ເສດຖະກິດຍີ່ປຸ່ນຂະຫຍາຍຕົວຫລັງໄຕມາດ ທຳອິດຫົດຕົວເທື່ອທຳອິດໃນຮອບສອງປີ
ເສດຖະກິດຍີ່ປຸ່ນໄຕມາດເດືອນເມສາ-ມິຖຸນາຂະຫຍາຍຕົວ 0,5% ຕໍ່ໄຕມາດ ທຽບໃສ່ໄຕມາດເດືອນມັງກອນ-ມີນາຫລຸດລົງ 0,2% ຕໍ່ໄຕມາດ ເປັນການຂະຫຍາຍຕົວເທື່ອທຳອິດຫລັງຈາກຫລຸດລົງເທື່ອທຳອິດໃນຮອບສອງປີ.
ຂໍ້ມູນຂອງສຳນັກງານນາຍົກລັດຖະມົນຕີຍີ່ປຸ່ນດີກວ່າທີ່ຕະຫລາດຄາດໝາຍ ສະທ້ອນວ່າເສດຖະກິດຍີ່ປຸ່ນສາມາດຟື້ນຕົວຢ່າງວ່ອງໄວ ຫລັງຈາກໄຕມາດທຳອິດຂອງປີນີ້ຫລຸດລົງເປັນເທື່ອທຳອິດຈາກທີ່ຂະຫຍາຍຕົວຕິດຕໍ່ກັນ 8 ໄຕມາດ ຫລື 2 ປີ. ເຖິງຢ່າງໃດກໍດີ, ນັກວິເຄາະເຕືອນວ່າ: ສົງຄາມການຄ້າທີ່ອາເມລິກາເປັນຜູ້ລິເລີ່ມອາດເປັນປັດໄຈສ່ຽງຕໍ່ເສດຖະກິດຍີ່ປຸ່ນທີ່ຍັງພະຍາຍາມຫາທາງຫລຸດພົ້ນຈາກສະພາບເສດຖະກິດເງິນຝືດ ໂດຍສະເພາະເລື່ອງທີ່ປະທານາທິບໍດີ ໂດນັລ ທຣຳ ຂອງອາເມລິກາ ຂູ່ຈະເກັບພາສີອັດຕາສູງກັບລົດຍົນນຳເຂົ້າຈາກຍີ່ປຸ່ນ ເນື່ອງຈາກອຸດສາຫະກຳລົດຍົນມີທຸລະກິດກ່ຽວຂ້ອງຈຳນວນຫລາຍ. ການເກັບພາສີຂອງອາເມລິກາຈຶ່ງຈະມີຜົນກະທົບໃນວົງກວ້າງ ອາດຈະສ້າງຄວາມເສຍຫາຍໃຫ້ອຸດສາຫະກຳລົດຍົນສູງເຖິງ 10.000 ລ້ານໂດລາສະຫະລັດ.
ນອກຈາກນີ້ ການຂູ່ເກັບພາສີຂອງອາເມລິກາຈະກະທົບຕໍ່ນະໂຍບາຍເສດຖະກິດຂອງນາຍົກລັດຖະມົນຕີ ຊິນໂຊ ອາເບະ ຫລື ອາເບະໂນມິກ ທີ່ໃຊ້ນະໂຍບາຍການເງິນແບບຫລຸດຜ່ອນກັບມາດຕະຫລາດກະຕຸ້ນການເງິນ ນັບແຕ່ເຂົ້າຮັບຕຳແໜ່ງໃນທ້າຍປີ 2012 ແລະ ຫວັງຈະຊະນະການເລືອກຕັ້ງປະທານພັກເສລີປະຊາທິປະໄຕ (LDP) ໃນເດືອນກັນຍານີ້, ແຕ່ການໃຊ້ຈ່າຍຂອງຜູ້ບໍລິໂພກຍັງຊຸດໂຊມ. ຂະນະທີ່ຂະແໜງທຸລະກິດຍັງບໍ່ຂຶ້ນຄ່າຈ້າງ ເຖິງວ່າມີກຳໄລຫລາຍຂຶ້ນ.
