ປິດການແຂ່ງຂັນດອກປີກໄກ່ຊີງຂັນ ປະທານສະພາແຫ່ງຊາດຄັ້ງທີ 18
ໃນວັນທີ 5 ສິງຫາຜ່ານມາ ທີ່ສະໂມສອນກິລາດອກປີກໄກ່ ບຶງຂະຫຍອງ (ສະໂມສອນເກົ່າ) ນະຄອນຫລວງວຽງຈັນ ໄດ້ມີພິທີປິດການແຂ່ງຂັນດອກປີກໄກ່ທົ່ວປະເທດ ຊີງຂັນປະທານສະພາແຫ່ງຊາດ ປະຈຳປີ 2018 ໂດຍມີທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ, ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສາສຶກສາທິການ ແລະ ກິລາ ພ້ອມດ້ວຍບັນດາຄະນະບໍລິຫານງານສະຫະພັນດອກປີກໄກ່ແຫ່ງຊາດ ແລະ ນັກກິລາເຂົ້າຮ່ວມ.
ການແຂ່ງຂັນຄັ້ງນີ້ມີນັກກິລາເຂົ້າຮ່ວມທັງໝົດ 320 ກວ່າຄົນ ມາຈາກ 27 ພາກສ່ວນ, ໃນນັ້ນ ມີ 8 ແຂວງຄື: ແຂວງຈຳປາສັກ, ອັດຕະປື, ສະຫວັນນະເຂດ, ຄຳມ່ວນ, ຫົວພັນ, ຫລວງພະບາງ, ໄຊຍະບູລີ, ບໍ່ແກ້ວ ແລະ ບັນດາສະໂມສອນອ້ອມຂ້າງນະຄອນຫລວງວຽງຈັນ. ການແຂ່ງຂັນໄດ້ດໍາເນີນມາແຕ່ວັນທີ 1-5 ສິງຫາຜ່ານມານີ້.
ສໍາລັບການແຂ່ງຂັນປະເພດທີມຊາຍປະກອບມີ ຮຸ່ນເຍົາວະຊົນ ແລະ ຊາວໜຸ່ມໂດຍບໍ່ຈໍາກັດ, ສ່ວນອີກ 11 ລາຍການແບ່ງອອກເປັນ 2 ຮຸ່ນຄື: ຮຸ່ນທົ່ວໄປ ມີ 5 ລາຍການ ປະກອບມີດ່ຽວຊາຍ, ດ່ຽວຍິງ, ຄູ່ຊາຍ, ຄູ່ຍິງ ແລະ ຄູ່ປະສົມ. ສຳລັບປະເພດເຍົາວະຊົນ ຮຸ່ນອາຍຸບໍ່ເກີນ 14 ປີ ມີ 2 ລາຍການຄື: ດ່ຽວຊາຍ ແລະ ດ່ຽວຍິງ, ສ່ວນອາຍຸບໍ່ເກີນ 17 ປີ ມີ 4 ລາຍການຄື: ດ່ຽວຊາຍ, ດ່ຽວຍິງ, ຄູ່ຊາຍ ແລະ ຄູ່ຍິງ.
