ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ

- 38011844 276524669817932 4903995299250307072 n - ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ
- Untitled design - ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ

​          ແຫ​ລ່ງຂ່າວ​ທ້ອງ​ຖິ່ນ​ໃຫ້​ຮູ້​ວ່າ: ​ເນື່ອງ​ຈາກ​ມີ​ສະພາບ​ຝົນຕົກ​ໜັກ​ແກ່ຍາວ​ມາ​ຫລາຍ​ວັນ​ນັບ​ແຕ່​ຕົ້ນ ​ເດືອນ​ກໍລະກົດ​ເປັນຕົ້ນມາ, ​ໄດ້​ສົ່ງ​ຜົນ​ໃຫ້​ແມ່ນ້ຳ ​ແລະ ຫ້ວຍຮ່ອງ​ຄອງ​ບຶງ​ຕ່າງໆ ​ໃນ​ທ້ອງ​ຖິ່ນ​ຍິ່ງ​ສູງ​ຂຶ້ນ, ​ເຊິ່ງບໍ່​ພຽງ​ແຕ່​ບັນດາ​ເມືອງ​ທີ່ຢູ່​ລຽບ​ຕາມ​ແຄມ​ແມ່ນ້ຳ​ໃຫຍ່​ເທົ່ານັ້ນ, ຍັງ​ສົ່ງ​ຜົນ​ໃຫ້​ບັນດາ​ບ້ານ ​ແລະ ​ເມືອງ​ໃນ​ເຂດ​ພູດ​ອຍກໍ​ໄດ້​ຮັບ​ຜົນ​ກະທົບ​ໜັກ​ເຊັ່ນ​ກັນ​ດັ່ງ​ເມືອງ​ວິລະ​ບູລີ​ມີ 13 ບ້ານ​ຖືກ​ນ້ຳຖ້ວມ ສົ່ງ​ຜົນ​ໃຫ້​ປະຊາຊົນ​ຫລາຍ​ກວ່າ 6.700 ຄົນ​ໃນ 1.200 ຄອບຄົວ ພົບ​ຄວາມ​ຫຍຸ້ງຍາກ ​ແລະ ຂາດທີ່​ພັກ​ອາ​ໄສ, ຂາດ​ນ້ຳດື່ມ​ສະອາດ ​ແລະ ​ເຂົ້າປາ​ອາຫານ​ທີ່​ຈຳ​ເປັນ​ເພາະ​ນ້ຳຖ້ວມ​ດັ່ງກ່າວ​ໄດ້​ແກ່ຍາວ​ມາ ​ແຕ່​ວັນ​ທີ 20 ກໍລະກົດ​ນີ້, ຄາດ​ວ່າ​ເນື້ອທີ່​ນາປີ​ປະມານ 500 ກວ່າ​ເຮັກຕາ​ຈະ​ຖືກ​ເສຍ​ຫາຍ, ຜົນລະປູກ​ຕ່າງໆ ປະມານ 10 ​ເຮັກຕາ, ໜອງ​ປາ 300 ກວ່າ​ໜອງ​ໄດ້​ຮັບ​ຄວາມ​ເສຍ​ຫາຍ, ພ້ອມ​ນັ້ນຍັງ​ສົ່ງ​ຜົນ​ໃຫ້​ເສັ້ນທາງ 28 A ຈາກ​ເຊ​​ໂປ​ນຫາ​ເມືອງ​ວິລະ​ບູລີ​ຖືກ​ນ້ຳ​ເຊາະ​ເຈ່ືອນ 10 ຈຸດ, ຂົວ ​ແລະ ທໍ່​ລະບາຍ​ນ້ຳກວ່າ 60 ຈຸດ​ເປ່​ເພ​ເສຍ​ຫາຍ​ເຮັດ​ໃຫ້ການ​ສັນຈອນ​ໄປມາ​ພົບ​ຄວາມ​ຫຍຸ້ງຍາກ, ຫລາຍ​ຈຸດ​ຕ້ອງ​ໃຊ້​ເຮືອ​ເປັນ​ພາຫະນະ​ໃນ​ການ​ໄປມາຫາສູ່​ກັນ.

