ອີກ 32 ປີຂ້າງໜ້າ ປະຊາກອນໂລກເຄິ່ງໜຶ່ງຈະສາຍຕາສັ້ນ

ວາລະສານດວງຕາວິທະຍາ Ophthalmology ຕີພິມຜົນງານວິໄຈທີ່ເຕືອນວ່າ : ພາຍໃນປີ 2050 ຫລື 32 ປີຂ້າງໜ້າ ປະຊາກອນໂລກເກືອບເຄິ່ງໜຶ່ງຈະມີບັນຫາສາຍຕາສັ້ນ ເນື່ອງຈາກຮູບແບບການໃຊ້ຊີວິດ ແລະ ສະພາບແວດລ້ອມ.

ວຽກງານວິໄຈເທື່ອນີ້ມາຈາກຜົນສຳຫລວດປະຊາກອນທົ່ວໄປກ່ວາ 2 ລ້ານຄົນ ເຊິ່ງຜົນການເກັບກຳຂໍ້ມູນເທື່ອນີ້ ເຮັດໃຫ້ຄາດ ເດົາໄດ້ວ່າໃນປີ 2050 ຈະມີຜູ້ທີ່ມີບັນຫາສາຍຕາສັ້ນຫລາຍເຖິງ 4.800 ລ້ານຄົນ, ຄິດໄລ່ເປັນ 49,8% ຂອງປະຊາກອນທົ່ວ ໂລກ ແລະ ໃນຈຳນວນນັ້ນມີ 938 ລ້ານຄົນ ຫລື ປະມານ 9,8% ຈະມີບັນຫາສາຍຕາສັ້ນຂັ້ນຮຸນແຮງ.

ນອກຈາກນີ້, ຍັງພົບວ່າປະຊາກອນໂລກຈະພົບກັບບັນຫາດ້ານສາຍຕາສັ້ນຫລາຍຂຶ້ນ ທັງຕາຕໍ້, ຕາຟາງ, ຈໍປະສາດຕາເສື່ອມ ຫລື ຈໍຕາລອກ ເຊິ່ງເມື່ອປຽບທຽບກັບ ປີ 2010 ຍັງມີຜູ້ທີ່ສາຍຕາສັ້ນຢູ່ ປະມານ 2.000 ລ້ານຄົນ ຄິດໄລ່ເປັນ 28,3% ແລະ ສາຍຕາສັ້ນຂັ້ນຮຸນແຮງປະມານ 277 ລ້ານຄົນ ຫລື ປະມານ 4% ເທົ່ານັ້ນ ເຊິ່ງບັນຫາສາຍຕາສັ້ນນີ້ພົບວ່າມາຈາກວິຖີຊີວິດຂອງຄົນໃນຍຸກນີ້ທີ່ໃຊ້ເວລາຢູ່ກັບໜ້າຈໍຄອມພິວເຕີຫລາຍຂຶ້ນ ລວມທັງຈໍແທັບເລັດ ຫລື ຈໍສະມາດໂຟນ.