ທະ​ນາ​ຄານລະດົມຄວາມຄິດເຫັນຕໍ່​ຮ່າງ​ກົດໝາຍທະນາຄານທຸລະກິດ

- advert banner 728 90 728x90 - ທະ​ນາ​ຄານລະດົມຄວາມຄິດເຫັນຕໍ່​ຮ່າງ​ກົດໝາຍທະນາຄານທຸລະກິດ

ທະ​ນາ​ຄານ​ແຫ່ງ ສປປ ລາວ (ທຫລ) ໄດ້ຈັດກອງປະຊຸມເພື່ອລະດົມຄວາມຄິດເຫັນຕໍ່​ຮ່າງ​ກົດໝາຍ​ວ່າ​ດ້ວຍທະນາຄານທຸລະກິດ (ສະບັບປັບປຸງ) ຂຶ້ນໃນວັນທີ 2 ສິງຫານີ້ທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ຮອງຜູ້ວ່າການ ທຫລ, ຊຶ່ງມີສະມາຊິກ​ສະພາ​ປະຊາຊົນນະຄອນຫຼວງວຽງຈັນ ແລະ ທະນາຄານທຸລະ​ກິດເຂົ້າຮ່ວມເປັນຈໍານວນຫລາຍ.

- new3 - ທະ​ນາ​ຄານລະດົມຄວາມຄິດເຫັນຕໍ່​ຮ່າງ​ກົດໝາຍທະນາຄານທຸລະກິດ

ກອງປະຊຸມນີ້ ໄດ້​ລົງ​ເລິກ​ຄົ້ນຄວ້າ​ຮ່າງກົດໝາຍ, ພ້ອມມີຄໍາ​ເຫັນ​ທາງ​ດ້ານ​ວິຊາ​ການຕ່າງໆ ​ ໂດຍສະເພາະ ໂຄງສ້າງຂອງຮ່າງກົດໝາຍ; ຂອດການອະນຸຍາດສ້າງຕັ້ງທະນາຄານທຸລະກິດ; ການກຳນົດທຶນຈົດທະບຽນ;ໂຄງປະກອບການຈັດຕັ້ງ; ການຮັກສາຄວາມໝັ້ນຄົງ, ວິທີການຄຸ້ມຄອງ ແລະ ກວດກາ; ການແກ້ໄຂບັນຫາຕ່າງ, ເຊິ່ງຜ່ານມາເຫັນ​ວ່າຍັງມີຫຼາຍດ້ານບໍ່ທັນຄ່ອງຕົວ ເຊັ່ນ: ບາງເນື້ອໃນ​ຍັງບໍ່​ສອດຄ່ອງ​ກັບ​ກົດ​ໝາຍ​ອື່ນ, ຍັງບໍ່ຊັດເຈນ ແລະ ຮັດກຸມ, ເຮັດໃຫ້ຜູ້ຈັດຕັ້ງປະຕິບັດຕົວຈິງມີຄວາມເຂົ້າໃຈບໍ່ເປັນເອກະພາບກັນ, ບໍ່​ແທດເໝາະ​ກັບ​ສະພາບ​ການຂະຫຍາຍຕົວຂອງເສດຖະກິດ ແລະ ການເຊື່ອມໂຍງພາກພື້ນ ແລະ ສາກົນ, ບໍ່ທັນຕອບສະໜອງໄດ້ກັບນະໂຍບາຍຫັນການຄຸ້ມຄອງທະນາຄານທຸລະກິດໃຫ້ໄດ້ຕາມມາດຕະຖານບາເຊວ 2 ແລະ ບາເຊວ 3 ພາຍໃນປີ 2016-2020 ແລະ ວິໄສທັດຮອດປີ 2030.

ຍ້ອນເຫັນບັນຫາຄືແນວນັ້ນ, ຈຶ່ງມີຄວາມຈໍາເປັນຕ້ອງປັບປຸງກົດໝາຍດັ່ງກ່າວ ເພື່ອໃຫ້ຈະ ແຈ້ງ, ຮັດກຸມ, ສອດຄ່ອງກັບການຄຸ້ມຄອງໃນປັດຈຸບັນ ແລະ ແທດເໝາະກັບທ່າອ່ຽງການພັດທະນາວຽກງານການເງິນ, ການທະ ນາຄານໃນຕໍ່ໜ້າ, ໂດຍສະເພາະການຄຸ້ມຄອງບໍລິຫານ, ການຮັກສາຄວາມໝັ້ນຄົງ ແລະ ການແກ້ໄຂທະນາຄານທຸລະກິດທີ່ຢູ່ໃນພາ ວະວິກິດ.

ທ່ານຮອງຜູ້ວ່າການ ທຫລ ເນັ້ນວ່າ: ຕະຫຼອດໄລຍະ 10 ກວ່າປີຜ່ານມາ, ກົດໝາຍວ່າດ້ວຍທະນາຄານທຸລະກິດ ຖືເປັນເຄື່ອງມືສໍາຄັນ ແລະ ເປັນບ່ອນອີງຕົ້ນຕໍໃຫ້ແກ່ການອະນຸຍາດສ້າງຕັ້ງ, ການເຄື່ອນໄຫວ ແລະ ການຄຸ້ມຄອງ, ຕິດຕາມ, ກວດກາທະນາຄານທຸລະກິດ ແລະ ມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ, ຊຶ່ງໃນປີ 2006 ມີທະນາຄານ ທຸລະກິດຈຳນວນ 12 ແຫ່ງ ແລະ ມາຮອດປັດຈຸບັນເພີ່ມເປັນ 43 ແຫ່ງ; ພ້ອມນັ້ນ ຕາໜ່າງການບໍລິການກໍຂະຫຍາຍຕົວຢ່າງກວ້າງຂວາງ, ມີຜະລິດຕະພັນຫຼາກຫຼາຍ ເປັນຕົ້ນການຮັບຝາກເງິນຈາກສັງຄົມ ແລະ ການສະໜອງສິນເຊື່ອໃນຮູບແບບຕ່າງໆ, ອຳນວຍຄວາມສະດວກໃນການຊໍາລະໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງໂດຍສະເພາະການຊໍາລະຜ່ານລະບົບເອເລັກໂຕຣນິກ ຊຶ່ງເປັນການສົ່ງເສີມ ການຊໍາລະສະສາງຜ່ານລະບົບທະນາຄານ ໃຫ້ນັບມື້ທັນສະໄໝ ເຮັດໃຫ້ການໝູນວຽນຂອງເງິນທຶນໃນລະບົບເສດຖະກິດມີຄວາມຄ່ອງຕົວ, ປະກອບສ່ວນສໍາຄັນເຂົ້າໃນການກະຕຸກຊຸກຍູ້ການພັດທະນາເສດຖະກິດ-ສັງຄົມຂອງປະເທດຂະຫຍາຍຕົວ.

- lattana 1 - ທະ​ນາ​ຄານລະດົມຄວາມຄິດເຫັນຕໍ່​ຮ່າງ​ກົດໝາຍທະນາຄານທຸລະກິດ

# ຂ່າວ-ພາບ: ຣັດສະໝີ ດວງສັດຈະ

error: Content is protected !!