ຜົນຮ້າຍຈາກການໃສ່ຜ້າອະນາໄມດົນ
ເລື່ອງຄວາມເຊື່ອທີ່ວ່າໃສ່ຜ້າອະນາໄມແຜ່ນເກົ່າເປັນເວລາດົນໂດຍບໍ່ປ່ຽນແຜ່ນໃໝ່ແລ້ວຈະເຮັດໃຫ້ເປັນພະຍາດມະເຮັງປາກມົດລູກນັ້ນ ຂໍບອກວ່າເປັນຄວາມເຊື່ອທີ່ບໍ່ຖືກຕ້ອງ ເພາະຄວາມຈິງແລ້ວສາເຫດການເກີດພະຍາດມະເຮັງປາກມົດລູກບໍ່ໄດ້ເກີດຈາກເຊື້ອແບັກທີເຣຍ ເຊິ່ງແພດໄດ້ອະທິບາຍວ່າ : ການໃສ່ຜ້າອະນາໄມດົນເກີນໄປຈະເຮັດໃຫ້ເຊື້ອແບັກທີເຣຍເພີ່ມຫລາຍຂຶ້ນ ແລະ ເຮັດໃຫ້ເກີດການຕິດເຊື້ອໄດ້ ແຕ່ບໍ່ໄດ້ກໍ່ໃຫ້ເກີດພະຍາດມະເຮັງແຕ່ຢ່າງໃດ.
ນອກຈາກນີ້, ຈາກການກວດກໍຍັງບໍ່ພົບວ່າມີວຽກງານວິໄຈໃດອອກມາລະບຸຈະແຈ້ງວ່າການໃສ່ຜ້າອະນາໄມດົນເກີນໄປ ຈະເຮັດໃຫ້ເປັນພະຍາດມະເຮັງປາກມົດລູກ ທັງນີ້ກໍເປັນຍ້ອນວ່າພະຍາດມະເຮັງປາກມົດລູກມີສາເຫດເກີດຈາກເຊື້ອໄວຣັສ HPV ເຊິ່ງເປັນເຊື້ອໄວຣັສທີ່ຕິດຕໍ່ກັນທາງເພດສຳພັນເທົ່ານັ້ນ ແລະ ສາມາດຕິດຕໍ່ກັນໄດ້ທັງຜູ້ຊາຍ ແລະ ແມ່ຍິງ ຈຶ່ງບໍ່ກ່ຽວຂ້ອງກັບການໃສ່ຜ້າອະນາໄມດົນເກີນໄປ.
ແນວໃດກໍຕາມ ໄດ້ຍິນແບບນີ້ແລ້ວກໍຢ່າດີໃຈ ເພາະຫາກທ່ານໃສ່ຜ້າອະນາໄມແຜ່ນເກົ່າດົນເກີນໄປໂດຍບໍ່ປ່ຽນ ກໍຍັງສ່ຽງຕໍ່ການຕິດເຊື້ອແບັກທີເຣຍ ຫລື ເກີດເຊື້ອລາ ແລະ ອາດເກີດອາການເຫລົ່ານີ້ຕາມມາໄດ້ ເຊັ່ນ :
– ອາການຄັນ ເພາະເມື່ອແບັກທີເຣຍທີ່ຢູ່ໃນຜ້າອະນາໄມທີ່ໃຊ້ແລ້ວເພີ່ມຈຳນວນຫລາຍຂຶ້ນ ຈະສົ່ງຜົນໃຫ້ເກີດການລະຄາຍເຄືອງຜິວບໍລິເວນອະໄວຍະວະເພດ ບາງຄົນອາດເຖິງຂັ້ນມີຕຸ່ມຜື່ນແດງຂຶ້ນຢູ່ອະໄວຍະວະເພດໄດ້.
– ເຊື້ອແບັກທີເຣຍທີ່ເກີດຂຶ້ນຈາກຜ້າອະນາໄມທີ່ໃຊ້ແລ້ວເມື່ອສຳຜັດກັບອາກາດຈະເຮັດໃຫ້ເກີດກິ່ນອັນບໍ່ເພິງປະສົງ ແລະ ເຮັດໃຫ້ໝົດຄວາມໝັ້ນໃຈໄດ້.
– ຄວາມອັບຊຸ່ມທີ່ມາຈາກຜ້າອະນາໄມຈະສົ່ງຜົນໃຫ້ເກີດເຊື້ອລາ ເຊິ່ງເຊື້ອລາເຫລົ່ານີ້ອາດຈະເຂົ້າສູ່ຮ່າງກາຍຜ່ານທາງຊ່ອງຄອດ ຈົນກາຍເປັນບັນຫາເຊື້ອລາໃນຊ່ອງຄອດ ແລະ ກໍ່ໃຫ້ເກີດອາການຄັນພາຍໃນ.
