ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

- south korea - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ
- Untitled design - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ສາຍຕາ​ຂອງ ອາ​ບູ ຈາ​ຟາ ສະ​ແດງ​ຄວາມ​ພູມ​ໃຈ​ຕອນ​ທີ່​ລາວ​ເລົ່າ​ໃຫ້​ຟັງ​ວ່າ​ທຸກ​ມື້ນີ້​ເຮັດ​ວຽກ​ຫຍັງ​. ຈາ​ຟາ ​ເຄີຍ​ເປັນ​ພະນັກງານ​ຮັກສາ​ຄວາມ​ປອດ​ໄພ​ທີ່​ຮ້ານ​ບັນ​ເທີ​ງ​ແຫ່ງ​ໜຶ່ງ​ກ່ອນ​ຈະ​ໄດ້​ຮູ້ຈັກ​ກັບ​ກຸ່ມ​ນັກ​ຄ້າຂາຍ​ອະ​ໄວ​ຍະ​ວະ​ມະນຸດ ​ໂດຍ ຈາ​ຟາ ຮັບ​ໜ້າ​ທີ່​ຊອກ​ຫາ​ຄົນ​ທີ່ຍອມ​ເສຍ​ອະ​ໄວ​ຍະ​ວະ​ເພື່ອ​ແລກ​ກັບ​ເງິນ ​ແລະ ກຸ່ມ​ຜູ້​ລີ້​ໄພ​ຊາວ​ຊີຣີທີ່​ເດີນທາງ​ເຂົ້າມາ​ຢູ່​ລີ​ບັງ​ເປັນ​ໂອກາດ​ຫາ​ເງິນ​ຂອງ ຈາ​ຟາ.

“​ແມ່ນ ຂ້ອຍ​ຫາ​ຜົນ​ປະ​ໂຫຍ​ດຈາກ​ຄົນ​ເຫລົ່າ​ນີ້” ຈາ​ຟາ ຍອມຮັບ, ​ແຕ່​ລາວ​ຄິດ​ວ່າ​ຜູ້​ລີ້​ໄພ​ຊາວ​ຊີຣີອາດ​ບໍ່​ມີ​ຊີວິດ​ລອດ ຖ້າ​ບໍ່​ໜີມາລີ​ບັງ. ປະສົບ​ການ​ອັນ​ໂຫດຮ້າຍ​ຢູ່​ບ້ານ​ເກີດ​ຍັງ​ທຽບ​ບໍ່​ໄດ້​ກັບ​ການ​ເສຍ​ອະ​ໄວ​ຍະ​ວະ​ໄປ​ບາງ​ສ່ວນ.

- 95815201 23b0d84e 7a08 4b67 91b1 2e5cc20a3910 - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ບ່ອນ​ເຮັດ​ວຽກ​ຂອງ ຈາ​ຟາ ​ເປັນ​ພຽງ​ຮ້ານ​ກາ​ເຟນ້ອຍໆຢູ່​ອາຄານ​ເກົ່າໆ​ໃນ​ເຂດ​ແອ​ອັດ​ທາງ​ໃຕ້​ຂອງ​ນະຄອນຫລວງ​ເບຣຸດ, ທາງ​ຫລັງ​ຂອງ​ຮ້ານ​ມີ​ຜ້າ​ກັ້ນຫ້ອງ​ແບ່ງ​ພື້ນທີ່​​ເປັນ​ອີກ​ຫ້ອງ​ໜຶ່ງ ​ເຊິ່ງ ຈາ​ຟາ ​​ໃຊ້​ເປັນ​ສະຖານ​ທີ່​ຈັດການ​ເລື່ອງ​ຊື້ຂາຍ​ອະ​ໄວ​ຍະ​ວະ​ຊາວ​ຊີຣີປະມານ 30 ຄົນ ​ໃນ​ໄລຍະ 3 ປີຜ່ານມາ.

“ອະ​ໄວ​ຍະ​ວະ​ສ່ວນ​ຫລາຍ​ທີ່​ຄົນ​ຕ້ອງການ​ຄື​​ໝາກ​ໄຂ່ຫລັງ, ​ແຕ່​ຂ້ອຍ​ກໍ​ຫາ​ອະ​ໄວ​ຍະ​ວະ​ອື່ນໆ​ໃຫ້​ໄດ້​ນຳ. ມີ​ເທື່ອ​ໜຶ່ງ​ລູກ​ຄ້າ​ຢາກ​ໄດ້​ໜ່ວຍ​ຕາ​ເບື້ອງໜຶ່ງ ​ເຊິ່ງຂ້ອຍ​ກໍ​ຫາ​ໃຫ້​ໄດ້”.

