ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ

- Untitled design - ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ

ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ ເປັນເຄື່ອງມືທາງດ້ານການເມືອງ-ແນວຄິດຂອງບັນດາອົງການຈັດຕັ້ງໃນລະບົບການເມືອງ ເຊິ່ງມີພັກເປັນແກນນໍາແລະດໍາລົງບົດບາດໂຄສະນາ, ເຜີຍແຜ່ແນວທາງນະໂຍ ບາຍຂອງພັກແລະລັດໃນການພັດທະນາ, ປົກປັກຮັກສາປະເທດຊາດ, ພ້ອມຍັງເປັນເວທີຖະແຫຼງຂ່າວ ຊີ້ແຈງບັນຫາຕ່າງໆຂອງສັງຄົມທີ່ມີລັກສະນະສຶກສາອົບຮົມ, ລັກສະນະຕໍ່ສູ້, ລັກສະນະຊີ້ນໍາມະຫາຊົນແລະລັກສະນະຕົວຈິງ, ນອກນີ້ ຍັງມີໜ້າທີ່ຕອບໂຕ້-ຕອບຕ້ານທຸກເລ້ຫຼ່ຽມ, ກົນອຸບາຍຫັນປ່ຽນ ໂດຍສັນຕິຂອງອິດທິກໍາລັງປໍລະປັກແລະກຸ່ມຄົນບໍ່ດີ ທີ່ຫວັງທໍາລາຍຄວາມໝັ້ນຄົງຂອງຊາດ, ຄວາມສະຫງົບສຸກຂອງປະຊາຊົນ ແນໃສ່ເພື່ອປົກປັກຮັກສາໝາກຜົນຂອງການປະຕິວັດ ປະກອບສ່ວນເຂົ້າໃນການຈັດຕັ້ງປະຕິບັດ 2 ໜ້າທີ່ຍຸດທະສາດກໍຄືການປ່ຽນແປງໃໝ່ຮອບດ້ານແລະມີຫຼັກການຂອງພັກເຮົາ.

ມາຮອດປັດຈຸບັນນີ້, ຖັນແຖວນັກຂ່າວລາວ ໄດ້ປະຕິບັດໜ້າທີ່ໃນສື່ສິ່ງພິມ-ສື່ເອເລັກໂທຼນິກທີ່ສັງກັດຂັ້ນສູນກາງ ແລະ ທ້ອງຖິ່ນໃນທົ່ວປະເທດ ລວມທັງເຄື່ອນໄຫວຢູ່ຕ່າງປະເທດຈໍານວນໜຶ່ງ ເພື່ອເຮັດໜ້າທີ່ລາຍງານຂ່າວ, ຜະລິດບົດແລະຮູບ-ສຽງອອກຢູ່ໜ້າໜັງສືພິມ, ວິທະຍຸ-ໂທລະພາບ, ເວັບໄຊ… ຕອບສະໜອງໃຫ້ຜູ້ບໍລິໂພກຂ່າວ ເຫັນໄດ້ຄວາມເປັນຈິງຂອງສັງຄົມຢ່າງຖືກຕ້ອງ, ທັນເຫດການ, ພ້ອມນັ້ນນັກຂ່າວ ຍັງເປັນເຄື່ອງມືອັນແຫຼມຄົມທີ່ສຸດໃນຈັດຕັ້ງປະຕິບັດໜ້າທີ່ການເມືອງຂອງພັກ, ເປັນສາຍໃຍແຫ່ງຄວາມຜູກພັນລະຫວ່າງພັກກັບປະຊາຊົນ ທັງເປັນຜູ້ນໍາເອົາຄວາມຄິດເຫັນ, ຄວາມມຸ້ງມາດປາຖະໜາອັນແຮງກ້າຂອງປະຊາຊົນສ່ອງແສງໃຫ້ພັກ-ລັດຖະບານ ແລະ ມີບົດບາດໂຄສະນາ, ປຸກລະດົມຂົນຂວາຍຊຸກຍູ້ພະນັກງານ-ສະມາຊິກພັກແລະປະຊາ ຊົນທຸກເຜົ່າ ເຂົ້າໃນການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຂອງພັກ, ສັນລະເສີນແບບຢ່າງ ວຽກດີຄົນເດັ່ນ, ຍົກໃຫ້ເຫັນປັດໃຈ​ບົດຮຽນໃໝ່ ທີ່ເກີດຂຶ້ນໃນຂະບວນການປົກປັກຮັກສາແລະພັດທະນາປະເທດຊາດ.