​          ໃນນັ້ນຮ້າຍ​ແຮງ​ກວ່າ​ໝູ່​​ແມ່ນ​ບ້ານ​ປ່າ​ຜັກ​ເໝົ່າມີ​ປະຊາຊົນ 100 ກວ່າ​ຄອບຄົວ​ພົບ​ກັບ​ຄວາມ​ຫຍຸ້ງຍາກ​ເປັນ​ທີ່​ສຸດ​ການ​ໄປມາຫາສູ່​ຖືກ​ຕັດຂາດ​ບໍ່​ສາມາດ​ເຂົ້າ​ເຖິງ​ໄຟຟ້າ ​ແລະ ນ້ຳສະອາດ​ຄື​ໃນ​ວັນ​ທີ 27 ກໍລະກົດ​ຜ່ານ​ມາ, ທ່ານ​ເຈົ້າ​ແຂວງ​ສັນຕິພາບ ພົມວິຫານ ກໍ​ໄດ້​ສົ່ງ​ໄປ​ກວດກາ​ໃຫ້​ກຳລັງ​ໃຈ​ແກ່ ປະຊາຊົນ​ໃນ​ເຂດ​ດັ່ງກ່າວ ​ແລະ ​ໄດ້​ນຳ​ເອົາ​ນ້ຳດື່ມ, ອາຫານ, ຢາ​ປົວ​ພະຍາດ ​ແລະ ​ເຄື່ອງ​ອຸປະ​ໂພກອື່ນໆ​ລົງ​ໄປ, ຊ່ວຍ​ເຫລືອ​ປະຊາຊົນ​ຜູ້​ປະສົບ​ໄພ​ທຳ​ມະ​ຊາດ​ໃນ​ເມືອງ​ດັ່ງກ່າວ​ຂ່າວ​ໃຫ້​ຮູ້​ອີກ​ວ່າ: ​ໃນ​ວັນ​ທີ 28 ຜ່ານ​ມາ​ນີ້, ​ແມ່ນ​ຮອງ​ເຈົ້າ​ແຂວງ​ສະຫວັນ​ນະ​ເຂດ ທ່ານ ທ່ອນແກ້ວ ພຸດທະໄກຍະ​ລາດ ກໍ​ໄດ້​ນຳ​ເອົາ​ເຄື່ອງ​ຊ່ວຍ​ເຫລືອ​ຈຳນວນ​ໜຶ່ງ​ໄປ​ມອບ​ໃຫ້​ປະຊາຊົນ​ຜູ້​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳຖ້ວມ​ຢູ່​ເມືອງ​ຈຳພອນ, ​ເຊິ່ງປະກອບ​ມີ​ໝີ່​ສຳ​ເລັດ​ຮູບ, ນ້ຳດື່ມ ​ແລະ ​ເຄື່ອງ​ໃຊ້​ທີ່​ຈຳ​ເປ​ັນອື່ນໆ.

ພ້ອມ​ຮຽກຮ້ອງ​ໃຫ້​ປະຊາຊົນ​ຜູ້​ອາ​ໄສ​ຢູ່​ເຂດ​ແຄມ​ແມ່ນ້ຳ​ເຊ​ຈຳ​ພອນ, ​ເຊ​ຊຳ​ຊອຍ ​ແລະ ​ເຊບັ້ງ​ໄຟ ຈຶ່ງ​ມີ​ສະຕິ​ກຽມ​ຮັບ​ມື​ກັບ​ສະພາບ​ນ້ຳຖ້ວມ​ທີ່​ອາດ​ຈະ​ເກີດ​ຂຶ້ນ​ເພາະ​ປັດຈຸບັນ​ຍ້ອນ​ຝົນ​ຍັງ​ສືບ​ຕໍ່​ຕົກລົງ​ມາ​ສົ່ງ​ຜົນ​ໃຫ້​ແມ່ນ້ຳດັ່ງກ່າວ​ຍິງສູງ​ຂຶ້ນ​ເຖິງ​ຂີດ​ອັນຕະລາຍ​ແລ້ວ.

ດັ່ງນັ້ນຈິ່ງ​ໄດ້​ນຳ​ເອົາ​ສັດລ້ຽງ, ວັດຖຸ​ສິ່ງ​ຂອງ​ມີຄ່າ​ຜູ້​ອາຍຸ​ສູງ ​ແລະ ​ແມ່ຍິງ​ເດັກນ້ອຍ​ໄປ​ບ່ອນ​ປອດ​ໄພ.

- Wave100S AD to Website 2020 0 - ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ
- WhatsApp Image 2020 05 27 at 5 - ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ
- WhatsApp Image 2020 05 27 at 5 - ແຂວງ​ສະຫວັນ​ນະ​ເຂດ​ໄດ້​ຮັບ​ຜົນ​ກະທົບ​ໜັກ​ຈາກ​ໄພ​ນ້ຳຖ້ວມ
error: Alert: ເນື້ອຫາຂ່າວມີລິຂະສິດ !!