“ຂ້ອຍ​ຖ່າຍຮູບ​ໜ່ວຍ​ຕາ​ທີ່​ມີ​ຜູ້​ຕ້ອງການ​ຂາຍ ​ແລ້ວ​ສົ່ງ​ໃຫ້​ລູກ​ຄ້າ​ເບິ່ງ​ທາງ​ວ​ອດ​ແອັບ ຖ້າ​ຢືນຢັນ​ວ່າ​ຈະ​ເອົາ ຂ້ອຍ​ກໍ​ຈັດ​ໃຫ້”.

- image - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ຢູ່​ຖະໜົນ​ເສັ້ນ​ແຄບໆ ​ເຊິ່ງ ຈາ​ຟາ ​ໃຊ້​ເປັນ​ສະຖານ​ທີ່​​ເຮັດ​ທຸລະ​ກິດ ມີ​ຜູ້​ລີ້​ໄພ​ຢູ່​ກັນ​ໜາ​ແໜ້ນ ​ໂດຍ 1 ​ໃນ 4 ຂອງ​ຜູ້​ລີ້​ໄພ​ຢູ່​ລີ​ບັງ​ເດີນທາງ​ຂ້າມ​ຊາຍ​ແດນ​ມາ​ຈາກ​ຊີຣີ. ພາຍ​ໃຕ້​ກົດໝາຍ​ຂອງ​ລີ​ບັງ ຄົນ​ເຫລົ່າ​ນີ້​ສ່ວນ​ຫລາຍ​ບໍ່​ໄດ້​ຮັບ​ອະນຸຍາດ​ໃຫ້​ເຮັດ​ວຽກ, ຫລາຍ​ຄອບຄົວ​ບໍ່​ມີ​ເງິນ​ພຽງພໍ​ຈະ​ດຳລົງ​ຊີວິດ. ຜູ້​ທີ່​ຕ້ອງ​ຜະ​ເຊີນ​ຊະ​ຕາ​ກຳ​ໂຫດຮ້າຍ​ຄື​ຊາວ​ປາ​ແລັສຕິນທີ່​ຖື​ວ່າ​ເປ​ັນຜູ້​ລີ້​ໄພ​ຢູ່​ແລ້ວ​ໃນ​ຊີຣີ. ຄົນ​ເຫລົ່າ​ນີ້​ບໍ່​ອາດ​ລົງທະບຽນ​ເປັນ​ຜູ້​ລີ້​ໄພ​ກັບ​ສຳນັກງານ​ຜູ້​ລີ້​ໄພ​ຂອງ​ສະຫະ​ປະຊາ​ຊາດ​ໄດ້​ອີກ​ເມື່ອ​ເດີນທາງ​ມາ​ເຖິງ​ລີ​ບັງ.

“ຄົນ​ເຫລົ່າ​ນີ້​ຈະ​ເຮັດ​ຫຍັງ​ໄດ້” ຈາ​ຟາ ຕັ້ງຄຳ​ຖາມ. “ພວກ​ເຂົາ​ບໍ່​ມີ​ທາງ​ອອກ​ຈົນ​ເຖິງ​ຂັ້ນຕ້ອງ​ຂາຍ​ອະ​ໄວ​ຍະ​ວະ​ແລກ​ເງິນ”.

