ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!

- 37730282 676823049335785 4975369027120529408 n - ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!
- Untitled design - ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!

ໂດຍ : ມຶກບໍ່ແຫ້ງ

ຕົກມາສະໄໝນີ້ ໃຜໆກໍຢາກໃຫ້ລູກສະຫຼາດປາດເປື່ອງ ບໍ່ເວົ້າເລື່ອງຮຽນພາສາຕ່າງປະເທດ, ວິຊາເລກ ຄິດໄລ່ຕ່າງໆ ແຕ່ຍັງນ້ອຍໆ ໂດຍການ ຈ້າງຮຽນຢູ່ໂຮງຮຽນ ທີ່ມີຄ່າເຂົ້າຮຽນແພງໆ ແຕ່ ສິ່ງດັ່ງກ່າວມັນ ແມ່ນວິທີທາງທີ່ຖືກຕ້ອງລະບໍເນາະ?​

ຜູ້ຂຽນໄດ້ອ່ານບົດຄວາມສະບັບໜຶ່ງ ທີ່ໃສ່ຫົວຂໍ້ວ່າ “ການຫຼິ້ນ ແມ່ນການຮຽນ, ໃຫ້ເດັກນ້ອຍ ເປັນເດັກນ້ອຍເທາະ”! ເຊິ່ງໄດ້ຕີພິມລົງເວບໄຊ໌ (website) ຂອງ ເວທີ ເສດຖະກິດໂລກ (World Economic Forum) ເຮັດໃຫ້ຄິດຊວາດ ວ່າ ບົດຮຽນທີ່ລໍ້າຄ່າໃນຊີວິດ ໂດຍສະເພາະ ຕອນຍັງນ້ອຍນັ້ນ ບໍ່ໄດ້ຢູ່ນຳຫ້ອງຮຽນເດີ!

ຕອນໜຶ່ງຂອງບົດຄວາມນີ້ ເວົ້າວ່າ “ການຫຼິ້ນ ແມ່ນສິດເສລີພາບຂອງເດັກນ້ອຍ ໃນການໃກ້ຊິດ ແລະ ຮຽນຮູ້ຈາກໂລກທີ່ອ້ອມຮອບຕົວເຂົາເຈົ້າ, ທັງຈິດໃຈ ແລະຮ່າງກາຍເຂົາເຈົ້າໄດ້ ຕິດພັນກັບໂລກຂອງຄວາມເປັນຈິງ. ການຫຼິ້ນ ສ້າງຄວາມເຂັ້ມແຂງ ໃຫ້ເດັກນ້ອຍ”. ການຄົ້ນຄວ້າໜຶ່ງກໍເວົ້າວ່າ “ການຫຼິ້ນເປັນສິ່ງຈຳເປັນ ຕໍ່ການພັດທະນາເດັກນ້ອຍ ສາມາດສ້າງທັກສະ ທີ່ຈຳເປັນແກ່ເຂົາເຈົ້າ ໃນການດຳລົງຊີວິດໃນອະນາຄົດ ເຊັ່ນວ່າ ຄວາມສະຫຼາດທາງອາລົມ, ແນວຄວາມຄິດສ້າງສັນ ແລະ ການແກ້ໄຂບັນຫາ ເພາະສະນັ້ນ ຈຶ່ງມີຄຳເວົ້າທີ່ວ່າ “ຢາກເປັນພະເອກ ຕ້ອງນຳພາ ຢາກຮຽນຮູ້ ກະຕ້ອງຫຼິ້ນ”

ສົມພໍແລ ການສຶກສາຢູ່ປະເທດແຟງລັງ ເພິ່ນຈຶ່ງໃຫ້ເດັກນ້ອຍຫຼິ້ນເອົາແທ້ເອົາວ່າຢູ່ໂຮງຮຽນ ແທນທີ່ຊິໄປ ຮຽນ ກຽມເສັງ ເຄັ່ງຄັດ, ກົດດັນເດັກນ້ອຍ, ຢູ່ແຟງລັງນັ້ນ ເດັກນ້ອຍຮຽນໜັງສືແມ່ນບໍ່ມີການສອບເສັງ, ມີແຕ່ຫຼິ້ນ ເພື່ອຮຽນຮູ້ໄປນຳ ແລະ ແລ້ວ ການສຶກສາຢູ່ປະເທດພັດຖືກຍອມຮັບວ່າ “ດີທີ່ສຸດໃນໂລກ”, ເດັກນ້ອຍກໍມີ ແຕ່ຜູ້ ສະຫຼາດທາງອາລົມ, ມີແນວຄິດສ້າງສັນ ແລະແກ້ໄຂບັນຫາໄດ້ດີ.