– ເກີດການຕິດເຊື້ອແບັກທີເຣຍໃນຊ່ອງຄອດ ແລະ ລະບົບທໍ່ຍ່ຽວ ເຮັດໃຫ້ຊ່ອງຄອດອັກເສບ ຫລື ຖ້າເຊື້ອແບັກທີເຣຍເຂົ້າສູ່ລະບົບທໍ່ຍ່ຽວກໍອາດຈະເຮັດໃຫ້ເປັນພົກຍ່ຽວອັກເສບ ຫລື ຮວຍໝາກໄຂ່ຫລັງອັກເສບໄດ້.
ວິທີໃສ່ຜ້າອະນາໄມທີ່ຖືກຕ້ອງເພື່ອຊ່ວຍຫລຸດຄວາມສ່ຽງຕໍ່ການຕິດເຊື້ອ.
- ປ່ຽນຜ້າອະນາໄມທຸກ 4 – 6 ຊົ່ວໂມງ : ໃນໄລຍະເປັນປະຈຳເດືອນ ອະໄວຍະວະເພດຂອງທ່ານຈະມີຄວາມອັບຊຸ່ມຫລາຍເປັນພິເສດ ແລະ ກໍ່ໃຫ້ເກີດການໝັກໝົມຂອງເຊື້ອພະຍາດ ດັ່ງນັ້ນໃນໄລຍະເປັນປະຈຳເດືອນຄວນປ່ຽນຜ້າອະນາໄມຢ່າງໜ້ອຍທຸກໆ 4 – 6 ຊົ່ວໂມງ ຫລື ຖ້າປະຈຳເດືອນມາຫລາຍກໍຄວນຈະປ່ຽນໃຫ້ຖີ່ຂຶ້ນ ເພື່ອບໍ່ໃຫ້ເກີດການສະສົມຂອງເຊື້ອພະຍາດຫລາຍຈົນເກີນໄປ.
- ເລືອກຜ້າອະນາໄມໃຫ້ເໝາະສົມກັບໂຕເອງ : ແຕ່ລະຄົນກໍມີປະລິມານປະຈຳເດືອນຕ່າງກັນ ບາງຄົນມາຫລາຍ ບາງຄົນມາໜ້ອຍ ຫລື ບາງຄົນອາດຫລາຍໃນໄລຍະທຳອິດ ດັ່ງນັ້ນຈຶ່ງຄວນເລືອກຜ້າອະນາໄມທີ່ເໝາະສົມກັບໂຕເອງເພື່ອທີ່ຈະໄດ້ບໍ່ພົບກັບບັນຫາຊຶມເປື້ອນ.
- ຫາກມີບັນຫາຕຸ່ມຜື່ນຢູ່ອະໄວຍະວະເພດຄວນຟ້າວປິ່ນປົວ : ບັນຫາຕຸ່ມຜື່ນທີ່ເກີດຈາກຜ້າອະນາໄມເປັນເລື່ອງທີ່ພົບຫລາຍທີ່ສຸດ ບາງເທື່ອກໍເກີດຈາກການແພ້ຜ້າອະນາໄມ ຫລື ເກີດຈາກການໝັກໝົມຂອງເຊື້ອພະຍາດ ດັ່ງນັ້ນ ຖ້າຫາກມີຕຸ່ມຜື່ນຂຶ້ນຄວນຟ້າວປິ່ນປົວດ້ວຍການທາຢາເພື່ອໃຫ້ຕຸ່ມຜື່ນຫລຸດລົງ. ຖ້າມີອາການແພ້ຜ້າອະນາໄມກໍຄວນປ່ຽນຍີ່ຫໍ້ ຫລື ຖ້າເກີດຈາກເຊື້ອແບັກທີເຣຍກໍຄວນປ່ຽນຜ້າອະນາໄມເລື້ອຍໆ.
- ຫໍ່ຜ້າອະນາໄມທີ່ໃຊ້ແລ້ວ ແລະ ຖິ້ມໃນຖັງຂີ້ເຫຍື້ອປິດແໜ້ນ: ເພາະຜ້າອະນາໄມທີ່ໃຊ້ແລ້ວເປັນແຫ່ລງເພາະເຊື້ອທີ່ດີ ທັງຍັງເຮັດໃຫ້ເກີດການແຜ່ກະຈາຍຂອງເຊື້ອພະຍາດໄດ້ງ່າຍ.
- ມີຜ້າອະນາໄມຕິດໂຕໄວ້ສະເໝີ : ບໍ່ວ່າຈະເປັນປະຈຳເດືອນຫລືບໍ່ ການມີຜ້າອະນາໄມໄວ້ກ່ອນຖືວ່າເປັນວິທີທ່ີຄວນເຮັດ ໂດຍສະເພາະໄລຍະທີ່ເປັນປະຈຳເດືອນຍິ່ງຄວນມີຜ້າອະນາໄມໄວ້ໃຫ້ພຽງພໍຕໍ່ການປ່ຽນໃນແຕ່ລະມື້ເພື່ອສຸຂະ ອະນາໄມທີ່ດີ.
