ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ

- 38025469 1296652390478509 3697725885600759808 n - ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ
- Untitled design - ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ

ແຫລ່ງຂ່າວ ຂປລ ລາຍງານໃຫ້ຮູ້ວ່າ: ​ໃນ​ຂະນະ​ທີ່ປະຊາຊົນ​ລາວຢູ່​ເມືອງ​ສະໜາມ​ໄຊແຂວງ​ອັດ​ຕະປື ​ໄດ້​ຮັບ​ຜົນ​ກະທົບ​ຈາກໄພພິບັດນ້ຳ​ຖ້ວມຈາກອຸປະຕິ​ເຫດ​ເຂື່ອນ​ເຊ​ປຽນ-​ເຊ​ນ້ຳ​ນ້ອຍແຕກເມື່ອວັນທີ 23 ກໍລະກົດຜ່ານມາ, ບັນດາ​ສື່ຂອງ​ຕ່າງປະ​ເທດຫລາຍ​ສຳນັກໄດ້​ລາຍ​ງານກ່ຽວກັບສະພາບ​ການ​ ລວມທັງ​ການສະໜັບໜູນຊ່ວຍ​ເຫລືອ​ບັນ​ເທົາ​ທຸກຈາກ​ບັນດາປະ​ເທດ​ເພື່ອນ​ມິດ​ຢ່າງໃກ້ຊິດ ແລະ ຕໍ່ເນື່ອງ ເຊັ່ນ: ສຳນັກ​ຂ່າວຢອນຮັບ (Yonhap) ສ ເກົາຫລີ ລາຍ​ງານ​ວ່າ: ໃນວັນທີ 27 ກໍລະກົດນີ້, ປະທານກຸ່ມບໍລິສັດ ວິສະວະກໍາກໍ່ສ້າງ SK ຂອງ ສ. ເກົາຫລີ, ເຊິ່ງເປັນບໍລິສັດຮ່ວມລົງທຶນໂຄງການກໍ່ສ້າງໄຟຟ້າພະລັງນໍ້າເຊປຽນ-ເຊນໍ້ານ້ອຍໄດ້ໃຫ້ຄໍາໝັ້ນສັນຍາຈະໃຫ້ເງິນຊ່ວຍເຫລືອບັນເທົາທຸກຈໍານວນ 10 ລ້ານໂດລາສະຫະລັດແກ່ ສປປ ລາວ, ໂດຍ ຄໍາປະກາດການຊ່ວຍເຫລືອດັ່ງກ່າວມີຂຶ້ນໃນໂອກາດພົບປະກັບເອກອັກຄະລັດຖະທູດແຫ່ງ ສປປ ລາວ ປະຈໍາ ສ.ເກົາຫລີ. ໃນຕອນເຊົ້າຂອງວັນດຽວກັນ, ກຸ່ມບໍລິສັດດັ່ງກ່າວກໍໄດ້ສົ່ງພະນັກງານຂອງຕົນຈໍານວນ 18 ຄົນ ມາຊ່ວຍເຫລືອໄພພິບັດຢູ່ ສປປ ລາວ ແລະ ຈະມີແຜນຈະສົ່ງທີມງານຊ່ວຍເຫລືອອີກຈໍານວນ 30 ຄົນມາລາວຕື່ມໃນວັນທີ 30 ກໍລະກົດນີ້.

ນອກນັ້ນ, ລັດຖະບານ ສ.ເກົາຫລີ ໄດ້ເຫັນດີຈະໃຫ້ການຊ່ວຍເຫລືອສຸກເສີນແກ່ ສປປ ລາວ ຈໍານວນ 1 ລ້ານໂດລາສະຫະລັດ, ​ເປັນເງິນສົດ 500.000 ໂດລາສະຫະລັດ ແລະ ເຄື່ອງຊ່ວຍເຫລືອມູນຄ່າ 500.000 ໂດລາສະຫະລັດ, ພ້ອມທັງຈະສົ່ງຄະນະທີມງານບັນເທົາທຸກໄພພິບັດດ້ານ ການແພດຈໍານວນ 20 ຄົນເຂົ້າມາ ສປປ ລາວ ຕື່ມອີກໃນທ້າຍອາທິດນີ້. ເຄື່ອງຊ່ວຍເຫລືອດັ່ງກ່າວ, ຈະຖືກນໍາສົ່ງໂດຍເຮືອບິນຂອງທະຫານ ສ ເກົາຫລີ. ໃນຂະນະດຽວກັນ, ບໍລິສັດສາຍການບິນເກົາຫລີ (Korean Air Lines) ໄດ້ປະກາດວ່າ: ບໍລິສັດຂອງຕົນໄດ້ສົ່ງນໍ້າດື່ມຈໍານວນ 36.000 ລິດ ແລະ ຜ້າຫົ່ມຈໍານວນ 2.000 ຜືນໄປນະຄອນດານັງຂອງຫວຽດນາມ ເພື່ອນໍາເຂົ້າມາຊ່ວຍເຫລືອ​ແກ່​ປະຊາຊົນ​ຜູ້​ປະສົບໄພພິບັດຢູ່ແຂວງອັດຕະປື.

