ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ

- PM meeting - ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ
- Untitled design - ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ

ໃນໂອກາດໂອ້ລົມກອງປະຊຸມລັດຖະບານສະໄໝວິສາມັນປະຈໍາເດືອນສິງຫາ 2018 ຊຶ່ງຈັດຂຶ້ນໃນວັນທີ 6-7 ສິງຫານີ້ ຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ທຸກພາກສ່ວນກ່ຽວຂ້ອງຕ່າງໆສຸມຄວາມພະຍາຍາມ ແລະ ນຳໃຊ້ກໍາລັງແຮງທີ່ມີສົມທົບກັບກຳລັງຊ່ວຍເຫລືອຈາກບັນດາປະເທດເພື່ອນມິດ ແລະ ສາກົນ ເພື່ອສືບຕໍ່ຊອກຄົ້ນຫາຜູ້ສູນຫາຍທີ່ອາດຈະຍັງມີຊີວິດເພື່ອນຳມາຢູ່ບ່ອນປອດໄພ, ໄປຄຽງຄູ່ການສືບຕໍ່ຄົ້ນຫາຜູ້ເສຍຊີວິດໃຫ້ພົບເຫັນ ແລະ ເກັບກູ້ສົບໃຫ້ໄດ້ໂດຍໄວ ເພື່ອສັນນະສູດສົບ ແລະ ນໍາໄປທໍາພິທີທາງສາສະໜາ, ສືບຕໍ່ສ້າງສະຖານທີ່ພັກເຊົາໃຫ້ຜູ້ປະສົບໄພທີ່ອົບພະຍົບມາເຕົ້າໂຮມຢູ່ສູນພັກເຊົາຕ່າງໆໃຫ້ໄວ ແລະ ພຽງພໍກັບຄວາມຕ້ອງການທີ່ຈຳເປັນໃນເບື້ອງຕົ້ນ ເພື່ອໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍດີ, ສືບຕໍ່ເອົາໃຈໃສ່ເບິ່ງແຍ່ງຜູ້ປະສົບໄພໃຫ້ດີ, ໂດຍສະເພາະທາງດ້ານອາຫານການກິນ, ນໍ້າດື່ມນ້ຳໃຊ້, ທາງດ້ານສຸຂະພາບ, ປ້ອງກັນບໍ່ໃຫ້ເກີດພະຍາດລະບາດ, ປົວແປງທາງດ້ານຈິດໃຈ ແລະ ສືບຕໍ່ຊ່ວຍສົງເຄາະ ແລະ ເຮັດວຽກງານສະຫວັດດີການອື່ນໆໃຫ້ດີ, ເອົາໃຈໃສ່ວຽກງານຈັດແຈງ, ຈັດສົ່ງ ແລະ ແຈກຍາຍອຸປະກອນເຄື່ອງມື ແລະ ເຄື່ອງຊ່ວຍເຫລືອບັນເທົາທຸກທີ່ມີຄວາມຕ້ອງການຈຳເປັນຮີບດ່ວນ, ພ້ອມສ້າງເງື່ອນໄຂໃຫ້ປະຊາຊົນໄດ້ມີຊີວິດຢູ່ຢ່າງປອດໄພ, ສ້າງສິ່ງສາທາລະນຸປະໂພກໃຫ້ມີຄວາມສະດວກ ແລະ ສືບຕໍ່ຄຸ້ມຄອງເຄື່ອງບັນເທົາທຸກ ແລະ ແຈກຍາຍໃຫ້ທົ່ວເຖິງ, ຄຸ້ມຄອງເງິນຊ່ວຍເຫລືອ ແລະ ນໍາໃຊ້ຢ່າງຮັດກຸມ, ໂປ່ງໃສ ແລະ ສາມາດກວດກາໄດ້.

