ກົງໂກຢືນຢັນພົບຜູ້ເສຍຊີວິດແລ້ວ 9 ຄົນ ຈາກໄວຣັສອີໂບລາກັບມາລະບາດໃໝ່
ກະຊວງສາທາລະນະສຸກສາທາລະນະລັດ ປະຊາທິປະໄຕ ກົງໂກ ຖະແຫລງວ່າ: ມີລາຍງານຢືນຢັນພົບຜູ້ເສຍຊີວິດຈາກເຊື້ອໄວຣັສອີໂບລາແລ້ວ 9 ຄົນ ນັບແຕ່ພົບເຊື້ອໄວຣັສດັ່ງກ່າວກັບມາລະບາດໃໝ່ໃນເດືອນນີ້.
ລາຍງານຢ່າງເປັນທາງການກ່ອນໜ້ານີ້ລະບຸວ່າ: ພົບຜູ້ເສຍຊີວິດ 7 ຄົນ ແລະ ພົບຜູ້ເສຍຊີວິດເພີ່ມອີກ 2 ຄົນໃນເຂດເບນີ ແຂວງນໍຄິວູ ເຊິ່ງເປັນພື້ນທີ່ທາງຕາເວັນອອກທີ່ມີຊາຍແດນຕິດກັບອູກັນດາ ແລະ ຣາວັນດາ. ກະຊວງສາທາລະນະສຸກກົງໂກຫາກໍປະກາດໃນວັນທີ 1 ສິງຫາວ່າ: ພົບການລະບາດກັບມາໃໝ່ເປັນຄັ້ງທີ 10 ນັບແຕ່ປີ 1976 ເປັນຕົ້ນມາ. ການລະບາດໃນພື້ນທີ່ທາງຕາເວັນຕົກສຽງເໜືອຂອງປະເທດ ເຊິ່ງຫາກໍມີການປະກາດວ່າ: ການລະບາດຢຸດລົງໃນເດືອນກໍລະກົດຜ່ານມາ ພົບຜູ້ເສຍຊີວິດ 33 ຄົນ. ກະຊວງສາທາລະນະສຸກລະບຸວ່າ: ມີລາຍງານພົບຜູ້ສຳຜັດເຊື້ອໄວຣັສເກືອບ 1.000 ຄົນໃນເຂດທີ່ມີການເຝົ້າລະວັງ ແລະ ກຳລັງສົ່ງເຈົ້າໜ້າທີ່ 12 ທີມອອກໄປສັກວັກແຊງຕາມພື້ນທີ່ທີ່ພົບການລະບາດ.
