ທ່ານນາຍົກລັດຖະມົນຕີຢ້ຽມຢາມຜູ້ປະສົບໄພນ້ຳຖ້ວມຢູ່ແຂວງຄຳມ່ວນ ແລະ ສະຫວັນນະເຂດ ເພື່ອໃຫ້ການຊ່ວຍເຫລືອເບື້ອງຕົ້ນ

ໃນວັນທີ 2 ສິງຫານີ້, ນາຍົກລັດຖະມົນຕີ ທອງລຸນ ສີສຸລິດ ພ້ອມຄະນະສະເພາະກິດຕ້ານໄພພິບັດທໍາມະຊາດ ໄດ້ລົງເຄື່ອນໄຫວຕິດຕາມສະພາບນ້ຳຖ້ວມຢູ່ແຂວງຄຳມ່ວນ ແລະ ແຂວງສະຫວັນນະເຂດ, ເຊິ່ງໄດ້ຮັບຟັງລາຍງານ ຈາກທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ ວ່າ: ປັດຈຸບັນທົ່ວແຂວງຄຳມ່ວນມີ 337 ບ້ານຖືກນ້ຳຖ້ວມ, ມີປະຊາຊົນຫລາຍກວ່າ 20 ພັນຄົນໄດ້ຮັບຜົນກະທົບຮ້າຍແຮງ, ໂດຍໄດ້ຍົກຍ້າຍໄປຢູ່ຈຸດພັກຊົ່ວຄາວຕ່າງໆ. ໃນນີ້ເມືອງໜອງບົກມີ 11 ບ້ານ, ເມືອງເຊບັ້ງໄຟ 9 ບ້ານ, ເມືອງມະຫາໄຊ 8 ບ້ານ ແລະ ເມືອງຍົມມະລາດ 6 ບ້ານ, ມີເນື້ອທີ່ນາຈຳນວນ 33.341 ເຮັກຕາ ເທົ່າກັບ 43,47% ຂອງເນື້ອທີ່ນາໃນທົ່ວແຂວງຈົມຢູ່ພື້ນນໍ້າ, ສັດລ້ຽງ, ໜອງປາຈຳນວນຫລວງຫລາຍໄດ້ຮັບຄວາມເສຍຫາຍ, ໂຮງຮຽນ, ສຸກສາລາ, ລະບົບໄຟຟ້າ ແລະ ເສັ້ນທາງຫລາຍສາຍບໍ່ສາມາດສັນຈອນໄດ້. ໃນນັ້ນມີເສັ້ນທາງຫຼວງແຫ່ງຊາດ 2 ເສັ້ນຄື: ທາງເລກທີ 12 ແຕ່ 3 ແຍກເມືອງຍົມມະລາດ ໄປຫາດ່ານສາກົນນາເພົ້າໄດ້ປິດການນຳໃຊ້ ແລະ ທາງເລກທີ 1E ແຕ່ເມືອງຍົມມະລາດຫາເມືອງນາກາຍ ກໍໄດ້ປິດການສັນຈອນ.
ບໍລິສັດໄຟຟ້ານ້ຳເທີນ 2 ໄດ້ແຈ້ງຢຸດເຊົາການຜະລິດກະແສໄຟຟມາແຕ່ວັນທີ 24 ກໍລະກົດ ເປັນຕົ້ໜມາ ເພື່ອຫລຸດຜ່ອນການປ່ອຍນໍ້າໄຫລລົງສົມທົບກັບແມ່ນໍ້າເຊບັ້ງໄຟຕາມສັນຍາລະບຸໄວ້.

ໃນໂອກາດລົງຢ້ຽມຢາມ, ນາຍົກລັດຖະມົນຕີໄດ້ຊີ້ນໍາໃຫ້ການນໍາແຂວງໄດ້ສຸມກໍາລັງເຈົ້າໜ້າທີ່ເຂົ້າຊ່ວຍເຫລືອກອບກູ້ເອົາຊີວິດ ແລະ ຊັບສີນຂອງປະຊາຊົນໃຫ້ທັນການ, ຊອກຫາວິທີທາງໃນການຊ່ວຍເຫລືອກອບກູ້ເອົາຜົນລະປູກຂອງປະຊາຊົນ, ກະກຽມແນວພັນ ແລະ ເງື່ອນໄຂຜະລິດຕ່າງໆ ເພື່ອທົດແທນ, ພ້ອມທັງເອົາໃຈໃສ່ຕິດຕາມ, ກວດກາເພື່ອປ້ອງກັນພະຍາດຕ່າງໆທີ່ອາດຈະເກີດຂຶ້ນພາຍຫລັງນໍ້າຫລຸດລົງ ແລະ ເອົາໃຈໃສ່ກະກຽມເຄວາມພ້ອມເພື່ອຮັບມືກັບພາຍຸລູກໃໝ່ທີ່ອາດຈະເກີດຂຶ້ນ ແລະ ມີແຜນການຟື້ນຟູຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ໃນໂອກາດດັ່ງກ່າວ ທ່ານນາຍົກລັດຖະມົນຕີຍັງໄດ້ມອບເງິນຈໍານວນ 300 ລ້ານກີບ ເພື່ອຊ່ວຍເຫລືອບັນເທົ່າທຸກແກ່ປະຊາຊົນຜູ້ທີ່ຖືກຜົນກະທົບໃນເບື້ອງຕົ້ນ.