IS ລະເບີດໂຈມຕີເຂດລັດຖະບານ ໃນພາກໃຕ້ຊີຣີ ເສຍຊີວິດກວ່າ 200 ຄົນ
ມີຜູ້ເສຍຊີວິດຫລາຍກວ່າ 200 ຄົນ ຫລັງກຸ່ມ IS ກໍ່ເຫດລະເບີດຂ້າຕົວຕາຍໂຈມຕີຫລາຍພື້ນທີ່ໃນແຂວງສາໄວດາ ເຊິ່ງເປັນເຂດອິດທິພົນຂອງລັດຖະບານ ທາງຕອນໃຕ້ຂອງຊີຣີ.
ສຳນັກຂ່າວຕ່າງປະເທດລາຍງານວ່າ: ອົງການສັງເກດການດ້ານສິດທິມະນຸດຊີຣີ (SOHR) ລາຍງານການເກີດເຫດລະເບີດຂ້າຕົວຕາຍຫລາຍຄັ້ງໃນພື້ນທີ່ແຂວງສາໄວດາ ທາງຕາເວັນຕົກສຽງໃຕ້ຂອງຊີຣີ ເປັນເຫດໃຫ້ມີຜູ້ເສຍຊີວິດລວມກັນຫລາຍກວ່າ 220 ຄົນ ໃນຈຳນວນນີ້ຢ່າງໜ້ອຍ 127 ຄົນເປັນພົນລະເຮືອນ ແລະ ມີຢ່າງໜ້ອຍ 94 ຄົນເປັນທະຫານ ຫລື ນັກຮົບຂອງກອງກຳລັງຝ່າຍສະໜັບສະໜູນລັດຖະບານ, ອີກທັງຍັງມີຜູ້ໄດ້ຮັບບາດເຈັບອີກຫລາຍຮ້ອຍຄົນ.
ເຫດການດັ່ງກ່າວຖືເປັນການໂຈມຕີນອງເລືອດຄັ້ງຮຸນແຮງທີ່ສຸດໃນແຂວງສາໄວດາ ນັບແຕ່ສົງຄາມກາງເມືອງໃນຊີຣີເກີດຂຶ້ນໃນເດືອນມີນາ 2011 ຫລັງເກີດເຫດກຸ່ມ IS ເປັນຜູ້ຢູ່ເບື້ອງຫລັງ ເຖິງວ່າຈະຫລຸດລົງເນື່ອງຈາກປະຕິບັດການກົດດັນທາງທະຫານຢ່າງໜັກຂອງກອງທັບຊີຣີ, ແຕ່ກຸ່ມກໍ່ການຮ້າຍດັ່ງກ່າວຍັງມີຖານທີ່ໝັ້ນຢູ່ໃນພາກເໜືອຂອງແຂວງສະໄວດາ, ສ່ວນບໍລິເວນທີ່ເຫລືອຢູ່ພາຍໃຕ້ການປົກຄອງຂອງຝ່າຍລັດຖະບານ. ທັງນີ້ ລາຍງານຂອງ SOHR ລະບຸອີກວ່າ: ມີສະມາຊິກກຸ່ມ IS ຢ່າງໜ້ອຍ 38 ຄົນເສຍຊີວິດຈາກການສູ້ຮົບຕອບໂຕ້ກັບທະຫານຊີຣີ ແລະ ປະຊາຊົນໃນພື້ນທີ່ ເຊິ່ງຈັບອາວຸດຕໍ່ສູ້ປົກປ້ອງບ້ານເຮືອນ ແລະ ຊີວິດຂອງຕົນເອງ.
