ພຶດຕິກຳເຫລົ່ານີ້ທຳລາຍສຸຂະພາບຂອງທ່ານໄດ້ເທົ່າກັບການສູບຢາ

- 031807 2018 -  ພຶດຕິກຳເຫລົ່ານີ້ທຳລາຍສຸຂະພາບຂອງທ່ານໄດ້ເທົ່າກັບການສູບຢາ
- AGL banner -  ພຶດຕິກຳເຫລົ່ານີ້ທຳລາຍສຸຂະພາບຂອງທ່ານໄດ້ເທົ່າກັບການສູບຢາ
  1. ນັ່ງໝົດມື້ : ສະຖາບັນ Alberta Health Services Cancer Care ປະເທດການາດາ ເຜີຍວ່າ : ການນັ່ງຢູ່ແຕ່ບ່ອນເກົ່າຕິດຕໍ່ກັນເປັນເວລາດົນ ເປັນຕົ້ນແມ່ນການນັ່ງເຮັດວຽກຢູ່ໃນຫ້ອງການ ຫລື ການຂັບລົດທາງໄກ ກໍທຳລາຍສຸຂະພາບເຮົາໄດ້ ເຮັດໃຫ້ສ່ຽງເປັນຫລາຍພະຍາດ ທັງພະຍາດມະເຮັງເຕົ້ານົມ, ມະເຮັງລຳໄສ້, ມະເຮັງຕ່ອມລູກໝາກ ແລະ ມະເຮັງປອດ ໂດຍມີອັດຕາຄົນປ່ວຍດ້ວຍພະຍາດເຫລົ່ານີ້ສະເລ່ຍປີລະເກືອບ 160.000 ຄົນ ຄຳນວນແລ້ວກໍພົບວ່າຄວາມສ່ຽງພະຍາດມະເຮັງດັ່ງກ່າວຖືເປັນ 2 ໃນ 3 ຂອງຄວາມສ່ຽງພະຍາດມະເຮັງທີ່ມີສາເຫດມາຈາກການສູບຢາ. ດັ່ງນັ້ນ ເພື່ອສຸຂະພາບທີ່ຫ່າງໄກຈາກພະຍາດມະເຮັງທັງຫລາຍ ເຮົາກໍໍຄວນລຸກຍືດເສັ້ນຍືດເອັນເລື້ອຍໆ.
  2. ບໍລິໂພກຊີ້ນສັດ ແລະ ອາຫານປະເພດໄຂມັນຫລາຍເກີນໄປ : ຊີ້ນສັດອຸດົມໄປດ້ວຍໂປຣຕິນກໍແທ້ ແຕ່ໂປຣຕິນເຫລົ່ານີ້ມີ IGF-1 ຫລື ຮໍໂມນທີ່ມີສ່ວນກະຕຸ້ນໃຫ້ເກີດແຊນມະເຮັງໄດ້ ແລະ ຜົນການສຶກສາຈາກ University of Southern California ກໍພົບວ່າ ຄົນທີ່ກິນໂປຣຕິນຈາກຊີ້ນສັດເປັນປະຈຳ ໂດຍສະເພາະໃນໄລຍະໄວກາງຄົນ ຈະມີທ່າອ່ຽງສ່ຽງຕໍ່ພະ  ຍາດມະເຮັງຫລາຍກ່ວາຄົນທີ່ບໍ່ຄ່ອຍໄດ້ກິນໂປຣຕິນຈາກຊີ້ນສັດ ເຖິງ 4 ເທົ່າ ແລະ ຄວາມສ່ຽງນີ້ກໍທຽບເທົ່າກັບຄົນທີ່ສູບຢາເປັນປະຈຳນຳອີກ. ດັ່ງນັ້ນ ເພື່ອຫລຸດຄວາມສ່ຽງພະຍາດມະເຮັງ ນັກວິໄຈແນະນຳໃຫ້ຫລຸດການບໍລິໂພກຊີ້ນສັດໃຫ້ໜ້ອຍລົງ ແລ້ວຫັນມາຮັບໂປຣຕິນຈາກພືດ ເຊັ່ນ : ຖົ່ວເຫລືອງ ຫລື ເຕົ້າຫູ້ແທນ ຫລື ຢ່າງໜ້ອຍຄວນກິນຜັກ ແລະ ໝາກໄມ້ໃຫ້ໄດ້ທຸກຄາບ.
