ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25

- 25th asean regional - ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25
- Untitled design - ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25

ໃນວັນທີ 4 ສິງຫານີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ (ອີເອເອສ) ຄັ້ງທີ 8 ແລະ ກອງປະຊຸມເວທີພາກພື້ນອາຊຽນ (ເອອາເອບ) ຄັ້ງທີ 25 ທີ່ສິງກະໂປ.

ໂດຍກອງປະຊຸມລັດຖະມົນຕີຕ່າງປະເທດອາຊຽນ+3 ໄດ້ຢໍ້າຄືນບົດບາດຄວາມສຳຄັນຂອງຂອບການຮ່ວມມືເພື່ອກ້າວໄປສູ່ເປົ້າໝາຍໄລຍະຍາວຂອງການສ້າງປະຊາຄົມອາຊີຕາເວັນອອກ ທີ່ມີອາຊຽນເປັນໃຈກາງ, ກອງປະຊຸມໄດ້ສະແດງຄວາມຍິນດີຕໍ່ຜົນສຳເລັດຂອງກອງປະຊຸມສຸດຍອດສາມຝ່າຍລະຫວ່າງ ສປ ຈີນ, ຍີ່ປຸ່ນ ແລະ ສ.ເກົາຫລີ ຄັ້ງທີ 7 ໃນເດືອນພຶດສະພາ 2018 ທີ່ຍີ່ປຸ່ນ, ຊຶ່ງໄດ້ປະກອບສ່ວນສ້າງທ່ວງທ່າທີ່ດີໃຫ້ແກ່ການຮ່ວມມືອາຊຽນ+3. ກອງປະຊຸມສະແດງຄວາມເພິ່ງພໍໃຈຕໍ່ຄວາມຄືບຫນ້າໃນການຈັດຕັ້ງປະຕິບັດແຜນວຽກການຮ່ວມມືອາຊຽນ+3 ສຳລັບ 2018-2020 ແລະ ບັນດາຂໍ້ສະເໜີແນະຂອງໜ່ວຍງານວິໄສທັດອາຊີຕາເວັນອອກ II (EAVG II) ໃນໄລຍະຫນຶ່ງປີຜ່ານມາ, ຊຶ່ງກວມເອົາຫລາຍຂົງເຂດ ເຊັ່ນ: ການຮ່ວມມືດ້ານເສດຖະກິດ ແລະ ການເງິນ, ການເຊື່ອມຈອດ, ຄວາມໝັ້ນຄົງດ້ານສະບຽງອາຫານ, ການຮັດແຄບຄວາມແຕກໂຕນ, ການສຶກສາ, ສາທາລະນະສຸກ, ໄພພິບັດທຳມະຊາດ, ການຕ້ານອາຊະກຳຂ້າມຊາດ ແລະ ອື່ນໆ. ກອງປະຊຸມ ໄດ້ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ ເຊັ່ນ: ຄວາມສຳຄັນຂອງການຄ້າຫລາຍຝ່າຍແບບເສລີ ແລະ ເປີດກວ້າງໃນທ່າມກາງມາດຕະການປົກປ້ອງຕະຫລາດພາຍໃນຂອງບາງປະເທດ. ກອງປະຊຸມເຫັນດີເພີ່ມທະວີການຮ່ວມມືດ້ານເສດຖະກິດລວມທັງການສ້າງຄວາມສາມາດເພື່ອຮັບມືກັບຜົນກະທົບຂອງການປະຕິວັດດ້ານອຸດສະຫະກຳ ແລະ ການພັດທະນາເສດຖະກິດດີຈີຕອນ ແລະ ເຄືອຂ່າຍຕົວເມືອງທັນສະໄໝ ແລະ ຕົວເມືອງວັດທະນະທໍາ. ອັນສຳຄັນ, ກອງປະຊຸມໄດ້ເນັ້ນຄວາມສຳຄັນຂອງການສົ່ງເສີມລະບົບການຄ້າສາກົນທີ່ເປີດກວ້າງ ແລະ ເສລີ ແລະ ຢໍ້າຄືນ ຄວາມໝາຍໝັ້ນໃນການເຮັດວຽກຮ່ວມກັນເພື່ອເລັ່ງລັດການເຈລະຈາສັນຍາຄູ່ຮ່ວມທາງເສດຖະກິດແບບຮອບດ້ານລະດັບພາກພື້ນ (RCEP) ໃຫ້ສຳເລັດພາຍໃນທ້າຍປີ 2018.

ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ (EAS) ຄັ້ງທີ 8 ໄດ້ຢໍ້າຄືນບົດບາດສຳຄັນຂອງ ອີເອເອັສ ໃນການເປັນເວທີປຶກສາຫາລືລະດັບຜູ້ນໍາກ່ຽວກັບບັນຫາຍຸດທະສາດ, ການເມືອງ, ເສດຖະກິດ ແລະ ຄວາມສົມບູນພູນສຸກໃນພາກພື້ນອາຊີຕາເວັນອອກ. ກອງປະຊຸມ ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງຜູ້ນໍາ ອີເອເອສ ໃນໄລຍະ 1 ປີຜ່ານມາ ແລະ ການຈັດຕັ້ງປະຕິບັດແຜນປະຕິບັດງານ ມະນິລາ ຂອງການຮ່ວມມືຂອບກອງປະຊຸມສຸດຍອດອາຊີຕາເວັນອອກ ສຳລັບ 2018-2022 ໃນຂົງເຂດສິ່ງແວດລ້ອມ ແລະ ພະລັງງານ, ການສຶກສາ, ການເງິນ, ສາທາລະນະສຸກ ແລະ ການຕ້ານພະຍາດລະບາດ, ການຄຸ້ມຄອງໄພພິບັດ, ການເຊື່ອມຈອດ, ເສດຖະກິດ ແລະ ການຄ້າ, ຄວາມໝັ້ນຄົງດ້ານສະບຽງອາຫານ ແລະ ການຮ່ວມມືທາງທະເລ. ກອງປະຊຸມ ໄດ້ສະແດງຄວາມຊົມເຊີຍຕໍ່ການເປີດນຳໃຊ້ເວັບໄຊ ອີເອເອສ ຢ່າງເປັນທາງການ, ເຊິ່ງຈະເປັນຊ່ອງທາງໃນການສ້າງຄວາມຮັບຮູ້ ແລະ ເຂົ້າໃຈຂອງສາທາລະນະຊົນຕໍ່ການຮ່ວມມືໃນຂອບ ອີເອເອສ ໃຫ້ຫລາຍຂຶ້ນ. ນອກນີ້, ກອງປະຊຸມໄດ້ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ ເຊັ່ນ: ການສົ່ງເສີມການຄ້າຫລາຍຝ່າຍແບບເສລີ ແລະ ເປີດກວ້າງ ໃນທ່າມກາງສະພາບທ່າອ່ຽງປົກປ້ອງຕະຫລາດພາຍໃນ ແລະ ຊຸກຍູ້ການເລັ່ງລັດການເຈລະຈາສັນຍາຄູ່ຮ່ວມທາງເສດຖະກິດແບບຮອບດ້ານລະດັບພາກພື້ນ (RCEP) ໃຫ້ສຳເລັດໃນທ້າຍປີນີ້, ສະພາບການທີ່ມີການພັດທະນາໃນທາງບວກຢູ່ແຫລມເກົາຫລີ, ສະພາບການໃນທະເລຈີໃຕ້, ການຮ່ວມມືເພື່ອຕ້ານອາຊະຍາກຳຂ້າມຊາດ ແລະ ການກໍ່ການຮ້າຍໃນພາກພື້ນ ແລະ ແນວຄວາມຄິດກ່ຽວກັບພາກພື້ນອິນໂດປາຊີຟິກ. ພ້ອມນີ້, ກອງປະຊຸມກໍໄດ້ກະກຽມໃຫ້ແກ່ກອງປະຊຸມສຸດຍອດອາຊີຕາເວັນອອກຄັ້ງທີ 13 ທີ່ ຈະຈັດຂຶ້ນໃນເດືອນພະຈິກ 2018 ທີ່ສິງກະໂປ ແລະ ໄດ້ຮັບຊາບຄວາມຄືບຫນ້າຂອງການຮ່າງບັນດາເອກະສານຜົນຂອງກອງປະຊຸມດັ່ງກ່າວ.

