ຍົກລະດັບຄວາມເຂັ້ມແຂງຄຸ້ມຄອງການລົງທຶນພາກເອກະຊົນ
ກະຊວງແຜນການ ແລະ ການລົງທຶນຮ່ວມກັບກະຊວງພາຍໃນ ຈັດຝຶກອົບຮົມເພື່ອສ້າງຄວາມເຂັ້ມແຂງດ້ານການຄຸ້ມຄອງການລົງທຶນຂອງພາກເອກະຊົນ ແລະ ການລົງທຶນຮ່ວມລະຫວ່າງພາກລັດ ແລະ ເອກະຊົນ ໃຫ້ແກ່ບັນດາຂະແໜງການກ່ຽວຂ້ອງຕ່າງໆ ໃນຫົວຂໍ້: “ການສ້າງຄວາມເຂັ້ມແຂງດ້ານການຄຸ້ມຄອງຂອງພາກລັດ” ຂຶ້ນແຕ່ວັນທີ 23-27 ກໍລະກົດນີ້, ເພື່ອແນໃສ່ດຶງດູດການລົງທຶນຂອງພາກເອກະຊົນປະກອບສ່ວນເຂົ້າໃນການພັດທະນາເສດຖະກິດ-ສັງຄົມໃຫ້ນັບມື້ເພີ່ມຂຶ້ນ, ພາຍໃຕ້ການສະໜັບສະໜູນ ດ້ານວິຊາການຂອງທະນາຄານພັດທະນາອາຊີ (ຫລື ADB).
ຊຸດຝຶກອົບຮົມນີ້, ຜູ້ເຂົ້າຮ່ວມຈະໄດ້ຮຽນຮູ້ຈາກຊ່ຽວຊານຂອງ ADB ກ່ຽວກັບການວາງນະໂຍບາຍ ແລະ ນິຕິກຳກ່ຽວກັບການລົງທຶນຮ່ວມລະຫວ່າງ ພາກລັດ ແລະ ເອກະຊົນ, ວົງຈອນການດໍາເນີນໂຄງການລົງທຶນຮ່ວມ ລະຫວ່າງພາກລັດ ແລະ ເອກະຊົນ ເລີ່ມແຕ່ໄລຍະການກໍານົດໂຄງການເບື້ອງຕົ້ນ, ການສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ, ສິ່ງແວດລ້ອມ ແລະ ສັງຄົມ, ການກະກຽມການປະມູນ, ການປະມູນ, ການຄັດເລືອກຜູ້ຊະນະການປະມູນ, ການເຊັນສັນຍາສຳປະທານ, ຕະຫລອດຮອດການຄຸ້ມຄອງ ແລະ ຕິດຕາມກວດກາການຈັດຕັ້ງປະຕິບັດສັນຍາ ແລະ ອາຍຸຂອງໂຄງການ ເພື່ອຍົກລະດັບຄວາມໂປ່ງໃສ, ມີປະສິດທິພາບ ແລະ ປະສິດທິຜົນຂອງໂຄງການລົງທຶນດີຂຶ້ນ.
ທ່ານນາງ ທະວີຈັນ ທ່ຽງເທບວົງສາ ຮອງຫົວໜ້າກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ ກ່າວວ່າ: ການຝຶກອົບຮົມນີ້ມີຄວາມສໍາຄັນຫລາຍເພື່ອຍົກລະດັບຄວາມພ້ອມດ້ານນິຕິກຳ ແລະ ບຸກຄະລາກອນ ຂອງລາວ, ລັດຖະບານມີນະໂຍບາຍສົ່ງເສີມການລົງທຶນໃນຫລາຍຮູບແບບ ເພື່ອດຶງດູດເອົາການລົງທຶນຂອງພາກເອກະຊົນມາປະກອບສ່ວນໃນການພັດທະນາເສດຖະກິດ-ສັງຄົມໃນຂະແໜງການຕ່າງໆ, ສະນັ້ນອີງໃສ່ຜົນສຳເລັດຂອງຫລາຍປະເທດ ການລົງທຶນຮ່ວມລະຫວ່າງລັດ ແລະ ເອກະຊົນ ຖືວ່າເປັນຮູບແບບການລົງທຶນໜຶ່ງທີ່ມີປະສິດທິພາບໃນການດຶງດູດການລົງທຶນທີ່ມີຄຸນນະພາບ, ຊຶ່ງລັດຖະບານກໍມີຄວາມສົນໃຈໃນການສົ່ງເສີມ ເພື່ອປະກອບສ່ວນຍົກລະດັບຄຸນນະພາບຊິວິດຂອງປະຊາຊົນ ກໍຄືຊຸກຍູ້ການພັດທະນາ ດ້ວຍການສົ່ງເສີມການລົງທຶນທີ່ມີຄຸນນະພາບຕາມນະໂຍບາຍເຕີບໂຕສີຂຽວ ແລະ ຍືນຍົງ.