  3. ປຸງແຕ່ງອາຫານດ້ວຍແກ໊ສ : ຜົນການສຶກສາຂອງ Environmental Health Perspectives ແຕ່ປີ 2013 ພົບວ່າ : ຜູ້ທີ່ປຸງແຕ່ງອາຫານດ້ວຍເຕົາແກ໊ສເປັນປະຈຳຈະມີຄວາມສ່ຽງເປັນພະຍາດຕ່າງໆ ບໍ່ຕ່າງຈາກຄັວນຢາສູບມືສອງ ເນື່ອງຈາກແກ໊ສທຳມະຊາດເຫລົ່ານີ້ປະກອບໄປດ້ວຍກາກບອນ, ນີໂຕຣແຊນ ແລະ ຟໍມາລີນ ເຊິ່ງທຸກເທື່ອທີ່ເຮົາປຸງແຕ່ງອາຫານ ເຮົາກໍມີໂອກາດສືບດົມສານອັນຕະລາຍເຫລົ່ານີ້ເຂົ້າໄປນຳ. ແຕ່ຫາກຈະຫລຸດຄວາມສ່ຽງກໍບໍ່ຍາກ ຜູ້ຊ່ຽວຊາານແນະນຳໃຫ້ຕິດເຄື່ອງດູດຄັວນ ເຊິ່ງຈະຊ່ວຍດູດເອົາສານພິດຈາກແກ໊ສອອກໄປໄດ້ພໍສົມຄວນ ແລະ ຫາກເປັນໄປໄດ້ຄວນປຸງແຕ່ງອາຫານ ໃນບ່ອນໂລ່ງ, ມີອາກາດຖ່າຍເທສະດວກ.
  4. ໃຊ້ນຳ້ມັນຜິດປະເພດ : ຈາກຜົນການສຶກສາໃນແວດວົງຮ້ານອາຫານ ແລະ ແວດວົງຫ້ອງຄົວພົບວ່າ : ເມື່ອເອົານຳ້ມັນຖົ່ວເຫລືອງມາໃຊ້ຈືນອາຫານ ແລະ ຕັ້ງນຳ້ມັນດ້ວຍອຸນຫະພູມທີ່ຮ້ອນຫລາຍ ອາດນຳມາເຊິ່ງສານອັລດີໄຮ ແລະ ສານພລີໄຊຄລິກ ອະໂຣມາຕິກ ຮີໂດຣກາກບອນ ເຊິ່ງເປັນສານດຽວກັບທີ່ພົບໃນຢາສູບ. ຈຶ່ງມີຄຳແນະນຳໃຫ້ເລືອກນຳ້ມັນປຸງ ແຕ່ງອາຫານໃຫ້ຖືກປະເພດ ໂດຍອາຫານປະເພດຈືນຕ້ອງທີ່ຕ້ອງໃຊ້ຄວາມຮ້ອນສູງ ຄວນໃຊ້ນຳ້ມັນປາມ ຫລື ນຳ້ມັນໝູ ເຊິ່ງມີກົດໄຂມັນອີ່ມໂຕສູງ, ບໍ່ເຮັດໃຫ້ເໝັນຂິວ ແລະ ບໍ່ມີຄວາມໜຽວຈາກສານໂພລີເມີດັ່ງນຳ້ມັນທີ່ມີກົດໄຂມັນບໍ່ອີ່ມໂຕສູງ ເຊັ່ນ : ນຳ້ມັນຖົ່ວເຫລືອງ ຫລື ນຳ້ມັນໝາກກອກເປັນຕົ້ນ. ສ່ວນອາຫານຂົ້ວ ຫລື ເຮັດສະຫລັດ ຄວນໃຊ້ນຳ້ມັນທີ່ມີກົດບໍ່ອິ່ມໂຕສູງ ເຊັ່ນ : ນຳ້ມັນໝາກກອກ, ນຳ້ມັນຖົ່ວເຫລືອງ, ນຳ້ມັນໝາກອະໂວກາໂດ ເຊິ່ງນອກຈາກຈະປອດໄພຈາກສານ ພິດທີ່ຈະເກີດຂຶ້ນຈາກການປຸງອາຫານດ້ວຍນຳ້ມັນຜິດປະເພດແລ້ວ ການໃຊ້ນຳ້ມັນຖືກປະເພດອາຫານຍັງຊ່ວຍໃຫ້ລົດຊາດອາຫານແຊບຂຶ້ນໄດ້ນຳ. ແນວໃດກໍຕາມການກິນໄຂມັນຫລາຍເກີນໄປບໍ່ດີຕໍ່ສຸຂະພາບ ດັ່ງນັ້ນຄວນກິນໃນປະລິມານທ່ີພໍດີແລະ ເລືອກກິນນຳ້ມັນໃຫ້ຫລາກຫລາຍ ຢ່າບໍລິໂພກນຳ້ມັນຊະນິດດຽວຫລາຍ.
