ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ

- Finance 1 - ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ
- Untitled design - ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ

ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ, ປະທານກວດກາສູນກາງພັກ, ຮອງນາຍົກລັດຖະມົນຕີໄດ້ໃຫ້ກຽດໂອ້ລົມຕໍ່ກອງປະຊຸມເປີດກວ້າງຄະນະບໍລິຫານງານພັກກະຊວງການເງິນ ຄັ້ງທີ 6 ສະໄໝທີ II ໂດຍໄດ້ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາ ແລະ ຖືເອົາວຽກງານກວດກາພັກ-ລັດເປັນຈຸດສຸມການນໍາພາຖັນແຖວສະມາຊິກພັກພະນັກງານ-ລັດຖະກອນ, ຍົກສູງຕໍ່ສະຕິການຈັດຕັ້ງເປັນແບບຢ່າງໃນການປະຕິບັດໜ້າທີ່ວຽກງານ, ມີຄວາມຊື່ສັດບໍລິສຸດ, ບໍ່ສວຍໂອກາດສໍ້ລາດບັງຫຼວງຫາຜົນປະໂຫຍດສ່ວນຕົວ ແລະ ອື່ນໆ.

ກອງປະຊຸມຄົບຄະນະບໍລິຫານງານພັກກະຊວງການເງິນ ຄັ້ງທີ 6 ສະໄໝທີ II ໄດ້ດຳເນີນມາເປັນເວລາ 3 ວັນ, ໃນລະຫວ່າງວັນທີ 16-18 ກໍລະກົດຜ່ານມາ, ໂດຍການເປັນປະທານຂອງສະຫາຍ ສົມດີ ດວງດີ ກໍາມະການສູນກາງພັກ, ເລຂາຄະນະພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ,  ຄະນະເລຂາທິການສູນກາງພັກ, ປະທານກວດກາສູນກາງພັກ, ຮອງນາຍົກລັດຖະມົນຕີ, ມີບັນດາສະຫາຍຄະນະປະຈໍາພັກ, ກໍາມະການຄະນະພັກ; ຄະນະນໍາກະຊວງການເງິນ ແລະ ຄະນະຮັບຜິດຊອບຊີວິດການເມືອງຂັ້ນສູນກາງເຂົ້າຮ່ວມ.

ໂອກາດນີ້, ສະຫາຍ ສົມດີ ດວງດີ ໄດ້ລາຍງານໂດຍສັງເຂບກ່ຽວກັບຜົນການດໍາເນີນ​ກອງປະຊຸມຄົບຄະນະບໍລິຫານງານພັກກະຊວງການເງິນຄັ້ງທີ 6 ສະໄໝທີ II, ຊຶ່ງໄດ້ພ້ອມກັນສະຫລຸບຕີລາຄາການຈັດຕັ້ງຜັນຂະຫຍາຍມະຕິ​ກອງປະຊຸມ​ໃຫຍ່ຄັ້ງທີ II ຂອງ​ອົງຄະນະ​ພັກກະຊວງ​ການ​ເງິນກາງສະໄໝ ແລະ ການກໍານົດທິດທາງວຽກງານຈຸດສຸມແຕ່ນີ້ຮອດກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການເງິນ, ສະຫລຸບຕີ​ລາຄາ​ການ​ສົ່ງ​ຂ່າວ​ຕໍ່​ການ​ນໍາພາ​ລວມຂອງຄະນະ​ບໍລິຫານ​ງານພັກ​ກະຊວງ​​ໃນ​​ບັ້ນດຳເນີນຊີວິດການເມືອງປັບປຸງປົວແປງ ທົ່ວອົງຄະນະພັກກະຊວງການເງິນປີ 2017 ​ແລະ ທິດ​ທາງແກ້​ໄຂ​ໃນ​ຕໍ່ໜ້າ, ຊຶ່ງມີຜູ້ເຂົ້າຮ່ວມທັງໝົດ 115 ສະຫາຍ, ຍິງ 33 ສະຫາຍ.

