ລັດຖະບານເອົາໃຈໃສ່ຕ້ານການຂາຍຫວຍເຖື່ອນ

- 37595604 212556039597358 7662325688761843712 n - ລັດຖະບານເອົາໃຈໃສ່ຕ້ານການຂາຍຫວຍເຖື່ອນ
- Untitled design - ລັດຖະບານເອົາໃຈໃສ່ຕ້ານການຂາຍຫວຍເຖື່ອນ

ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ 8 ເມື່ອບໍ່ດົນມານີ້, ໄດ້ມີສະມາຊິກສະພາແຫ່ງຊາດຫລາຍເຂດສະແດງຄວາມເປັນຫວ່ງຕໍ່ສະພາບການ​ຂາຍ​ຫວຍ​ເຖື່ອນ​ຈາກ​ປະ​ເທດ​ໃກ້​ຄຽງ​ເຂົ້າມາ​ຈຳໜ່າຍ​ໃນ ສປປ ລາວ ​ໃນ​ຮູບ​ແບບ​ທັນ​ສະ​ໄໝ, ອັນ​ເປັນ​ສິ່ງ​ຈູງ​ໃຈ​ແກ່​ຜູ້​ຊີງ​ໂຊກ-ຊີງ​ລາງວັນ, ເຊິ່ງເປັນປະກົດການຫຍໍ້ທໍ້ໜຶ່ງໃນສັງຄົມ, ພ້ອມທັງສະເໜີໃຫ້ພາກລັດມີວິທີການ ແລະ ມາດຕະການເຂັ້ມງວດຂຶ້ນ ເພື່ອສະກັດກັ້ນບັນຫາດັ່ງກ່າວ.

ຕໍ່ບັນຫານີ້, ກະຊວງການເງິນໄດ້​ຊີ້​ແຈງວ່າ: ພາຍຫລັງ​ມີ​ແຈ້ງ​ການ​ຂອງ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີສະ​ບັບ​ເລກທີ 1244/ຫສນຍ.ກລຂ, ລົງ​ວັນ​ທີ 17 ສິງຫາ 2017 ​ໄດ້​ມອບ​ໃຫ້​ກະຊວງ​ການ​ເງິນສົມທົບ​ກັບ​ກະຊວງ​ປ້ອງ​ກັນ​ຄວາມ​ສະຫງົບ ​ແລະ ພາກສ່ວນ​ກ່ຽວຂ້ອງ​ຕ່າງໆກວດກາ ​ແລະ ຄຸ້ມ​ຄອງ​ຫ້າມ​ບໍ່​ໃຫ້​ມີ​ການຈຳໜ່າຍ​ຫວຍ​ເຖື່ອນ​ຈາກ​ຕ່າງປະ​ເທດ, ຖ້າ​ພົບ​ກໍລະນີ​ມີ​ຜູ້​ລະ​ເມີດ ຫລື ຈຳໜ່າຍ​ຫວຍ​ດັ່ງກ່າວ ​ແມ່ນ​ໃຫ້​ດຳ​ເນີນ​ຄະດີ​ຕາມ​ລະບຽບ ກົດໝາຍ​ຢ່າງ​ເຂັ້ມງວດ ແລະ ຜ່ານ​ການປະຕິບັດແຈ້ງການນີ້ມາ​ຮອດ​ປັດຈຸບັນ​ ສາມາດ​ແກ້​ໄຂ​ປາກົດການ​ຂາຍ​ຫວຍ​ເຖື່ອນໄດ້ຢ່າງເຂັ້ມງວດ. ໂດຍຜ່ານມາດຕະການຕ່າງໆຄື: ​ມອບ​ໃຫ້​ກະຊວງ​ປ້ອງ​ກັນ​ຄວາມ​ສະຫງົບສົມທົບ​ກັບ​ພາກສ່ວນ​​ກ່ຽວຂ້ອງ​ລົງ​ເກັບ​ກຳ​ຂໍ້​ມູນ ​ແລະ ​ແກ້​ໄຂ​ໂດຍ​ດ່ວນ​ການ​ຫລິ້ນ​ເກ​ມອອນ​ລາຍ, ການ​ທວາຍ​ຜົນ​ບານ​ເຕະ​ ທີ່​ຕິດ​ພັນ​ກັບ​ການ​ພະນັນ​ຢູ່​ແຕ່ລະ​ເປົ້າໝາຍ ແລະ ມີ​ມາດ​ຕະການ​ເດັດຂາດ​ຕໍ່​ການຈຳໜ່າຍ​ຫວຍ​ເຖື່ອນ​ຕ່າງໆ​ທັງ​ຢູ່​ພາຍ​ໃນ ​ແລະ ນຳ​ມາ​ຈາກ​ຕ່າງປະ​ເທດ ແລະ ຜ່ານການປະຕິບັດມາເປັນຫລາຍຄັ້ງ​ສາມາດ​ຍຶດ​​ປຶ້ມ​ເລກ​ຈົດ​ຂາຍ, ​ໃບ​ໂປ້​ເລກ ​ແລະ ​ເຄື່ອງ​ຂາຍ​ຫວຍ​ທີ່​ບໍ່​ຖືກຕ້ອງ​ຢູ່​ໃນ​ນະຄອນຫລວງ​ວຽງ​ຈັນ​ຄື: ປຶ້ມ​ຈົດ​ຂາຍເລກ 140 ຫົວ, ​ໃບ​ໂປ້​ເລກ 56 ​ໃບ, ​ເຄື່ອງ​ຂາຍ​ຫວຍ (ນອກ​ລະບົບ) 11 ​ເຄື່ອງ, ພ້ອມທັງໄດ້​ເຮັດ​ບົດ​ບັນທຶກ​ຕັກ​ເຕືອນ​ ​ຜູ້​​ກະທຳຜິດ​ຈຳນວນ 17 ຄົນ.

ການ​ແກ້​ໄຂ​ປາກົດການ​ຂາຍ​ຫວຍ​ເຖື່ອນ​ແມ່ນ​ວຽກ​ງານ​ໜຶ່ງ​ທີ່ຕິດ​ພັນ​ກັບ​ຫລາຍ​ພາກສ່ວນ. ດັ່ງນັ້ນ ຈຶ່ງ​ຮຽກຮ້ອງ​ມາ​ຍັງ​ອຳນາດ​ການ​ປົກຄອງທ້ອງ​ຖິ່ນ​ແຕ່ລະ​ຂັ້ນ ​ແລະ ສະພາ​ແຫ່ງ​ຊາດ​ປະຈຳ​ຢູ່​ແຕ່ລະ​ເຂດ​ເປັນ​ເຈົ້າການ​ຕິດຕາມ ​ແລະ ກວດກາ​ຢ່າງ​ໃກ້ຊິດ, ເພື່ອຊ່ວຍ​​ແກ້​ໄຂ​ການ​ຂາຍ​ຫວຍເຖື່ອນໃຫ້​ໝົດໄປ.

- Wave100S AD to Website 2020 0 - ລັດຖະບານເອົາໃຈໃສ່ຕ້ານການຂາຍຫວຍເຖື່ອນ
- WhatsApp Image 2020 05 27 at 5 - ລັດຖະບານເອົາໃຈໃສ່ຕ້ານການຂາຍຫວຍເຖື່ອນ
- WhatsApp Image 2020 05 27 at 5 - ລັດຖະບານເອົາໃຈໃສ່ຕ້ານການຂາຍຫວຍເຖື່ອນ
error: Alert: ເນື້ອຫາຂ່າວມີລິຂະສິດ !!