ບໍລິໂພກຂ່າວ ຢ່າງມີສະຕິ

- Untitled design -   ບໍລິໂພກຂ່າວ ຢ່າງມີສະຕິ

    ໃນປັດຈຸບັນ ສື່ສານມວນຊົນ ລ້ວນແຕ່ມີບົດບາດສໍາຄັນຫຼາຍຕໍ່ກັບການດໍາລົງຊີວິດຂອງມະນຸດ ເຊິ່ງມັນໄດ້ກາຍເປັນອາ ຫານ, ເປັນສານກະຕຸ້ນ, ເປັນອາວຸດອັນຄົມແຫຼມ ເພື່ອສະທ້ອນທັດສະນະ ຫຼື ສະເໜີບັນຫາຕ່າງໆໃນສັງຄົມ ມີທັງອັນບວກ ແລະ ອັນລົບ; ດັ່ງນັ້ນ ຄວນເສບຂ່າວຢ່າງມີສະຕິ, ມີການກັ່ນກ່ອງ ແລະບໍລິໂພກຂ່າວ ຢ່າງຖືກຕ້ອງ, ຢ່າຕົກເປັນເຄື່ອງມືຂອງກຸ່ມຄົນບໍ່ດີ ເຊິ່ງໃນຂະນະນີ້ ສື່ສັງຄົມອອນລາຍ ຫຼື ສື່ໂຊຊຽວມີເດຍ ພວມມີບົດບາດປະຈັນບານໃນແນວຮົບສື່ມວນຊົນຂອງໂລກ, ມັນສາມາດ ອອກໄວ ທັນເຫດການ ແລະຍັງໃຫ້ຂໍ້ມູນ ທັງອັນດີ ແລະອັນບໍ່ດີ ທີ່ຫຼອກລວງ, ບິດເບືອນ ໂດຍຄົນໃນໂລກໂຊຊຽວຈໍານວນ ບໍ່ໜ້ອຍກໍ່ເອີ້ນ ວ່າ: ສື່ແປປ່ວນ ຫຼື ສື່ປ່ວຍ (ພາສາຕະຫຼາດວ່າ: ສື່ມານຍາ); ເມື່ອເປັນເຊັ່ນນັ້ນ ຄວນບໍລິໂພກຂ່າວຢ່າງມີສະຕິ ແລະ ໃນຜ່ານມາມີຫຼາຍປະເທດໃນໂລກ ເມື່ອມີເຫດການບໍ່ປົກກະຕິ ເປັນຕົ້ນ: ໄພພິບັດທາງທໍາມະຊາດ,   ແລະອື່ນໆ ລັດຖະບານ ຫຼື ທາງການຂອງປະເທດນັ້ນໆ ຈະອອກມາຖະແຫຼງຂ່າວ,ໃຫ້ຂໍ້ມູນທີ່ຖືກຕ້ອງ ແລະຊັດເຈນ;  ດັ່ງ ເຫດການທີ່ເກີດຢູ່ບັັນດາໝູ່ບ້ານຂອງເມືອງສະໜາມໄຊ ແຂວງອັດຕະປື ອັນເນື່ອງມາຈາກຝົນຕົກໜັກຕິດຕໍ່ກັນຫຼາຍວັນ  ໄດ້ເຮັດ ໃຫ້ອ່າງເກັບນໍ້າສໍາຮອງຂອງເຂື່ອນໄຟຟ້າເຊປຽນ-ເຊນໍ້ານ້ອຍຮັບນໍ້າບໍ່ໄດ້ ຈຶ່ງເຮັດໃຫ້ເຂື່ອນກັ້ນນໍ້າລຸລົງມາຖ້ວມບ້ານເຮືອນຂອງປະຊາ ຊົນຢ່າງກະທັນຫັນ ຊຶ່ງເກີດຂຶ້ນໃນກາງຄືນຂອງວັນທີ 23 ກໍລະກົດ 2018 ໄດ້ສ້າງຄວາມເສຍຫາຍ ແກ່ຊີວິດ, ຊັບສິນຂອງປະຊາຊົນ ຈໍານວນບໍ່ໜ້ອຍ.