  5. ນອນບໍ່ພໍ : ການນອນບໍ່ພໍ ຫລື ນອນບໍ່ຫລັບຊຳ້ເຮື້ອນຳມາ ເຊິ່ງຄວາມສ່ຽງພະຍາດຫົວໃຈ, ພະຍາດຄວາມດັນເລືອດສູງ, ອາການເຄັ່ງຄຽດ ແລະ ພະຍາດຕຸ້ຍ ລວມທັງພະຍາດຊຳ້ເຮື້ອອື່ນໆ. ນອກຈາກນີ້, ຜົນການສຶກສາໜຶ່ງ ຍັງເປີດເຜີຍວ່າການນອນບໍ່ຫລັບ ພົບໄດ້ຫລາຍໃນກຸ່ມຄົນມັກສູບຢາ ເຊິ່ງມັກຈະມີອາການນອນໜ້ອຍກ່ວາ 6 ຊົ່ວໂມງເປັນປະຈຳ. ສິ່ງສຳຄັນຜົນການສຶກສາຈາກ Uppsala University ປະເທດສະວີເດັນ ຍັງພົບວ່າ : ຮ່າງກາຍທີ່ນອນຫລັບພັກຜ່ອນບໍ່ພຽງພໍອາດ ເຮັດໃຫ້ລະບົບປະສາດ ແລະ ສະໝອງຄ່ອຍໆເສື່ອມລົງບໍ່ຕ່າງຈາກຄົນສູບຢາເປັນປະຈຳ.
  6. ຮູ້ສຶກເຫງົາເປັນປະຈຳ : ວຽກງານວິໄຈຈາກມະຫາວິທະຍາໄລບຣິກແຮມ ບອກໃຫ້ເຮົາຮູ້ວ່າຄວາມເຫງົາສາມາດບັ່ນທອນສຸຂະພາບຮ່າງກາຍຂອງເຮົາໄດ້ຫລາຍເທົ່າກັບການເປັນພະຍາດຕຸ້ຍ ຫລື ການສູບຢາ 15 ກອກຕໍ່ມື້ ໂດຍສະເພາະຄວາມຮູ້ສຶກເຫງົາທີ່ເກີດຈາກຄວາມໂດດດ່ຽວປ່ຽວພອຍ ສາມາດເພີ່ມຄວາມສ່ຽງໄດ້ ທັງພະຍາດຫົວໃຈ, ພະຍາດກ່ຽວກັບຫລອດເລືອດສະໝອງ ແລະ ພະຍາດມະເຮັງ ບໍ່ຕ່າງຈາກໂທດຂອງຢາສູບທີ່ທຳລາຍສຸຂະພາບ.
- Wave100S AD to Website 2020 0 -  ພຶດຕິກຳເຫລົ່ານີ້ທຳລາຍສຸຂະພາບຂອງທ່ານໄດ້ເທົ່າກັບການສູບຢາ
- lattana 1 -  ພຶດຕິກຳເຫລົ່ານີ້ທຳລາຍສຸຂະພາບຂອງທ່ານໄດ້ເທົ່າກັບການສູບຢາ
error: Alert: Content is protected !!