ມີ​ຜູ້​ລີ້​ໄພ​ຈຳນວນ​ບໍ່​ໜ້ອຍ ​ໂດຍ​ສະ​ເພາະ​ເດັກນ້ອຍ​ທີ່​ນັ່ງ​ຂໍທານ​ຕາມ​ຖະໜົນ, ບາງ​ຄົນ​ກໍ​ຮັບຈ້າງ​ຂັດ​ເກີບ, ຂາຍ​​​ເຂົ້າໜົມຢູ່ຕາມ​​ເສັ້ນທາງ ຫລື ຖືກ​ໃຊ້​ເປັນ​ແຮງ​ງານ​ເດັກ ​ແລະ ຫລາຍ​ຄົນ​ຕ້ອງ​ຍອມ​ໄປ​ເປັນ​ໂສ​ເພນີ. ຂະນະ​ທີ່​ການ​ຂາຍ​ອະ​ໄວ​ຍະ​ວະ​ເປັນ​ຫົນທາງ​ຫາ​ເງິນ​ໄດ້​ໄວ​ກວ່າ ​ເມື່ອ​ມີ​ຜູ້​ຕ້ອງການ​ຂາຍ​ອະ​ໄວ​ຍະ​ວະ ອາ​ບູ ຈາ​ຟາ ຈະ​ຂັບ​ລົດ​ພາ​ໄປ​ສະຖານ​ທີ່​ນັດ​ໝາຍ ​ໂດຍ​ມີ​ຜ້າ​ປິດຕາ​ໄວ້​ຕະຫລອດ​ການ​ເດີນທາງ. ບາງ​ເທື່ອ​ການຜ່າຕັດ​ມີ​ຂຶ້ນຢູ່​ເຮືອນ​ເຊົ່າ ​ເຊິ່ງດັດ​ແປງ​ມາ​ເປັນຄລີ​ນິກຊົ່ວຄາວ, ​ເມື່ອ​ຜ່າຕັດ​ສຳ​ເລັດ ຈາ​ຟາ ຈະ​ຂັບ​ລົດ​ພາ​ກັບ ​ແລະ ຊ່ວຍ​ເບິ່ງ​ແຍງ​ປະມານ​ໜຶ່ງ​ອາທິດ ຈົນ​ກວ່າ​ຈະ​ຕັດ​ດ້າຍ​ອອກ. ​ແຕ່​ຈາກ​ນັ້ນ “ຂ້ອຍ​ກໍ​ບໍ່​ສົນ​ໃຈ​ແລ້ວ​ວ່າ​ຈະ​ເກີດ​ຫຍັງ​ຂຶ້ນ ຈະ​ຕາຍ ຫລື ບໍ່, ຂ້ອຍ​ໄດ້​ໃນ​ສິ່ງ​ທີ່​ຂ້ອຍ​ຕ້ອງການ. ຄົນ​ທີ່​ຂາຍ​ອະ​ໄວ​ຍະ​ວະ​ໄດ້​ເງິນ​ໄປ​ແລ້ວ ກໍ​ບໍ່​ແມ່ນ​ບັນຫາ​ຂອງ​ຂ້ອຍ​ອີກ”.

 

- Wave100S AD to Website 2020 0 - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ຈາ​ຟາ ​ເລົ່າ​ວ່າ​ເດັກນ້ອຍ​ຜູ້​ຊາຍ​ຊາວ​ຊີຣີອາຍຸ 17 ປີ ທີ່​ລີ້​ໄພ​ມາລີ​ບັງ​ເມື່ອ 3 ປີ​ກ່ອນ ຫລັງ​ພໍ່ ​ແລະ ​ອ້າຍ​ນ້ອງ​ຖືກ​ສັງຫານ, ​ເປັນ​ຄົນ​ຫລ້າ​ສຸດ​ທີ່​ລາວ​ຕິດ​ຕໍ່​ເລື່ອງ​ຊີ້​ຂາຍ​ອະ​ໄວ​ຍະ​ວະ, ​ເດັກນ້ອຍ​ຄົນ​ນີ້​ຢູ່​ລີ​ບັງ​ພ້ອມ​ແມ່ ​ແລະ ​ເອື້ອຍ, ນ້ອງ​ສາວ​ອີກ 5 ຄົນ ທັງ​ທຸກ​ຍາກ ​ແລະ ມີ​ໜີ້​ສິນ ຈຶ່ງ​ຍອມ​ຂາຍ​ໝາກ​ໄຂ່ຫລັງ​ເບື້ອງໜຶ່ງ​ໃນ​ລາຄາ 8 ພັນ​ໂດ​ລາ​ສະຫະລັດ.

- 95815202 3596fac8 03d2 44f8 859d 4ef71be6efa1 - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ຕອນ​ທີ່​ນັກ​ຂ່າວ BBC ​ໄປ​ພົບ​ຫລັງ​ຜ່າຕັດ​ເອົາໝາກ​ໄຂ່ຫລັງ​ອອກ​ໄປ​ໄດ້​ສອງ​ມື້, ​ເດັກນ້ອຍ​ຄົນ​ນີ້​ບຶດ​ລຸກ​ບຶດ​ນັ່ງ​ດ້ວຍ​ຄວາມ​ເຈັບ​ປວດ, ​ເຫື່ອ​ໄຫລ​​ເຕັມ​ໜ້າ ຂະນະ​ທີ່​ເລືອດ​ສີ​ແດງ​ຍັງ​ໄຫລ​ຊຶມ​ຜ່ານ​ຜ້າ​ຜັນ​ແພ ​ແລະ ຢາ​ແກ້​ປວດ​ກໍ​ບໍ່​ໄດ້​ຊ່ວຍ​ໃຫ້​ລາວ​ຮູ້ສຶກ​ດີ​ຂຶ້ນ.

