ອົງການສາກົນຕ່າງໆໃຫ້ການຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງອັດຕະປື

- International Oganization - ອົງການສາກົນຕ່າງໆໃຫ້ການຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງອັດຕະປື
- 174233 - ອົງການສາກົນຕ່າງໆໃຫ້ການຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງອັດຕະປື

ພາຍຫລັງເກີດເຫດເຂື່ອນເຊປຽນ-ເຊນໍ້ານ້ອຍ ທີ່ພວມຢູ່ລະຫວ່າງການກໍ່ສ້າງຢູ່ເມືອງສະໜາມໄຊແຂວງອັດຕະປືໄດ້ທະລຸໃນຕອນແລງວັນທີ 23 ກໍລະກົດຜ່ານມາ, ໄດ້ສ້າງຄວາມເສຍຫາຍຢ່າງຫລວງຫລາຍຕໍ່ຊີວິດ ແລະ ຊັບສີນຂອງປະຊາຊົນທີ່ຢູ່ລຸ່ມເຂື່ອນ, ຕໍ່ເຫດການທີ່ບໍ່ເພີ່ງປາດຖະນາດັ່ງກ່າວກໍ່ມີປະຊາຊົນຜູ້ມີນໍ້າໃຈນັບທັງພາຍໃນ, ຕ່າງປະເທດ ແລະ ອົງການຈັດຕັ້ງສາກົນຕ່າງໆ ກໍໄດ້ໃຫ້ການຊ່ວຍເຫລືອຢ່າງຮີບດ່ວນດ້ວຍການບໍລິຈາກເງິນ, ເຄື່ອງນຸ່ງຫົ່ມ, ວັດຖຸສິ່ງຂອງ ແລະ ເຄື່ອງບໍລິໂພກ-ອຸປະໂພກທີ່ຈໍາເປັນຕ່າງໆຢ່າງລຽນຕິດ ແລະ ໃນວັນທີ 27 ກໍລະກົດຜ່ານມານີ້, ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໄດ້ຕາງໜ້າໃຫ້ລັດຖະບານຮັບເອົາການຊ່ວຍເຫລືອເບື້ອງຕົ້ນຈາກອົງການສະຫະປະຊາຊາດເພື່ອການພັດທະນາ  (UNDP) ເປັນເງິນສົດ 1 ແສນໂດລາສະຫະລັດ, ເຊິ່ງມອບໂດຍທ່ານ ບາລາຊູ ບຣາມເນມ ມູຣາລີ (Mr. Balasu bramanam Murali) ຮອງຜູ້ຕາງໜ້າອົງການ UNDP ປະຈຳລາວ, ເພື່ອຊ່ວຍເຫລືອປະຊາຊົນຜູ້ໄດ້ຮັບຜົນກະທົບຈາກໄພພິບັດດັ່ງກ່າວ. ໃນໂອກາດນີ້, ຜູ້ຕາງໜ້າອົງການສະຫະປະຊາຊາດປະຈໍາລາວ ຍັງໄດ້ຢືນຢັນທີ່ຈະຮ່ວມມືກັບອົງການເຄືອຂ່າຍຂອງ ສປຊ ເພື່ອສືບຕໍ່ຊ່ວຍເຫລືອ ແລະ ສະໜັບສະໜູນລັດຖະບານລາວ ໃນການຟື້ນຟູຜົນກະທົບຈາກໄພພິບັດ ແລະ ການພັດທະນາປະເທດໃນຕໍ່ໜ້າ. ພ້ອມນີ້, ທ່ານ ອາຊີມ ສຕາຍເນີ (Achim Steiner) ຜູ້ບໍລິຫານອົງການ UNDP ປະຈຳຫ້ອງການໃຫຍ່ທີ່ນິວຢອກ ສະຫະລັດອາເມລິກາ ກໍໄດ້ສົ່ງສານສະແດງຄວາມສະຫລົດໃຈເຖິງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ຊຶ່ງມີເນື້ອໃນຢ່າງສຸດຊຶ້ງຮ່ວມກັບລັດຖະບານ ແລະ ປະຊາຊົນລາວ, ໂດຍສະເພາະຄອບຄົວຜູ້ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຄັ້ງຮ້າຍແຮງນີ້ ແລະ ໃນໂອກາດນີ້, ທ່ານ ທອງຜ່ານ ສະຫວັນເພັດ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ອົງການ UNDP ທີ່ໄດ້ປະກອບສ່ວນຊ່ວຍເຫລືອຄັ້ງນີ້, ພ້ອມທັງສະເໜີໃຫ້ອົງການດັ່ງກ່າວ ຊ່ວຍເປັນໃຈກາງໃນການປະສານງານຮັບເອົາການຊ່ວຍເຫລືອຈາກອົງການເຄືອຂ່າຍ ສປຊ, ອົງການຈັດຕັ້ງສາກົນ ແລະ ຜູ້ໃຫ້ທຶນອື່ນໆ.

