣໂຮ້ ກອງຫລັງຈາກແມນຢູ ຍິງດ້ວຍຂວາແບບບໍ່ຈັບຢ່າງສວຍງາມ ຈົບເກມ ອາ​ເຈນ​ຕີ​ນາ ເອົາຊະນະ ​ໄນ​ຈີ​ເຣຍ 2-1 ເຂົ້າຮອບ 16 ທີມແບບຫວຸດຫວິດ ໃນຖານະອັນດັບທີສອງຂອງກຸ່ມ ມີ 4 ຄະແນນຈາກ 3 ນັດ, ​ໄນ​ຈີ​ເຣຍ ມີ 3 ຄະແນນ ຕົກຮອບ.

ຜົນອີກຫນຶ່ງຄູ່ໃນກຸ່ມດຽວກັນ ໂຄຣເອເຊຍ ເອົາຊະນະ ນ້ອງໃຫມ່ ໄອສແລນ 2-1 ໂຄຣ​ເອ​ເຊຍ ເປັນທີ 1 ຂອງກຸ່ມ ມີ 9 ຄະແນນ, ​ໄອສ​ແລນ ມີ 1 ຄະແນນຕົກຮອບ.