ຈາ​ຟາ ບໍ່​ຍອມ​ບອກ​ວ່າ​ຫາ​ເງິນ​ໄດ້​ເທົ່າ​ໃດ​ຈາກ​ການ​ຂາຍ​ອະ​ໄວ​ຍະ​ວະ​ຂອງ​ເດັກນ້ອຍ​ຄົນ​ນີ້, ລາວ​ບອກ​ວ່າ​ບໍ່​ຮູ້​ວ່າ​ໃຜ​ເປັນ​ຜູ້​ຮັບ​ໝາກ​ໄຂ່ຫລັງ​ຂອງ​ເດັກນ້ອຍ​ຄົນ​ນີ້​ໄປ, ​ແຕ່​ເຊື່ອ​ວ່າ​ອາດ​ຈະ​ສົ່ງ​ອອກ​ໄປ​ຕ່າງປະ​ເທດ.

ຈາກ​ຂະ​ນົບ​ທຳນຽບ ​ແລະ ຄວາມ​ເຊື່ອ​ທາງ​ສາສະໜາ ​ເຮັດ​ໃຫ້​ຄົນ​ຢູ່​ຕາ​ເວັນ​ອອກ​ກາງ​ບໍ່​ນິຍົມ​ບໍລິຈາກ​ອະ​ໄວ​ຍະ​ວະ ​ເຊິ່ງ​ເປັນ​ທີ່​ຕ້ອງການ.

- 95815200 942053b8 0a21 44c1 a14a c9e3adeb5f2f - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ

ອາ​ບູ ຈາ​ຟາ ອ້າງ​ວ່າ​ມີ​ຄົນ​ເຮັດ​ວຽກ​ເປັນ​ນາຍ​ໜ້າ​ຄື​ລາວ​ຢ່າງ​ໜ້ອຍ 7 ຄົນ​ຢູ່​ລີ​ບັງ, ​ເຖິງ​ຈະ​ຮູ້ວ່າ​ສິ່ງ​ທີ່​ເຮັດ​ນັ້ນຜິດ​ກົດໝາຍ, ​ແຕ່​ລາວ​ເຫັນ​ວ່າ​ຄົນ​ທີ່​ຍອມ​ຂາຍ​ອະ​ໄວ​ຍະ​ວະ​ຈະ​ມີ​ຊີວິດ​ທີ່​ດີກ​ວ່າ​ໃນ​ພາຍຫລັງ. ຈາ​ຟາ ອ້າງ​ວ່າ​ບໍ່​ໄດ້​ບັງຄັບ​ໃຫ້​ໃຜ​ຕັດສິນ​ໃຈ​ເຮັດ​ແບບ​ນີ້ ພຽງ​ແຕ່​ຮັບ​ຊອກ​ຫາ​ໃຫ້​ຕາມ​ຄວາມ​ເພິ່ງ​ພໍ​ໃຈ​ຂອງ​​ເຂົາ​ເຈົ້າ​ເທົ່າ​ນັ້ນ.

ໝາຍ​ເຫດ: ອາ​ບູ ຈາ​ຟາ ບໍ່​ແມ່ນ​ຊື່​ແທ້​ຂອງ​ນາຍ​ໜ້າ​ຄ້າຂາຍ​ອະ​ໄວ​ຍະ​ວະ​ຄົນ​ນີ້ ​ເຊິ່ງຍອມ​ເວົ້າກັບ BBC ​ແຕ່​ຂໍ​ໃຫ້​ປົກ​ປິດ​ຕົວ​ຕົນ​ທີ່​ແທ້​ຈິງ.

- WhatsApp Image 2020 05 27 at 5 - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ
- WhatsApp Image 2020 05 27 at 5 - ເລື່ອງຈິງຈາກປາກນາຍໜ້າຄ້າຂາຍອະໄວຍະວະຜູ້ລີ້ໄພຊາວຊີຣີ
error: Alert: ເນື້ອຫາຂ່າວມີລິຂະສິດ !!