ຕະຫຼອດໄລຍະຜ່ານມາ ບັນດານັກຂ່າວລ້ວນແຕ່ມີຄວາມພະຍາຍາມສູງໃນການປະຕິບັດໜ້າທີ່ຂອງຕົນຢ່າງຂະຫຍັນຂັນແຂງ ເຮັດໃຫ້ການຖະແຫຼງຂ່າວມີຄວາມຫຼາກຫຼາຍສີສັນ-ມີເນື້ອໃນອຸດົມສົມບູນຫຼາຍຂຶ້ນ ເຊິ່ງໄດ້ນໍາເອົາຄວາມຄິດເຫັນທີ່ມີລັກສະ ນະສ້າງສັນທີ່ສ່ອງແສງຄວາມເປັນຈິງຂອງສັງຄົມ, ການຈັດຕັ້ງປະຕິບັດແນວທາງການເມືອງ, ການທະຫານ, ເສດຖະກິດແລະການ ຕ່າງປະເທດຂອງພັກ, ການຈັດຕັ້ງຜັນຂະຫຍາຍເນື້ອໃນ 4 ບຸກທະລຸ, ການແກ້ໄຂຄວາມທຸກຍາກ, ວຽກງານ 3 ສ້າງແລະໃນລະ ຫວ່າງທ້າຍເດືອນກໍລະກົດຫາເດືອນສິງຫາຂອງປີນີ້, ບັນດາຜູ້ສື່ຂ່າວ ໄດ້ເຮັດໜ້າທີ່ລາຍງານຂ່າວໄພນ້ຳຖ້ວມທີ່ເກີດຂຶ້ນເປັນບໍລິເວນກ້ວາງໃນຫຼາຍພື້ນທີ່ຂອງປະເທດ ໂດຍສະເພາະກໍລະນີອຸບັດເຫດຈາກເຂື່ອນກັ້ນນໍ້າເຊປຽນ-ເຊນໍ້ານ້ອຍ ໂດຍມີສາເຫດເກີດມາຈາກຝົນຕົກໜັກຕິດຕໍ່ກັນຫຼາຍວັນ ອັນໄດ້ເຮັດໃຫ້ອ່າງເກັບນໍ້າສໍາຮອງຂອງເຂື່ອນໄຟຟ້າດັ່ງກ່າວລຸລົງມາຖ້ວມບ້ານເຮືອນຂອງປະຊາຊົນໃນຫຼາຍບ້ານຂອງເມືອງສະໜາມໄຊ ແຂວງອັດຕະປື  ແລະ ໄດ້ສ້າງຄວາມເສຍຫາຍແກ່ຊີວິດ-ຊັບສິນຂອງປະຊາຊົນຢ່າງໜັກໜ່ວງ; ສໍາລັບ ນັກຂ່າວຢູ່ທ້ອງຖິ່ນ ກໍຕັດສິນໃຈຜ່ານຜ່າອຸປະສັກນາໆປະການຢູ່ບົນສະໜາມຮົບການຜະລິດ, ເຂດຫ່າງໄກສອກຫຼີກ, ພູຜາທີ່ສູງຊັນ ເພື່ອນໍາເອົາຄວາມຮູ້ສຶກ-ຜົນງານແລະການເຄື່ອນໄຫວໃນການປົກປັກຮັກສາແລະສ້າງສາພັດທະນາ, ການສ້າງຊີວິດໃໝ່ຂອງປະຊາຊົນບັນ ດາເຜົ່າພາຍໃຕ້ການນໍາພາຂອງພັກແລະລັດ ມາສະເໜີໃຫ້ສັງຄົມ.

