ອັງກິດ ຂໍຈັດບານໂລກ 2030
ສະມາຄົມບານເຕະອັງກິດ (ເອັຟເອ) ເປີດເຜີຍກຳລັງພິຈາລະນາເລື່ອງການສະເໜີຕົວຂໍເປັນເຈົ້າພາບບານໂລກ 2030 ໂດຍລະຫວ່າງນີ້ທຸກຢ່າງຍັງຢູ່ໃນຂັ້ນຕອນຂອງການກຽມວຽກ.
ສຳລັບການແຂ່ງຂັນຫລ້າສຸດທີ່ຈັດຂຶ້ນໃນອັງກິດຄື ຢູໂຣ 1996 ແລະ ຖ້າພວກເຂົາປະສົບຜົນສຳເລັດໃນການຂໍເປັນເຈົ້າພາບບານໂລກ 2030 ກໍຈະເປັນຄັ້ງທີ 2 ໃນປະຫວັດສາດທີ່ການແຂ່ງຂັນບານໂລກຖືກຈັດຂຶ້ນໃນອັງກິດ ທີ່ເຄີຍເປັນເຈົ້າພາບມາແລ້ວຄັ້ງໜຶ່ງໃນບານໂລກ 1966 ທີ່ພວກເຂົາຄວ້າແຊ້ມໂລກມາຄອງໄດ້ເປັນຄັ້ງທຳອິດ ແລະ ຄັ້ງດຽວຈົນຮອດປັດຈຸບັນ.
ທັງນີ້ນອກຈາກອັງກິດແລ້ວ, ອາເຈນຕິນາ, ປາຣາໄກວ ແລະ ອຸຣຸໄກວ ກໍວາງແຜນຈະສະເໜີຕົວຂໍເປັນເຈົ້າພາບຮ່ວມບານໂລກ 2030 ເຊັ່ນກັນ. ຂະນະທີ່ ໂມຣ໊ອກໂກ ກໍກຽມຈະກັບມາລຸ້ນອີກ ໂດຍອາດຈະຂໍເປັນເຈົ້າພາບຮ່ວມກັບ ຕູນິເຊຍ ແລະ ແອລຈີເຣຍ.
