ຊາວມຽນມາ 1,2 ແສນຄົນ ຕ້ອງອົບພະຍົບໜີນ້ຳຖ້ວມ

- advert banner 728 90 728x90 - ຊາວມຽນມາ 1,2 ແສນຄົນ ຕ້ອງອົບພະຍົບໜີນ້ຳຖ້ວມ

ສະຖານະ​ການ​ອຸ​ທົກ​ກະ​ໄພ​ຂອງ​ມຽນມາ​ໃນ​ປີ​ນີ້​ຍັງ​ຢູ່​ໃນ​ຂັ້ນວິ​ກິດ ຈຳນວນ​ຜູ້​ເສຍ​ຊີວິດ​ເພີ່ມ​ເປັນ​ຢ່າງ​ໜ້ອຍ 11 ຄົນ ​ແລະ ອີກ​ເກືອບ 120.000 ຄົນ​ຕ້ອງ​ອົບ​ພະຍົບ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ກະຊວງ​ສະຫວັດດີ​ການ​ສັງຄົມ​ຂອງ​ມຽນມາ ລາຍ​ງານ​ວ່າ: ປະຊາຊົນ​ຫລາຍ​ກວ່າ 118.000 ຄົນ ​ເຊິ່ງອາ​ໄສ​ຢູ່​ຕາມ​ພື້ນທີ່​ຕໍ່າ​ສອງ​ຝັ່ງ​ແມ່ນ້ຳອີ​ລາ​ວະ​ດີ, ​ແມ່ນ​ນ້ຳສາລະ​ວິນ ​ແລະ ​ແມ່ນ້ຳສາຂາ​ອີກ​ຫລາຍ​ສາຍ ອົບ​ພະຍົບອອກ​ຈາກ​ເຮືອນ​ໄປອາ​ໄສ​ຢູ່​ຕາມ​ສູນ​ພັກ​ເຊົາ​ຊົ່ວຄາວ 285 ​ແຫ່ງ​ທີ່​ທາງ​ການຈັດ​ກຽມ​ໄວ້​ໃຫ້ ​ໂດຍ​ສະ​ເພາະ​ໃນ​ເຂດ​ພະ​ໂຄ ​ແລະ ລັດ​ກະ​ຫລຽງ ​ເຊິ່ງ​ເປັນ​ບໍລິ​ເວນ​ໄດ້​ຮັບ​ຄວາມ​ເສຍ​ຫາຍ​ຫລາຍ​ທີ່​ສຸດ ​ເນື່ອງ​ຈາກ​ລະດັບ​ນ້ຳ​ໃນ​ແມ່ນ້ຳລົ້ນຕາ​ຝັ່ງ​ໄຫລ​ເຂົ້າຖ້ວມ​ເຮືອນ​ປະຊາຊົນ​ຢ່າງ​ຕໍ່​ເນື່ອງ.

ສຳລັບ​ຈຳນວນ​ຜູ້​ເສຍ​ຊີວິດ​ຈາກ​ອຸ​ທົກ​ກະ​ໄພ​ຄັ້ງນີ້​ເພີ່ມ​ເປັນ​ຢ່າງ​ໜ້ອຍ 11 ຄົນ ​ໃນ​ຈຳນວນ​ນີ້ 3 ຄົນ​ເປັນ​ທະຫານ. ໜັງສືພິມ​ໂກລບອລນິວ ​ໄລ ອອຟ ມຽນມາ ​ເຊິ່ງ​ເປັນ​ສື່​ພາສາ​ອັງກິດ​ກະບອກ​ສຽງ​ຂອງ​ລັດຖະບານ ລາຍ​ງານ​ເພີ່ມ​ອີກ​ວ່າ: ໜ່ວຍ​ງານ​ທີ່​ກ່ຽວຂ້ອງ​ກຳລັງ​ເຝົ້າຕິດຕາມ​ລະດັບ​ນ້ຳ​ໃນ​ເຂື່ອນ ​ແລະ ອ່າງ​ເກັບ​ນ້ຳປະມານ 36 ​ແຫ່ງ ​ເຊິ່ງສູງ​ຂຶ້ນຈົນ​ເຂົ້າສູ່ “ລະ​ດັບ​ອັນຕະລາຍ” ​ແລ້ວ.

ທັງ​ນີ້, ດັດຊະນີ​ຄວາມ​ສ່ຽງ​ສະພາບ​ອາກາດ​ໂລກ​ເຄີຍ​ຈັດ​ໃຫ້​ມຽນມາ​ເປັນອັນ​ດັບ 1 ຂອງ​ປະ​ເທດ​ໄດ້​ຮັບ​ຜົນ​ກະທົບ​ຈາກ​ໄພ​ທຳ​ມະ​ຊາດ​ຫລາຍ​ທີ່​ສຸດ ​ໃນ​ປີ 2015. ຂະນະ​ທີ່​ໄພ​ທຳ​ມະ​ຊາດ​ຄັ້ງຮ້າຍ​ແຮງ​ທີ່​ສຸດ​ໃນ​ປະຫວັດສາດ​ຂອງ​ມຽນມາ ຄື​ອິດ​ທິພົນ​ຈາກ​ອາຍຸ​ໄຊ​ໂຄນ​ນາ​ກິດ ​ໃນ​ເດືອນ​ພຶດສະພາ 2008 ມີ​ຜູ້​ເສຍ​ຊີວິດ​ຢ່າງ​ໜ້ອຍ 138.000 ຄົນ.

error: Content is protected !!