ຫຼາຍພາກສ່ວນຈາກກະຊວງປ້ອງກັນປະເທດສືບຕໍ່ຊ່ວຍເຫຼືອຜູ້ປະສົບໄພນໍ້າຖ້ວມ ຢູ່ແຂວງອັດຕະປຶ ແລະ ແຂວງອື່ນໆ

ໃນວັນທີ 30 ກໍລະກົດນີ້, ພາກສ່ວນຕ່າງໆຈາກກະຊວງປ້ອງກັນປະເທດ, ໄດ້ນໍາເອົາວັດຖຸປັດໃຈຕ່າງໆມາປະກອບສ່ວນ ຊ່ວຍເຫຼືອຜູ້ປະສົບເຄາະຮ້າຍຈາກໄພພິບັດທໍາມະຊາດ ຢູ່ບັນດາແຂວງພາກເໜືອນ, ພາກກາງ ແລະ ພາກໃຕ້ຂອງລາວ ໂດຍສະເພາະແມ່ນແຂວງ ອັດຕະປື ທີ່ໄດ້ຮັບຜົນກະທົບໜັກຈາກໂຄງການເຂື່ອນເຊປຽນ-ເຊນໍ້ານ້ອຍທະລຸ ເມື່ອໃນວັນທີ 23 ຜ່ານມາ, ລວມມູນຄ່າທັງໝົດ 217 ລ້ານກວ່າກີບ, ໃນນັ້ນ, ກອງພົນທະຫານຮາບທີ 2 ມີ 80 ລ້ານກີບ, ກອງພົນທະຫານຮາບທີ 4 ມີ 50 ລ້ານກີບ, ຂະແໜງການເງິນໂຮງໝໍ 106 ມີ 21 ລ້ານກວ່າກີບ, ວິທະຍາຄານພະລາທິການກອງທັບ ມີ 10 ລ້ານກີບ ແລະ ພະແນກການເມືອງກອງພັນໃຫ່ຍ 641 ມີຫຼາຍກວ່າ 56 ລ້ານກວ່າກີບ, ຊຶ່ງພິທີມອບ-ຮັບໄດ້ຈັດຂຶ້ນຢູ່ກະຊວງດັ່ງກ່າວ ຊຶ່ງຕາງໜ້າຮັບໂດຍທ່ານ ພົນຈັດຕະວາ ສີທາ ດວງມາລາ ຫົວໜ້າກົມນະໂຍບາຍກົມໃຫ່ຍການເມືອງກອງທັບ ແລະ ໄດ້ກ່າວສະແດງຄວາມຂອບໃຈຕໍ່ການຊ່ວຍເຫຼືອຜູ້ປະສົບໄພຄັ້ງນີ້ ແລະ ໃຫ້ຄໍາໝັ້ນສັນຍາວ່າຈະນໍາເອົາວັດຖຸປັດໃຈດັ່ງກ່າວໄປມອບໃຫ້ປະຊາຊົນທີ່ຖືກໄພນໍ້າຖ້ວມໃນທົ່ວປະເທດ ໂດຍຈະມອບໃຫ້ອົງການກ່ຽວຂ້ອງ, ອໍານາດການປົກຄອງທ້ອງຖິ່ນໄປຊ່ວຍເຫຼືອ ປະຊາຊົນຜູ້ທີ່ຖືກຜົນກະທົບ ຈາກໄພທໍາມະຊາດຄັ້ງນີ້ໄດ້ທົ່ວເຖິງ.