ເຖິງວ່າ ຈະມີຜົນສໍາເລັດອັນຫຼວງຫຼາຍ ແຕ່ມາເບິ່ງເບື້ອງຄຸນນະພາບ ແລະ ເນື້ອຫາສາລະບາງຄັ້ງ ຍັງເຮັດບໍ່ທັນດີ, ບໍ່ທັນດຶງດູດຄວາມສົນໃຈແລະບໍ່ທັນໃຫ້ຄຸນປະໂຫຍດເທົ່າທີ່ຄວນ ເປັນຕົ້ນບັນຫາຂໍ້ມູນຂ່າວສານບໍ່ຫຼາກຫຼາຍ, ຍັງຊັກຊ້າບໍ່ທັນເວລາ ໂດຍສະເພາະການໃຊ້ພາສາບໍ່ຖືກຕ້ອງ, ຮູບຈໍານວນໜຶ່ງບໍ່ທັນຄົມຊັດ, ມີການແກະຂ່າວ ຫຼື ນໍາເນື້ອຫາຈາກອິນເຕິແນັດ-ສື່ອອນລາຍ ໂດຍບໍ່ກັ່ນກອງ, ການສ່ອງແສງສະພາບຄວາມເປັນຈິງຂອງສັງຄົມບໍ່ກ້ວາງຂວາງ, ການຊອກເຫັນປັດໃຈໃໝ່, ວຽກດີຄົນເດັ່ນ, ບັນ ດາບົດຮຽນທີ່ເກີດໃນວຽກງານຕົວຈິງຍັງເຮັດບໍ່ທັນດີ ເຮັດບໍ່ລຽນຕິດ, ສ່ວນຫຼາຍເວົ້າແຕ່ດ້ານດີ ພັດບໍ່ເວົ້າຂໍ້ຄົງຄ້າງ ສາຍເຫດຂອງມັນແລະບໍ່ທັນຊີ້ໃຫ້ເຫັນວິທີແກ້ໄຂຢ່າງຈະແຈ້ງ, ພ້ອມນີ້ມີບາງຂະແໜງການແລະທ້ອງຖິ່ນຍັງບໍ່ເອົາຫົວຊານໍາວຽກງານສື່ມວນຊົນ, ບາງບ່ອນຊໍ້າພັດກວດກາເຂັ້ມງວດ ລົງເລິກໃນອັນຍິກຍ່ອຍຂອງວິຊາການ, ວາງກົນໄກເຄັ່ງຄັດຫຼາຍຢ່າງ, ມີບາງບ່ອນ ພັດເອົາຄົນບໍ່ມີຄວາມຮູ້ແລະບໍ່ມີປະສົບການດ້ານສື່ມວນຊົນມາເປັນບັນນາທິການ ເຮັດໃຫ້ການດໍາເນີນວຽກອືດອາດ, ຊັກຊ້າ, ຂ່າວ-ບົດ ແຫ້ງ ແລ້ງ, ຈືດຈາງກ້າວໄປເຖິງສັງຄົມບໍ່ໃຫ້ຄວາມສົນໃຈ.

- Wave100S AD to Website 2020 0 - ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ

ຢືນຢູ່ຕໍ່ໜ້າສະພາບແວດລ້ອມສາກົນແລະພາກພື້ນ ທີ່ຜັນແປໄປຢ່າງວ່ອງໄວແລະສະຫຼັບສັບຊ້ອນ ເຊິ່ງໄດ້ເລັ່ງທວງໃຫ້ຖັນແຖວນັກຂ່າວລາວ ຕ້ອງມີທັດສະນະຫຼັກໝັ້ນການເມືອງຈະແຈ້ງ, ສະດຸ້ງໄວຕໍ່ສະພາບການ, ມີຄວາມຊໍານານໃນດ້ານວິຊາການ, ມັກຄົ້ນຄິດຄົ້ນຄ້ວາແນວທາງແຜນນະໂຍບາຍຂອງພັກ, ກົດໝາຍ ແລະ ນິຕິກໍາກໍຄືແຜນພັດທະນາເສດຖະກິດຂອງຊາດ, ຂອງທ້ອງຖິ່ນແລະບັນຫາອື່ນໆ, ພ້ອມນັ້ນ ຄະນະພັກ-ຄະນະນໍາທຸກຂັ້ນ ຕ້ອງເອົາໃຈໃສ່ຮອບດ້ານຕໍ່ນັກຂ່າວ ນັບທັງການນໍາພາການ ເມືອງແນວຄິດ, ດ້ານພະລາທິການ-ປະກອບວັດຖຸເຕັກນິກ,  ເພີ່ມຄວາມຮູ້ດ້ານພາສາຕ່າງ ປະເທດ, ໄອທີ…ໃຫ້ສູງຂຶ້ນ, ສ້າງແຮງສັດທາ, ສ້າງຄວາມໄວ້ເນື້ອເຊື່ອຖືຈາກປະຊາຊົນ ເຮັດໃຫ້ສົມກັບເປັນເຄື່ອງມືອັນແຫຼມຄົມຂອງພັກ-ລັດ, ເປັນເວທີຂອງມະຫາຊົນ, ເປັນສາຍໃຍຜູກພັນມະຫາຊົນກັບພັກ, ຕ້ອງສ້າງຄວາມນິຍົມ, ຄວາມສົນໃຈ ດ້ວຍການ ນໍາເອົາຜົນປະໂຫຍດໃນທາງກົງແລະທາງອ້ອມໄປໃຫ້ຜູ້ອ່ານ, ຜູ້ຟັງແລະຜູ້ເບິ່ງໄດ້ຮັບຮູ້ທັນເວລາ.            

# ໂດຍ: ຣັດສະໝີ ດວງສັດຈະ

- WhatsApp Image 2020 05 27 at 5 - ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ
- WhatsApp Image 2020 05 27 at 5 - ນັກຂ່າວລາວ ເປັນກໍາລັງປະຈັນບານໃນສະໜາມຮົບແນວຄິດແລະວັດທະນະທໍາ
error: Alert: ເນື້ອຫາຂ່າວມີລິຂະສິດ !!