ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ

- 012307 2018 - ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ
- Untitled design - ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ

     ເຮືອນ ແມ່ນສິ່ງທີ່ບົ່ງບອກວ່າຈິດໃຈຂອງທ່ານເປັນແນວໃດ ລອງຈິນຕະນາການວ່າທ່ານກັບມາເຮືອນຫລັງຈາກເຮັດວຽກມາໝົດມື້ ແລ້ວກໍພົບວ່າມີຊອງຈົດໝາຍຈາກໄປສະນີເຕັມໄປໝົດ, ຕຽງກໍຍັງບໍ່ໄດ້ມ້ຽນໃຫ້ຮຽບຮ້ອຍ, ເຄື່ອງນຸ່ງທີ່ນຸ່ງແລ້ວກໍໝົດຢູ່ເທິງຕັ່ງໃນຫ້ອງນອນ, ຍັງມີຈານທີ່ຍັງບໍ່ໄດ້ລ້າງກອງຢູ່ໃນອ່າງ ແລະ ໂຕະກາເຟຍັງເປື້ອນຄາບແປກໆນຳອີກ ທ່ານຈະຮູ້ສຶກແນວໃດຖ້າຕ້ອງພົບກັບສິ່ງເຫລົ່ານີ້ ? ເຊິ່ງບໍ່ແມ່ນແຕ່ທ່ານຄົນດຽວ ເພາະໃຜໆກໍເປັນກັນໝົດ ແຕ່ຖ້າທ່ານປ່ຽນ ແປງມັນໄດ້ຊີວິດຈະມີຄວາມສຸກຂຶ້ນອີກຫລາຍ.

ເພາະເຮືອນແມ່ນສິ່ງທີ່ບົ່ງບອກວ່າຈິດໃຈຂອງທ່ານເປັນແນວໃດ ຖ້າເຮືອນຂອງທ່ານຮົກ ຫລື ບໍ່ສະອາດ ກໍສະແດງວ່າທ່ານບໍ່ຄ່ອຍຈະມີຄວາມສຸກກັບຊີວິດພໍປານໃດ ເພາະສະຖານທີ່ສຳຄັນບໍ່ໄດ້ຮັບການເອົາໃຈໃສ່ໃຫ້ມັນເປັນລະບຽບຮຽບຮ້ອຍເລີຍ ການຈັດການເຮືອນໃຫ້ເປັນລະບຽບຈຶ່ງຊ່ວຍໃຫ້ສະພາບຈິດໃຈຂອງທ່ານດີຂຶ້ນນຳ ເຄັດລັບເຫລົ່ານີ້ມາຈາກຜູ້ຊ່ຽວຊານທີ່ທ່ານກໍສາມາດເອົາໄປໃຊ້ຈັດການເຮືອນອັນຮົກເຮື້ອຂອງທ່ານໄດ້.

     – ຈົ່ງພະຍາຍາມເອົາສິ່ງທີ່ບໍ່ຈຳເປັນອອກໄປ ແລ້ວສັງເກດສິ່ງທີ່ເກີດຂຶ້ນ : ສາເຫດຫລັກຂອງການທີ່ເຮືອນບໍ່ເປັນລະບຽບກໍຄື ມີສິ່ງຂອງທີ່ບໍ່ຈຳເປັນຫລາຍເກີນໄປ ຢາກໃຫ້ລອງໃຊ້ເວລາວ່າງໆເອົາສິ່ງຂອງທີ່ບໍ່ໃຊ້ແລ້ວ ຫລື ບໍ່ໄດ້ມີຄວາມຈຳເປັນຖິ້ມໄປ. ສິ່ງຂອງເຫລົ່ານີ້ມັກຈະເຮັດໃຫ້ເຮົາຮູ້ສຶກເຖິງສິ່ງທີ່ບໍ່ສຳເລັດ ຫລື ສິ່ງທີ່ຄ້າງຄາໄວ້ ຍິ່ງເຫັນຫລາຍເທົ່າໃດກໍຍິ່ງເຮັດໃຫ້ຮູ້ສຶກບໍ່ດີ ກົງກັນຂ້າມກັນແລ້ວ ຖ້າທ່ານມີແຕ່ສິ່ງຂອງທີ່ທ່ານຮັກ ຫລື ຕ້ອງການແທ້ໆ ທ່ານຈະຈັດການກັບມັນໄດ້ງ່າຍຂຶ້ນ ເຕັກນິກກໍແມ່ນພະຍາຍາມແຍກສິ່ງຂອງໄວ້ເປັນໝວດໝູ່ ແລ້ວເຮືອນຈະເປັນລະບຽບ ແລະ ເປັນຕາຢູ່ຍິ່ງຂຶ້ນ.

