ກະຊວງອຸດສາຫະກຳ ແລະ ການຄ້າຫວຽດນາມມອບເງິນຊ່ວຍເຫລືອຜູ້ປະສົບໄພພິບັດ ຢູ່ແຂວງອັດຕະປື 2 ຕື້ດົງ
ໃນວັນທີ 6 ສິງຫານີ້, ສະຖານທູດລາວທີ່ຮ່າໂນ້ຍ ສສ.ຫວຽດນາມ ໄດ້ຮັບເງິນຊ່ວຍເຫລືອຈາກກະຊວງອຸດສາຫະກຳ ແລະ ການຄ້າຫວຽດນາມຈຳນວນ 2 ຕື້ດົງ (ສະກຸນເງິນຫວຽດນາມ) ຊຶ່ງມອບໂດຍທ່ານ ເຈິ່ນກວກແຄ໋ງ ຮອງລັດຖະມົນຕີກະຊວງດັ່ງກ່າວ ເພື່ອປະກອບສ່ວນຊ່ວຍເຫລືອຜູ້ປະສົບໄພພິບັດ ຢູ່ແຂວງອັດຕະປື.
ທ່ານ ເຈິ່ນກວກແຄ໋ງ ກ່າວວ່າ: ເງິນຈຳນວນດັ່ງກ່າວ ເພື່ອແບ່ງເບົາຄວາມສູນເສຍຕໍ່ໄພພິບັດທີ່ເກີດຂຶ້ນກັບປະຊາຊົນລາວຢູ່ແຂວງອັດຕະປື, ພ້ອມຢືນຢັນວ່າ: ພັກ-ລັດຖະບານ ພ້ອມຈະໃຫ້ການຊ່ວຍເຫລືອຜູ້ທີ່ໄດ້ຮັບຜົນກະທົບຈາກໄພພິບັດທີ່ເກີດຂຶ້ນບົນພື້ນຖານສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ ເພື່ອພ້ອມກັນແກ້ໄຂຄວາມຫຍຸ້ງຍາກ ແລະ ຜົນກະທົບຈາກໄພພິບັດດັ່ງກ່າວໃຫ້ກັບຄືນສູ່ສະພາບປົກກະຕິໂດຍໄວ.
ທ່ານ ທອງສະຫວັນ ພົມວິຫານ ເອກອັກຄະລັດຖະທູດ ສປປ ລາວ ປະຈໍາ ສສ.ຫວຽດນາມ ໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈມາຍັງພັກ-ລັດຖະບານ ແລະ ປະຊາຊົນຫວຽດນາມ ທີ່ມີຄວາມເປັນຫ່ວງເປັນໄຍຕໍ່ຜົນກະທົບຂອງໄພພິບັດທີ່ເກີດຂຶ້ນຢູ່ແຂວງອັດຕະປືຄັ້ງນີ້ ແລະ ຈະນໍາເອົາເງິນຊ່ວຍເຫລືອດັ່ງກ່າວໄປນຳໃຊ້ເຂົ້າໃນການແກ້ໄຂໄພພິບັດທີ່ເກີດຂຶ້ນໃຫ້ມີປະສິດທິຜົນສູງສຸດ.