ດັ່ງນັ້ນ, ລັດຖະບານ ໄດ້ປະກາດເຂດນໍ້າຖ້ວມເມືອງສະໜາມໄຊເປັນເຂດໄພພິບັດສຸກເສີນແລະຮຽກຮ້ອງໃຫ້ການຊ່ວຍ ເຫຼືອດ່ວນ ແລະໃນວັນທີ 25 ກໍລະກົດ, ນາຍົກລັດຖະມົນຕີ ໄດ້ແຕ່ງຕັ້ງຄະນະກໍາມະການສະເພາະກິດແກ້ໄຂໄພພິບັດລະດັບຊາດ ຢ່າງເປັນທາງການ; ຈາກນັ້ນ ຄະນະດັ່ງກ່າວກໍ່ໄດ້ຈັດຕັ້ງປະຕິບັດ ແລະລົງໄປພື້ນທີ່ທີ່ປະສົບໄພເຄາະຮ້າຍ ໂດຍໄດ້ນໍາພາ, ຄຸ້ມຄອງ, ເຄື່ອນໄຫວວຽກງານໂຕຈິງໃນພາກສະໜາມ, ຄວບຄຸມສະຖານະການດັ່ງກ່າວ ດ້ວຍຄວາມຮັບຜິດຊອບສູງໃນທຸກໜ້າວຽກຕາມ ການມອບໝາຍຂອງທ່ານນາຍົກລັດຖະມົນຕີ  ໃຫ້ໄດ້ຮັບຜົນ ແນໃສ່ກອບກູ້ ແລະ ແກ້ໄຂບັນຫາດັ່ງກ່າວໃຫ້ກັບຄືນສູ່ປົກກະຕິໂດຍໄວ; ແຕ່ໃນຂະນະດຽວກັນນັ້ນ ເຖິງແມ່ນລັດຖະບານ, ອົງການປົກຄອງທ້ອງຖິ່ນ, ປະຊາຊົນ ແລະບັນດາປະເທດເພື່ອນມິດສາກົນ ລວມທັງສໍານັກງານໃຫຍ່ອົງການສະຫະປະຊາຊາດ ເພື່ອການພັດທະນາ; ສູນປະ ສານງານອາຊຽນ ເພື່ອການໃຫ້ຄວາມຊ່ວຍເຫຼືອດ້ານມະນຸດສະທໍາໃນການຈັດການກັບໄພພິບັດ;​ ອົງການກາແດງ ສິງກະໂປ; ອົງການ ສຸພານິມິດ;   ລ້ວນແຕ່ຈິງໃຈຊ່ວຍເຫຼືອຜູ້ປະສົບເຄາະຮ້າຍທີ່ເມືອງສະໜາມໄຊ ແລະຮ່ວມກັນແກ້ໄຂບັນຫາດັ່ງກ່າວດ້ວຍດີສະເໝີມາ.

ແຕ່ໃນຂະນະດຽວກັນ, ກໍມີກຸ່ມຄົນບໍ່ດີຈໍານວນໜຶ່ງ ມີຄວາມອິດສາຕາຮ້ອນ ເກີດມີແນວຄິດອະຄະຕິ, ມີຈິດໃຈໂຫດ ຮ້າຍປ່າເຖື່ອນ, ດູຖູກຢຽບຢ່ຳໂດຍການໄດ້ກ່າວໂຈມຕີລັດຖະບານ ແລະປະຊາຊົນດ້ວຍຖ້ອຍຄໍາບິດ ເບືອນ, ຕົວະຍົວະ, ຫຼອກລວງ, ປີ້ນໜ້າມືເປັນຫຼັງມື; ກ່າວຫານາໆຊາດທີ່ໃຫ້ການຊ່ວຍເຫຼືອ ແລະຕ່າງໆນາໆ ແນໃສ່ເຮັດໃຫ້ປະຊາ ຊົນລາວຖືກໂດ່ດດ່ຽວຈາກ ປະຊາຄົມໂລກ.