- Wave100S AD to Website 2020 0 - ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25

ສໍາລັບກອງປະຊຸມເວທີພາກພື້ນອາຊຽນ (ARF) ຄັ້ງທີ 25 ໄດ້ທົບທວນຄືນ ແລະ ສະແດງຄວາມເພິ່ງພໍໃຈຕໍ່ການຮ່ວມມືໃນໄລຍະຜ່ານມາ ແລະ ໄດ້ແລກປ່ຽນຄວາມຄິດເຫັນຢ່າງກົງໄປກົງມາກ່ຽວກັບສະພາບການໃນພາກພື້ນ ແລະ ສາກົນທີ່ພວມຜັນແປ ເປັນຕົ້ນແມ່ນບັນຫາການກໍ່ການຮ້າຍ, ລັດທິຫົວຮຸນແຮງ, ສະພາບການຢູ່ຕາເວັນອອກກາງ, ສະພາບການຢູ່ແຫລມເກົາຫລີ, ບັນຫາທະເລຈີນໃຕ້, ບັນຫາອາຊະຍາກຳຂ້າມຊາດ, ຄວາມໝັ້ນຄົງດ້ານຂໍ້ມູນຂ່າວສານ, ການປ່ຽນແປງດິນຟ້າອາກາດ, ໂດຍສະເພາະໄພພິບັດທໍາມະຊາດ ແລະ ບັນຫາອື່ນໆ ທີ່ມີຄວາມສົນໃຈ ແລະ ເປັນຫ່ວງຮ່ວມກັນ. ພ້ອມນັ້ນ, ທ່ານລັດຖະມົນຕີ ສະເຫລີມໄຊ ກົມມະສິດ ຍັງໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງບັນດາປະເທດເພື່ອນມິດ ແລະ ອົງການຮ່ວມມືຕ່າງໆໃນການກູ້ໄພ ແລະ ບັນເທົາທຸກໄພນໍ້າຖ້ວມໃນຄັ້ງນີ້.   ກອງປະຊຸມຍັງໄດ້ຮັບຮອງເອົາບັນດາກິດຈະກໍາຂອງ ARF ທີ່ຈະຈັດຕັ້ງປະຕິບັດໃນສົກປີ 2018-2019, ຖະແຫລງການເວທີພາກພື້ນອາຊຽນວ່າດ້ວຍການຮ່ວມມືດ້ານການຄຸ້ມຄອງໄພພິບັດ. ກອງປະຊຸມໄດ້ຮັບຮອງການເປັນປະທານຮ່ວມຂອງ ສປປ ລາວ, ຈີນ ແລະ ການາດາ ໃນການເປັນປະທານຮ່ວມກອງປະຊຸມເວທີພາກພື້ນອາຊຽນ ກ່ຽວກັບການບັນເທົາທຸກໄພພິບັດ (ARF ISM on Disaster Relief) ສໍາລັບຊຸມປີຕໍ່ໜ້າ, ພ້ອມດຽວກັນ, ກອງປະຊຸມຍັງໄດ້ຢໍ້າຄືນຄວາມສໍາຄັນຂອງຫລັກການໃນການປຶກສາຫາລື ແລະ ຖືເອົາການຕົກລົງດ້ວຍຄວາມເປັນເອກະສັນ ແລະ ດໍາເນີນໄປໃນຈັງຫວະທີ່ທຸກຝ່າຍມີຄວາມສະບາຍໃຈ ສໍາລັບການຮ່ວມມືໃນຂອບເວທີພາກພື້ນອາຊຽນໃນອະນາຄົດ.

- WhatsApp Image 2020 05 27 at 5 - ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25
- WhatsApp Image 2020 05 27 at 5 - ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 19, ກອງປະຊຸມລັດຖະມົນຕີຕ່າງປະເທດສຸດຍອດອາຊີຕາເວັນອອກຄັ້ງທີ 8 ແລະ ກອງປະຊຸມເວທີພາກພື້ນອາຊຽນຄັ້ງທີ 25
error: Alert: ເນື້ອຫາຂ່າວມີລິຂະສິດ !!