ສະພາບອາກາດໃນເອີຣົບຄືຢູ່ໃນເຕົາອົບ
ສະພາບອາກາດໃນເອີຣົບຮ້ອນອົບເອົ້າໃກ້ເຖິງຂີດສູງສຸດເປັນປະຫວັດສາດໃນວັນທີ 6 ສິງຫານີ້ ຈົນຄືກັບຢູ່ໃນເຕົາອົບ, ພາຍຫລັງແສງແດດແຜດເຜົາມາຫລາຍອາທິດ ເຮັດໃຫ້ຫລາຍຄົນບອກວ່າເປັນເຄື່ອງພິສູດວ່າພາກພື້ນເຂົ້າສູ່ຍຸກສະພາບອາກາດປ່ຽນແປງ.
ອຸນຫະພູມທາງພາກໃຕ້ຂອງຝຣັ່ງເພີ່ມຂຶ້ນມາຢູ່ 37 ອົງສາ ພາຍຫລັງວັນທີ 4 ສິງຫາ ອາກາດຮ້ອນເພີ່ມຂຶ້ນສູງສຸດນັບແຕ່ປີ 2003 ຈາກຄື້ນຄວາມຮ້ອນທີ່ເຮັດໃຫ້ມີຜູ້ເສຍຊີວິດຫລາຍພັນຄົນ ສ່ວນຫລາຍເປັນຜູ້ອາຍຸສູງ. ລັດຖະມົນຕີສາທາລະນະສຸກ ຂໍໃຫ້ປະຊາຊົນເບິ່ງແຍງສຸຂະພາບໃຫ້ດີໄລຍະອາກາດຮ້ອນ, ໃຫ້ຮັບປະທານອາຫານ ແລະ ດື່ມນ້ຳຫລາຍຂຶ້ນ, ສ່ວນຢູ່ແອັສປາຍສາມາດຄວບຄຸມໄຟໄໝ້ປ່າໄດ້ແລ້ວ ໂດຍຈຳນວນຜູ້ເສຍຊີວິດເພີ່ມເປັນ 7 ຄົນ ຫລັງຈາກຊາຍຊາວເຢຍລະມັນອາຍຸ 40 ປີເສຍຊີວິດໂຣກລົມແດດທາງພາກໃຕ້ ລວມທັງມີລາຍງານຜູ້ເສຍຊີວິດຈາກສາເຫດດຽວກັນໃນພື້ນທີ່ອື່ນໆ. ອຸນຫະພູມຍັງຢູ່ປະມານ 40-42 ອົງສາ. ສຳລັບອຸນຫະພູມຢູ່ປອກຕຸຍການຫລຸດລົງເລັກໜ້ອຍ ແຕ່ຍັງບໍ່ພຽງພໍຈະບັນເທົາສະຖານະການໄຟໄໝ້ປ່າທ່າມກາງລົມພັດແຮງ. ເຈົ້າໜ້າທີ່ຕ້ອງອົບພະຍົບປະຊາຊົນຕາມເຮືອນຫລາຍແຫ່ງ ມີຜູ້ບາດເຈັບ 24 ຄົນໃນຈຳນວນນີ້ອາການສາຫັດ 1 ຄົນ. ຂະນະທີ່ອຸນຫະພູມຢູ່ເຢຍລະມັນເພີ່ມຂຶ້ນມາຢູ່ 39 ອົງສາ, ສ່ວນຢູ່ອັງກິດຍັງຜະເຊີນອາກາດຮ້ອນທາງພາກໃຕ້ ອຸນຫະພູມ 32 ອົງສາ, ແຕ່ພາກເໜືອຍັງມີເມກປົກຄຸມ ແລະ ອາກາດເຢັນກວ່າ. ຊຸບເປີມາເກັດໃນນະຄອນຫລວງເຮລຊິງກິຂອງແຟງລັງໄດ້ເປີດປະຕູຮ້ານໄວ້ຕະຫລອດເພື່ອໃຫ້ລູກຄ້າເຂົ້າມາຫລົບອາກາດຮ້ອນ.