ສຳລັບບັນຫາທີ່ພົ້ນເດັ່ນໃນການດຳເນີນຊີວິດການເມືອງຂອງຄະນະບໍລິຫານງານພັກກະຊວງການເງິນເປັນຕົ້ນ: ການປະກອບຄໍາຄິດຂອງບັນດາສະຫາຍສະມາຊິກພັກຕໍ່ຄະນະບໍລິຫານງານພັກກະຊວງ ສ່ວນໃຫ່ຍແມ່ນບັນຫາວຽກງານແນວຄິດ, ຄວາມຮັບຜິດຊອບຕໍ່ໜ້າທີ່ການເມືອງ, ວຽກພະນັກງານ, ແບບແຜນວິທີເຮັດວຽກ, ການແຕ່ງຕັ້ງ, ຍົກຍ້າຍຊັບຊ້ອນໝູນວຽນ, ຄົນເຈົ້າ, ຄົນຂ້ອຍ, ຈຸ້ມເຈື້ອເຊື້ອສາຍ, ບັນຫາພະນັກງານສະພາບເຫລືອບໍ່ພໍ, ເລືອກວຽກເຮັດງານທໍາ, ຂາດຄວາມກະຕືລືລົ້ນ, ບາງ​ໜ່ວຍ​ພັກພະນັກງານ-ສະມາຊິກ​ພັກ​ ບໍ່​ກ້າຕໍາ​ນິສົ່ງ​ຂ່າວ​ກັນຢູ່ຮ່ວມກັນໂດຍສັນຕິ, ລໍຄອຍຕໍ່ການຊັບຊ້ອນໝູນວຽນ.

- Wave100S AD to Website 2020 0 - ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ

ໂອກາດນີ້, ສະຫາຍ ບຸນທອງ ຈິດມະນີ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍສະຫາຍໄດ້ເນັ້ນບາງຕອນສຳຄັນໃຫ້ຄະນະ​ພັກ​ກະຊວງການເງິນ ຖືເອົາວຽກງານກວດກາພັກ-ລັດ  ເປັນວຽກງານຈຸດສຸມຂອງການນໍາພາຂອງພັກ, ສຸມໃສ່ແກ້ໄຂຈຸດອ່ອນຂອງວຽກງານກວດກາໃນການຈັດຕັ້ງຜັນຂະຫຍາຍນິຕິກໍາຕ່າງໆ,  ພັດທະນາຂະແໜງການເງິນໃຫ້ມີຄວາມເຂັ້ມແຂງ,  ມີວິໄນເຂັ້ມງວດ, ມີຄວາມໂປ່ງໃສ  ແລະ ຍຸຕິທໍາ. ພ້ອມນັ້ນ,  ກໍໃຫ້ເອົາ 10 ຂໍ້ຫ້າມຕໍ່ພະນັກງານ-ລັດຖະກອນ ຂະແໜງການເງິນເປັນຄູ່ມືໃນການຈັດຕັ້ງປະຕິບັດໃຫ້ຖືກຕ້ອງຕາມລະບຽບກົດ