     – ຈົ່ງຕັ້ງໃຈ ເຖິງຈະເລີ່ມຈາກສິ່ງນ້ອຍໆ : ເປົ້າໝາຍທຸກຢ່າງນັ້ນເລີ່ມຈາກຄວາມຕັ້ງໃຈ ເຊິ່ງການຖິ້ມສິ່ງຂອງທີ່ບໍ່ຈຳເປັນກໍຕ້ອງໃຊ້ຄວາມຕັ້ງໃຈຄືກັນ ທ່ານຕ້ອງຕັ້ງໃຈທີ່ຈະຈັດການລະບຽບເຮືອນຂອງທ່ານ, ໃຊ້ເວລາເພື່ອເຮັດທຸກຢ່າງໃຫ້ຮຽບຮ້ອຍ ການມີເຮືອນເປັນລະບຽບນັ້ນເປັນເລື່ອງຂອງເວລາ ເຮັດຢ່າງຊ້າໆ ບໍ່ຕ້ອງຟ້າວ ການປ່ຽນແປງໄລຍະຍາວນັ້ນເກີດຈາກການຄ່ອຍເປັນຄ່ອຍໄປ ຖ້າຟ້າວເກີນໄປມັນມັກຈະບໍ່ສຳເລັດ.

- Wave100S AD to Website 2020 0 - ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ

     – ຈົ່ງອົດທົນທີ່ຈະຈັດການເຮືອນໃຫ້ເໝາະສົມກັບທ່ານທີ່ສຸດ : ການຟ້າວຈັດການເຮືອນໃຫ້ຮຽບຮ້ອຍດ້ວຍເວລາພຽງຂ້າມຄືນ ໃຜກໍເຮັດໄດ້ໝົດ ແຕ່ຄວາມຈິງແລ້ວການຈະມີເຮືອນທີ່ເປັນລະບຽບມັນຕ້ອງໃຊ້ເວລາ ເພາະມັນບໍ່ແມ່ນແຕ່ການເອົາສິ່ງທີ່ບໍ່ຈຳເປັນອອກໄປ, ແຕ່ມັນແມ່ນການຄິດພິຈາລະນາວ່າສະພາບແວດລ້ອມແບບໃດຈະຊ່ວຍໃຫ້ທ່ານມີຄວາມສຸກສະບາຍໃຈກັບຊີວິດຫລາຍຂຶ້ນ ສິ່ງຂອງອັນໃດທີ່ທ່ານຢາກຈະໃຫ້ມັນຢູ່ອ້ອມໂຕ ແລະ ຄ່ອຍໆສ້າງລະບົບນັ້ນຂຶ້ນມາເພື່ອຕອບສະໜອງຄວາມຕ້ອງການຂອງທ່ານ ເຊິ່ງສິ່ງເຫລົ່ານີ້ຕ້ອງໃຊ້ເວລາ ສະນັ້ນ ຈົ່ງອົດທົນເຂົ້າໄວ້.

ອ່ານບົດຄວາມນີ້ຈົບແລ້ວ ກໍແນມເບິ່ງອ້ອມໆໂຕເບິ່ງວ່າເຮືອນຂອງທ່ານເລີ່ມຮົກຫລືຍັງ ? ທ່ານຮູ້ສຶກບໍ່ດີຫລືບໍ່ ? ມີຫຍັງທີ່ບໍ່ຈຳເປັນແດ່ ? ຖ້າທ່ານຄິດວ່າມັນຄວນປ່ຽນແປງແດ່ ກໍມາເລີ່ມກັນເລີຍ ແລ້ວຊີວິດຂອງທ່ານຈະມີຄວາມສຸກຂຶ້ນແນ່ນອນ.

- WhatsApp Image 2020 05 27 at 5 - ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ
- WhatsApp Image 2020 05 27 at 5 - ມີຄວາມສຸກເພີ່ມຂຶ້ນເລີ່ມຈາກເຮືອນຂອງທ່ານ
error: Alert: ເນື້ອຫາຂ່າວມີລິຂະສິດ !!