ກອງປະຊຸມຄັ້ງນີ້, ໄດ້ແຕ່ງຕັ້ງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ທັງເປັນປະທານອົງການກວດກາລັດຖະບານ ເປັນຫົວໜ້າຄະນະຮັບຜິດຊອບສືບສວນ-ສອບສວນເຫດການໄພພິບັດຄັ້ງນີ້, ໂດຍສາມາດຮັບເອົາການຊ່ວຍເຫລືອທາງດ້ານການເງິນ, ເຕັກນິກ ແລະ ຊ່ຽວຊານຈາກຕ່າງປະເທດທີ່ມີມາດຕະຖານສາກົນມາຊ່ວຍພິສູດ, ກວດກາທາງດ້ານເຕັກນິກ, ຊອກໃຫ້ເຫັນສາເຫດທີ່ພາໃຫ້ມີການແຕກຫັກຂອງເຂື່ອນ ແລະ ສາມາດເຊີນຕົວແທນຂອງລັດຖະບານປະເທດທີ່ມີບໍລິສັດຜູ້ປະກອບການ ແລະ ຂາຮຸ້ນ ທີ່ຈົດທະບຽນມາໃຫ້ຄຳປຶກສາ ຫລື ສັງເກດການ, ເພື່ອແນໃສ່ໃຫ້ການສືບສວນ-ສອບສວນ ມີຄຸນນະພາບ, ມີຄວາມໂປ່ງໃສ ແລະ ເປັນທີ່ຍອມຮັບຕໍ່ທັງພາຍໃນ ແລະ ຕ່າງປະເທດ ແລະ ພາຍຫລັງຜົນການສືບສວນ-ສອບສວນອອກມາແລ້ວ ຈຶ່ງດຳເນີນການໃນບາດກ້າວຕໍ່ໆໄປ, ພ້ອມນັ້ນ ກອງປະຊຸມຍັງໄດ້ແຕ່ງຕັ້ງຄະນະກໍາມະການລະດັບສູງຂອງລັດຖະບານ ເພື່ອກວດກາເຖິງຄວາມຮັບຜິດຊອບ ຂອງເຈົ້າໜ້າທີ່ລັດກ່ຽວຂ້ອງກັບການອະນຸມັດການກໍ່ສ້າງ ຕະຫລອດເຖິງການເຕືອນໄພລ່ວງໜ້າຕ່າງໆທີ່ພົວພັນກັບເຫດການທີ່ເກີດຂຶ້ນນີ້ ພາຍໃຕ້ການຊີ້ນຳຂອງທ່ານ ບຸນທອງ ຈິດມະນີ. ນອກນີ້, ກອງປະຊຸມໄດ້ຕົກລົງໃຫ້ຄະນະກຳມະການສະເພາະກິດແກ້ໄຂໄພພິບັດລະດັບຊາດ ແຕ່ງຕັ້ງຄະນະເພື່ອດຳເນີນການປະເມີນຜົນເສຍຫາຍ ແລະ ຜົນກະທົບຂອງໄພພິບັດຄັ້ງນີ້ໂດຍໄວ, ພ້ອມທັງໃຫ້ຄະນະດັ່ງກ່າວສ້າງຕັ້ງໜ່ວຍງານຂຶ້ນ ເພື່ອສ້າງແຜນຟື້ນຟູໄພພິບັດທັງສະເພາະໜ້າ ແລະ ຍາວນານ ເພື່ອລາຍງານລັດຖະບານ ແລະ ກຳນົດບູລິມະສິດຂອງການລົງທຶນ, ຈັດສັນງົບປະມານ ແລະ ເລີ່ມລົງມືດໍາເນີນການຟື້ນຟູໂດຍໄວ ພາຍຫລັງນ້ຳຫລຸດລົງ, ແຕ່ງຕັ້ງຄະນະຮັບຜິດຊອບກວດກາຄືນທາງດ້ານເຕັກນິກ ແລະ ຄຸນນະພາບໃນການກໍ່ສ້າງ ແລະ ພັດທະນາເຂື່ອນຕ່າງໆ ທີ່ກຳລັງກໍ່ສ້າງ ແລະ ກໍ່ສ້າງສຳເລັດແລ້ວໃນທົ່ວປະເທດ, ໂດຍມອບໃຫ້ກະຊວງພະລັງງານ ແລະ ບໍ່ແຮ່ ເປັນເຈົ້າການສົມທົບກັບກະຊວງໂຍທາທິການ ແລະ ຂົນສົ່ງ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງວິທະຍາສາດ ແລະ ເຕັກໂນໂລຊີ ແລະ ຊ່ຽວຊານຈາກສາກົນ ຖ້າກວດເຫັນສິ່ງຜິດປົກກະຕິ ໃນການອອກແບບ ຫລື ມາດຕະຖານກໍ່ສ້າງບໍ່ຮັບປະກັນ ກໍໃຫ້ລາຍງານລັດຖະບານເປັນແຕ່ລະກໍລະນີ ເພື່ອເອົາມາດຕະການປັບປຸງແກ້ໄຂ, ພ້ອມນີ້ລັດຖະບານ ຈະໃຫ້ໂຈະຊົ່ວຄາວໃນການພິຈາລະນາຮັບເອົາການສະເໜີໂຄງການໃໝ່ໄວ້ກ່ອນ ເພື່ອສຶກສາຄືນໃໝ່ດ້ານຍຸດທະສາດ ແລະ ແຜນພັດທະນາເຂື່ອນໄຟຟ້າໃນ ສປປ ລາວ ເພື່ອເປັນບ່ອນອີງໃຫ້ການດຳເນີນການໃນຕໍ່ໜ້າ.

- Wave100S AD to Website 2020 0 - ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ
- WhatsApp Image 2020 05 27 at 5 - ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ
- WhatsApp Image 2020 05 27 at 5 - ນາຍົກເນັ້ນການສືບສວນສາເຫດເຂື່ອນເຊປຽນ-ເຊນໍ້ານ້ອຍທະລຸຕ້ອງຮັບປະກັນຄຸນນະພາບ ແລະ ໂປ່ງໃສ
error: Alert: ເນື້ອຫາຂ່າວມີລິຂະສິດ !!