ສ່ວນສຳນັກ​ຂ່າວ ສະເຕຣຕ ທາມ (Straits Times) ຂອງ​ສິງກະ​ໂປ​ລາຍ​ງານ​ວ່າ: ເຮືອບິນຂົນເຄື່ອງຊ່ວຍເຫລືອຂອງກອງກໍາລັງທະຫານອາກາດສິງກະໂປ (RSAF) C-130 ລໍາທີ 2 ໄດ້ມາເຖິງນະຄອນຫລວງວຽງຈັນ ໃນວັນທີ 27 ກໍລະກົດນີ້, ພ້ອມ​ທັງໄດ້ນໍາ​ເອົາໜ່ວຍກໍາລັງຊ່ວຍເຫລືອໄພພິບັດ ຈາກກອງກໍາລັງທະຫານ ແລະ ກອງກໍາລັງປ້ອງກັນພົນລະເຮືອນສິງກະໂປ ຈໍານວນ 19 ຄົນ ແລະ ເຄື່ອງຊ່ວຍເຫລືອ ເຊິ່ງປະກອບມີ: ເຕັ້ນ, ຜະລິດຕະພັນອາຫານ, ນໍ້າດື່ມ, ອຸປະກອນການແພດ ແລະ ເຮືອຢາງຊູຊີບ, ພ້ອມດ້ວຍເຄື່ອງຈັກຕິດຫາງເຮືອຈໍານວນ 5 ລໍາ. ໃນຕອນຄໍ່າຂອງວັນທີ 26 ກໍລະກົດ, ເຮືອບິນ C-130 ລໍາທີ 1 ກໍໄດ້ຂົນເຄື່ອງບັນເທົາທຸກມາເຖິງ ສປປ ລາວ ພ້ອມກັບໜ່ວຍກໍາລັງຊ່ວຍເຫລືອ 19 ຄົນ. ເຄື່ອງຊ່ວຍເຫລືອມະນຸດສະທໍາທີ່ເຮືອບິນທັງສອງລໍາຂອງສິງກະໂປທີ່ນໍາມາຊ່ວຍເຫລືອໄພພິບັດຢູ່ ສປປ ລາວ ຄັ້ງນີ້ ມີມູນຄ່າປະມານ 280.000 ໂດລາສະຫະລັດ.

- Wave100S AD to Website 2020 0 - ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ

ສ່ວນສຳນັກຂ່າວ ຣີໄລຟເວບ (Reliefweb) ລາຍງານວ່າ: ໃນວັນທີ 26 ກໍລະກົດຜ່ານມາ, ສະຫະພັນກາແດງ ແລະ ຊີກວົງເດືອນແດງສາກົນ (IFRC) ໄດ້ລະດົມເງິນຊ່ວຍເຫລືອສຸກເສີນປະມານ 2,9 ລ້ານຟຣັງ (ສະ ກຸນເງິນຂອງສະວິດ ແລະ ໄດ້ຈັດສັນເງິນຈາກກອງທຶນບັນເທົາທຸກສຸກເສີນ ຈໍານວນ 4 ແສນຟຣັງ ເພື່ອສະໜັບສະໜູນອົງການກາແດງລາວໄປຊ່ວຍເຫລືອປະຊາຊົນລາວທີ່ໄດ້ຮັບຜົນກະທົບຈາກໄພພິບັດເປັນເວລາ 18 ເດືອນ. ການດໍາເນີນການຊ່ວຍເຫລືອຈະສຸມໃສ່ພື້ນທີ່ສໍາຄັນຕ່າງໆເປັນຕົ້ນ: ບ່ອນພັກອາໄສ, ການດໍາລົງຊີວິດ ແລະ ບັນດາຄວາມຕ້ອງການພື້ນຖານ, ສຸຂະພາບ, ນໍ້າດື່ມ-ນໍ້າໃຊ້ ແລະ ອື່ນໆ.

- WhatsApp Image 2020 05 27 at 5 - ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ
- WhatsApp Image 2020 05 27 at 5 - ສື່​ຕ່າງປະເທດລາຍ​ງານການຊ່ວຍເຫລືອໄພພິບັດນໍ້າຖ້ວມຢູ່ລາວຢ່າງໃກ້ຊິດ
error: Alert: ເນື້ອຫາຂ່າວມີລິຂະສິດ !!