ຄື້ນຄວາມຮ້ອນແຜ່ປົກຄຸມພື້ນທີ່ ປະສົບໄພນ້ຳຖ້ວມໃນຍີ່ປຸ່ນ
ເຈົ້າໜ້າທີ່ຍີ່ປຸ່ນກ່າວວ່າ: ຄື້ນຄວາມຮ້ອນຮຸນແຮງແຜ່ປົກຄຸມໃນພື້ນທີ່ປະສົບອຸທົກກະໄພທາງພາກຕາເວັນຕົກຂອງຍີ່ປຸ່ນໃນວັນທີ 16 ກໍລະກົດນີ້ ສົ່ງຜົນກະທົບຕໍ່ການເຮັດຄວາມສະອາດ ລວມທັງຜູ້ລອດຊີວິດ ແລະ ໜ່ວຍກູ້ໄພທ່າມກາງອຸນຫະພູມເພີ່ມຂຶ້ນ ຫລັງຈາກຝົນຕົກໜັກ ແລະ ນ້ຳຖ້ວມ ມີຜູ້ເສຍຊີວິດຫລາຍກວ່າ 200 ຄົນ.
ໜ່ວຍກູ້ໄພຫລາຍໝື່ນຄົນຍັງຂຸດຄົ້ນຕາມຊາກຫັກພັງເພື່ອຄົ້ນຫາສົບ ພາຍຫລັງຍີ່ປຸ່ນປະສົບໄພພິບັດຈາກສະພາບອາກາດຄັ້ງຮຸນແຮງທີ່ສຸດໃນຮອບກວ່າ 30 ປີ. ຂະນະທີ່ອຸນຫະພູມເພີ່ມຂຶ້ນເໜືອ 35 ອົງສາ ໃນພື້ນທີ່ປະສົບໄພນ້ຳຖ້ວມ ແລະ ດິນເຈື່ອນ, ຄາດວ່າຈຳນວນຜູ້ເສຍຊີວິດ 219 ຄົນຈະເພີ່ມຂຶ້ນອີກ ເນື່ອງຈາກມີຜູ້ສູນຫາຍຢ່າງໜ້ອຍ 21 ຄົນ ແລະ ອຸນຫະພູມທີ່ເພີ່ມຂຶ້ນຍິ່ງສ່ຽງຕໍ່ຜູ້ມີບັນຫາສຸຂະພາບຢູ່ແລ້ວ. ຜູ້ລອດຊີວິດປະມານ 4.700 ຄົນຕ້ອງອົບພະຍົບໄປຢູ່ສູນອາໄສ ຫລັງຈາກນ້ຳຖ້ວມ ແລະ ດິນເຈື່ອນຖົມເຮືອນ. ນອກຈາກນີ້ ຍັງບໍ່ສາມາດແຈກຈ່າຍນ້ຳປະປາໃຫ້ແກ່ປະຊາຊົນອີກຈຳນວນຫລາຍໄດ້.