ໃນວັນທີ 31 ກໍລະກົດນີ້, ຄະນະກຳມະການສະຫະພາບເອີຣົບ (EU) ໄດ້ສະໜອງທຶນຊ່ວຍເຫລືອຈຳນວນ 200.000 ເອີໂຣ ຫລືປະມານ 1,9 ຕື້ກີບ ເພື່ອຊ່ວຍເຫລືອສຸກເສີນປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຢູ່ເມືອງສະໜາມໄຊແຂວງອັດຕະປື, ໂດຍຜ່ານອົງການກາແດງສາກົນເພື່ອຈະຊ່ວຍເຫລືອໃນສິ່ງທີ່ຮີບດ່ວນຈຳເປັນ, ເປັນຕົ້ນແມ່ນທີ່ພັກອາໄສ, ອຸປະກອນສຸຂະອານາໄມ, ອຸປະກອນສ້ອມແປງເຮືອນ ແລະ ນ້ຳສະອາດ, ຊຶ່ງງົບປະມານຊ່ວຍເຫລືອດັ່ງກ່າວໄດ້ມາຈາກໜ່ວຍງານຊ່ວຍເຫລືອມະນຸດສະທຳ ແລະ ປ້ອງກັນພົນລະເຮືອນຂອງຄະນະກຳມະການເອີຣົບ ແລະ ນີ້ແມ່ນໄພນໍ້າຖ້ວມຄັ້ງຮ້າຍແຮງທີ່ສຸດໃນປະເທດລາວ ທີ່ຈະສົ່ງຜົນກະທົບຕໍ່ເສດຖະກິດ-ສັງຄົມໃນໄລຍະຍາວ. ການຊ່ວຍເຫລືອນີ້, ແມ່ນການສະແດງໃຫ້ເຫັນຄວາມສາມັກຄີລະຫວ່າງປະເທດເອີຣົບຕໍ່ປະເທດທີ່ຕ້ອງການຄວາມຊ່ວຍເຫລືອເພື່ອຊ່ວຍຊີວິດ, ຫລຸດຜ່ອນຄວາມທຸກ ແລະ ຄວາມເປັນມະນຸດຂອງປະຊາຊົນທີ່ຖືກຜົນກະທົບຈາກໄພພິບັດທີ່ເກີດຂື້ນຈາກປະກົດການທາງທໍາມະຊາດ ແລະ ອຸປະຕິເຫດຈາກຄວາມຜິດພາດຂອງມະນຸດ.

- Wave100S AD to Website 2020 0 - ອົງການສາກົນຕ່າງໆໃຫ້ການຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງອັດຕະປື
- WhatsApp Image 2020 05 27 at 5 - ອົງການສາກົນຕ່າງໆໃຫ້ການຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງອັດຕະປື
error: Alert: ເນື້ອຫາຂ່າວມີລິຂະສິດ !!