ດັ່ງນັ້ນ; ເພື່ອເຮັດໃຫ້ປະຊາຊົນລາວບັນດາເຜົ່າ ລວມທັງບັນດາປະເທດເພື່ອນມິດສາກົນ, ອົງການຈັດຕັ້ງສາກົນ  ແລະ ອົງການຈັດຕັ້ງທີ່ບໍ່ຂຶ້ນກັບລັດຖະບານ ມີຄວາມເຂົ້າໃຈຈິດໃຈຂອງລັດຖະບານ ແລະປະຊາຊົນລາວຢ່າງຈະແຈ້ງນັ້ນ; ຄະນະກໍາມະ ການສະເພາະກິດແກ້ໄຂໄພພິບັດລະດັບຊາດ ໄດ້ແຈ້ງໃຫ້ທົ່ງສັງຄົມທັງພາຍໃນ ແລະຕ່າງປະເທດ ພ້ອມທັງສໍານັກຂ່າວຕ່າງໆ ຜູ້ຜະ ລິດສົ່ງ ແລະແລກປ່ຽນຂໍ້ຄວາມ ແລະຮູບພາບຜ່ານສື່ສັງຄົມອອນລາຍ ຂໍໃຫ້ຕິດຕາມຮັບຂ່າວສານທີ່ຖືກຕ້ອງຕາມຄວາມເປັນຈິງ ແລະເຊື່ອຖືໄດ້ຈາກບັນດາສື່ທາງການຂອງລັດຖະບານ ໂດຍມີໜັງສືພິມ, ວິທະຍຸ ແລະໂທລະພາບແຫ່ງຊາດ ທີ່ໄດ້ຕິດຕາມ ແລະ ລາຍງານຂ່າວເຫດການດັ່ງກ່າວເປັນປະຈໍາ ແລະຍັງສາມາດເຂົ້າເບິ່ງໄດ້ຈາກສື່ທີ່ກ່າວມານີ້ ໂດຍຜ່ານ Facebook, YouTube ແລະອື່ນໆອີກ;

- Wave100S AD to Website 2020 0 -   ບໍລິໂພກຂ່າວ ຢ່າງມີສະຕິ

ໃນຜ່ານມານັບແຕ່ມື້ເຫດການເກີດຂຶ້ນ ໄດ້ພົບເຫັນສື່ສັງຄົມອອນລາຍ ແລະບຸກຄົນຈໍານວນໜຶ່ງຢູ່ພາຍໃນ ແລະນອກ ປະເທດ   ໄດ້ມີການສະເໜີ ແລະແຈກຢາຍຂ່າວທີ່ເຫັນວ່າບໍ່ຖືກຕ້ອງກັບຄວາມເປັນຈິງຫຼາຍໆຢ່າງ; ທຸກ ການກະທໍາໃນການການສະເໜີຂ່າວ ແລະ ພາບກ່ຽວກັບເຫດການໄພພິບັດຢູ່ເມືອງສະໜາມໄຊ   ແລະສະພາບດິນຟ້າອາກາດ ທີ່ບໍ່ຖືກຕ້ອງຕາມຄວາມຈິງ ຫຼືຶ ບິດເບືອນຈາກການລາຍງານຂອງແຫຼ່ງຂ່າວທາງການຂອງລັດຖະບານ  ເຊິ່ງການກະທຳດັ່ງກ່າວຂອງພວກເຂົາຍັງເປັນການລ່ວງລະເມີດຈັນຍາບັນຂອງນັກອີກດ້ວຍ.

ໃນໂອກາດທີ່ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ປະຕິບັດພາລະກິດຊີ້ນໍາວຽກງານຢູ່ສູນຊ່ວຍເຫຼືອທີ່ກະ ຊວງ ຮສສ (ວັນທີ 29 ກໍລະກົດ) ທ່ານໄດ້ກ່າວສະແດງຄວາມຂອບໃຈ ແລະຮູ້ບຸນຄຸນອັນໃຫຍ່ຫຼວງຕໍ່ປະຊາຊົນລາວໃນທົ່ວປະເທດ ກໍ່ຄືປະຊາຊົນ ແລະອົງການຈັດຕັ້ງສາກົນ, ລັດຖະບານຂອງບັນດາປະເທດເພື່ອນມິດ ແລະ ຮ້ອງໃຫ້ປະຊາຊົນລາວບັນດາເຜ່ົາຕ້ອງມີສະມາທິ, ມີຄວາມຕັ້ງໃຈຊ່ວຍເຫຼືອ ແລະ  ຢ່າຫຼົງເຊື່ອຂ່າວລືດັ່ງກ່າວ.

# ໂດຍ: ຣັດສະໝີ ດວງສັດຈະ

- WhatsApp Image 2020 05 27 at 5 -   ບໍລິໂພກຂ່າວ ຢ່າງມີສະຕິ
- WhatsApp Image 2020 05 27 at 5 -   ບໍລິໂພກຂ່າວ ຢ່າງມີສະຕິ
error: Alert: ເນື້ອຫາຂ່າວມີລິຂະສິດ !!