- Wave100S AD to Website 2020 0 - ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!

ມາເບິ່ງຢູ່ບ້ານເຮົາ, ຜູ້ຂຽນສັງເກດເບິ່ງ ຫຼານຊາຍ ທີ່ເປັນລູກຂອງອ້າຍ ອາຍຸໄດ້ 3 ປີ ກວ່າ ທີ່ພໍ່ແມ່ ເພິ່ນຈ້າງ ເຂົ້າໂຮງຮຽນທີ່ມີຊື່ສຽງ ແລະລາຄາກໍສູງສົມຄວນ ໃນນະຄອນຫຼວງວຽງຈັນ, ແຕ່ພໍໄປໂຮງຮຽນໄດ້ໄລຍະໜຶ່ງ ຫຼານຊາຍຜູ້ນີ້ ແມ່ນບໍ່ໄປເດັດຂາດ, ພໍແຕ່ເຫັນຊຸດນັກຮຽນເທົ່ານັ້ນລະ ແມ່ນໃຈຊິຫຼຸດຊິຂາດ. ຈາກເຫດການແບບນີ້ ຈຶ່ງຄິດໄດ້ວ່າ ມີຫຍັງບາງຢ່າງ ທີ່ເດັກນ້ອຍ ບໍ່ມັກແທ້ໆລະຢູ່ໂຮງຮຽນ.

ພວກເຮົາຄວນໃຫ້ອິດສະຫຼະແກ່ເດັກນ້ອຍ, ຫຼັກສູດການຮຽນຢູ່ໂຮງຮຽນລັດ ຫຼື ເອກະຊົນ ກໍຄວນທົດລອງ ເອົາການຮຽນ ການສອນ ແບບຄົນແຟງລັງເຮັດ ກໍໜ້າສົນໃຈ, ທົດລອງເຮັດກັບໂຮງຮຽນໃດໜຶ່ງເບິ່ງກ່ອນ ວ່າເດັກນ້ອຍເຮົາຊິມີພັດທະນາການແຕກຕ່າງແນວໃດ ຈາກ ການຮຽນແບບທຳນຽມ ແລະຄວາມເຊື່ອແບບເກົ່າ ທີ່ວ່າ ຕ້ອງເບິ່ງບົດຮຽນ, ແກ້ວຽກບ້ານ (ເດັກນ້ອຍຫຼາຍຄົນ ແມ່ນພໍ່ແມ່ແກ້ໃຫ້ ລະຊິມີປະໂຫຍດຫຍັງ!) ແລະ ອື່ນໆ ອັນເຮັດໃຫ້ ເດັກນ້ອຍມີຄວາມກົດດັນ, ປິດກັ້ນຄວາມເປັນອິດສະຫຼະ ແລະ ຂາດຄວາມກ້າຫານໄປໃນໂຕ.

ຄຳເວົ້າສຸດທ້າຍທີ່ເຮັດໃຫ້ຜູ້ຂຽນຕົກສະເງີ້ຈາກບົດຄວາມ ທີ່ໄດ້ອ່ານກໍຄືວ່າ “ເດັກນ້ອຍຫຼິ້ນຫຼາຍເທົ່າໃດໃນມື້ນີ້ ກໍຈຶ່ງມີຄວາມກຽມພ້ອມຕໍ່ອະນາຄົດຫຼາຍເທົ່ານັ້ນ”, ຕັ້ງວ່າແມ່ນກົງກັນຂ້າມກັບ ຄວາມຄິດ ແລະຄວາມເຊື່ອພວກເຮົາແທ້ໆ ແຕ່ຫຼິ້ນໃນນີ້ ກໍແມ່ນການຫຼິ້ນເພື່ອຮຽນຮູ້ເດີ ບໍ່ແມ່ນຫຼິ້ນແນວໄຮ້ສາລະ ນາໆປະການ, ເພາະສະນັ້ນ ຂໍໃຫ້ເດັກນ້ອຍພວກເຮົາໄດ້ຫຼິ້ນຕາມໃຈ ເພື່ອການຮຽນຮູ້ຊີວິດເຂົາເຈົ້າແດ່ເທາະ!

- WhatsApp Image 2020 05 27 at 5 - ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!
- WhatsApp Image 2020 05 27 at 5 - ພວກເຮົາຈົ່ງໃຫ້ເດັກນ້ອຍຫຼິ້ນຕາມໃຈແດ່ເທາະ!
error: Alert: ເນື້ອຫາຂ່າວມີລິຂະສິດ !!