ໝາຍ.  ໃນນັ້ນ, ຄະນະພັກທຸກ​ຂັ້ນຕ້ອງ​ຕັດສິນ​ໃຈ​ແກ້​ໄຂປະກົດ​ການ​ທາງ​ດ້ານ​ແນວ​ຄິດທີ່​ເກີດ​ຂຶ້ນກັບ​ຖັນ​ແຖວ​ສະມາ​ຊິກພັກ, ພະນັກງານ-ລັດຖະກອນໃນ​ຄວາມຮັບຜິດຊອບ​ຂອງ​ຕົນ​ເປັນ​ຕົ້ນແມ່ນ​​ຄວາມ​ຮັບຜິດ​ທາງ​ດ້ານ​ການ​ເມືອງ, ແນວ​ຄິດ​ເຫັນ​ແກ່​ຜົນ​ປະ​ໂຫຍ​ດສ່ວນ​ຕົວ,  ຂາດ​ຄວາມ​ກະຕືລື​ລົ້ນ,  ຂາດ​ຄວາມ​ຮັບຜິດຊອບ, ສວຍ​ໃຊ້​ໜ້າ​ທີ່, ສໍ້​ລາດ​ບັງ​ຫລວງໃຫ້​ມີ​ການ​ຫັນປ່ຽນ​ຢ່າງ​ຕັ້ງໜ້າ, ໂດຍ​ການ​ນຳ​ໃຊ້​ຫລາຍ​ຮູບ​ແບບ ​ແລະ ວິທີ​ການ. ພ້ອມນີ້, ​ບັນດາ​ສະຫາຍຄະນະ​ພັກກະຊວງ,  ຄະນະ​ພັກ​ຂັ້ນ​ຕ່າງໆ,  ສະມາຊິກ​ພັກ, ພະນັກ​ງານ-ລັດຖະ ກອນ ຕ້ອງມີຄວາມ​ເປັນ​​ແບບຢ່າງ​ນໍາ​ໜ້າ,  ມີ​​​ແນວຄິດເສຍສະຫລະຜົນປະໂຫຍດສ່ວນຕົວ ເພື່ອຮັບໃຊ້ຜົນປະໂຫຍດສ່ວນລວມ,  ມີຈັນຍາບັນຮັບໃຊ້ຊາດຮັບໃຊ້ປະຊາຊົນ  ພ້ອມກັນບຸກບືນຜ່ານຜ່າສິ່ງທ້າທາຍ,  ຄວາມຫຍຸ້ງຍາກທາງດ້ານການເງິນ-ງົບປະມານ ເພື່ອນໍາພາຂະແໜງການເງິນສ້າງບາດລ້ຽວໃໝ່ຢ່າງຈະແຈ້ງເປັນຮູບປະທຳ, ຕິດພັນກັບການກໍານົດຕໍາແໜ່ງງານ, ຂຶ້ນແຜນກຳນົດພະນັກງານນໍາພາ-ຄຸ້ມຄອງ  ແລະ ປັບປຸງ​ແກ້​ໄຂ​ບັນຫາ​ທີ່​ຄົງ​ຄ້າງໃນ​ດ້ານ​ການຈັດ​ຕັ້ງ ​ແລະ ບຸກຄະລາ​ກອນຂັ້ນກົມ,  ຂັ້ນພະແນກ, ໜ່ວຍ​ງານຢູ່​ຂັ້ນ​ສູນກາງ  ​ແລະ ທ້ອງ​ຖິ່ນ ໃຫ້ມີການຫັນປ່ຽນໃໝ່,  ເຂັ້ມແຂງ, ໂປ່ງໃສ, ສືບຕໍ່ຈັດຕັ້ງປະຕິບັດລະບອບແບບແຜນວິທີເຮັດວຽກ,  ກົນໄກປະສານສົມທົບລະຫວ່າງກະຊວງການເງິນກັບອົງຄະນະພັກ, ອົງການປົກຄອງທ້ອງຖິ່ນ. ສໍາລັບວຽກງານວິຊາສະເພາະແມ່ນຍັງມີຫຼາຍບັນຫາທີ່ເປັນສິ່ງທ້າທາຍໃນເງື່ອນໄຂສະພາບເສດຖະກິດພວມມີຄວາມຫຍຸ້ງຍາກຖືກຜົນກະທົບຈາກພາຍນອກ ແລະ ການຜະລິດ, ການບໍລິການພາຍໃນຍັງບໍ່ທັນແຂງແຮງ ໃນສະພາບທີ່ແຫຼ່ງລາຍຮັບບໍ່ທັນເຂັ້ມແຂງໜັກແໜ້ນໝັ້ນທ່ຽງ ແລະ ຖືສໍາຄັນໃນການສຶກສາອົບຮົມຕິດຕາມກວດກາພະນັກງານທີ່ຢູ່ໃນຄວາມຮັບຜິດຊອບຂອງຕົນຢ່າງໃກ້ຊິດ, ເດັດດ່ຽວແກ້ໄຂພະນັກງານທີ່ສວຍໃຊ້ໜ້າທີ່ສໍ້ລາດບັງຫຼວງເອົາເງິນຂອງລັດໃຫ້ໄດ້ຂາດຕົວ, ເອົາໃຈໃສ່ຄຸ້ມຄອງການປະຕິບັດນະໂຍບາຍປະຢັດ, ຕ້ານການຟຸ້ມເຟືອຍເຂັ້ມແຂງໜັກແໜ້ນກວ່າເກົ່າ ແລະ ສຸມໃສ່ປັບປຸງນໍາໃຊ້​ລະບົບ​ເຄື່ອງມື​ທັນ​ສະ​ໄໝ​ທີ່​ມີ​ແລ້ວ​ໃຫ້​​ເປັນ​ລະບົບ​ຄົບ​ຊຸດ​ເພື່ອ​ພັດທະນາ​ການ​ຄຸ້ມ​ຄອງ​ວຽກ​ງານ​ການ​ເງິນ​ໃຫ້ໄປ​ສູ່​ທັນ​ສ​ະໄໝ​ເທື່ອ​ລະ​ກ້າວ.

 

- WhatsApp Image 2020 05 27 at 5 - ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ
- WhatsApp Image 2020 05 27 at 5 - ສະຫາຍ ບຸນທອງ ຈິດມະນີ ເນັ້ນໃຫ້ຄະນະພັກກະຊວງການເງິນເອົາໃຈໃສ່ຫຼາຍບັນຫາໃນຕໍ່ໜ້າ
error: Alert: ເນື້ອຫາຂ່າວມີລິຂະສິດ !!