ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ

- sonexayy - ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ
- Untitled design - ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ

ໃນຕອນເຊົ້າວັນທີ 9 ສິງຫານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໄປຢ້ຽມຢາມໂຄງການສື່ສານຮັບໃຊ້ການນຳ ແລະ ພາກລັດບໍລິຫານ ທີ່ກະຊວງປ້ອງກັນປະເທດ ເພື່ອເບິ່ງຄວາມເປັນໄປໄດ້ໃນການຂະຫຍາຍສາຍໄຍແກ້ວໄປສູ່ເມືອງສະໜາມໄຊ ແຂວງອັດຕະປື.

ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານຂອງໂຄງການດັ່ງກ່າວ ແມ່ນການຈັດຕັ້ງປະຕິບັດວຽກງານເຕັກໂນໂລຊີສື່ສານ ແລະ ຂໍ້ມູນຂ່າວສານ (ICT) ​ເພື່ອ​ແນ​ໃສ່ຮັບໃຊ້ການນໍາ, ສ້າງຕັ້ງຂຶ້ນໃນລະຫວ່າງປີ 1999 ຫາ 2000 ​ແລະ ມີໜ້າທີ່ພັດທະນາລະບົບໂທລະຄົມມະນາຄົມ ຕິດພັນກັບຄວາມໝັ້ນຄົງ, ຮັບປະກັນໃຫ້ການນໍາພັກ-ລັດ, ວຽກງານປ້ອງກັນຊາດ-ປ້ອງກັນຄວາມສະຫງົບ; ພັດທະນາລະບົບໂທລະຄົມມະນາຄົມທາງດ້ານເສດຖະກິດ ຮັບໃຊ້ສາທາລະນະ ແລະ ດໍາເນີນເສດຖະກິດຕາມກົນໄກການຕະຫຼາດ ເພື່ອສ້າງຄວາມເຂັ້ມແຂງໃຫ້ບໍລິສັດລັດສະກາຍໂທລະຄົມ ສາມາດດຳເນີນການເຄື່ອນໄຫວຢ່າງເປັນປົກກະຕິ ລະບົບສາຍ​ໄຍແກ້ວ, ລະບົບເຄື່ອງສົ່ງ, ສະຖານີ, ສູນກາງອິນເຕີເນັດ, ສູນກາງໂທລະສັບໄອພີ, ສູນກາງໂທລະພາບໄອພີ, ລະບົບສືບຂ່າວ (ລວມທັງລະບົບປ້ອງກັນ), ລະບົບປະຊຸມທາງໄກ, ສູນຂໍ້ມູນ, ສູນກາງກ້ອງວົງຈອນປິດ, ສູນກາງຄອມພິວເຕີ ແລະ ອື່ນໆ. ພ້ອມ​ນີ້, ທ່ານຮອງນາຍົກລັດຖະມົນຕີ ໄດ້ມີຄຳເຫັນເຈາະຈິ້ມເຖິງລາຍລະອຽດຕ່າງໆໃນການນຳໃຊ້ລະບົບຕ່າງໆ ໂດຍສະເພາະແມ່ນລະບົບທີ່ຕິດພັນກັບການຮັບໃຊ້ບໍລິຫານລັດ, ການປ້ອງກັນຊາດ-ປ້ອງກັຄວາມສະຫງົບ, ການຮັບໃຊ້ສັງຄົມ, ຄວາມຄືບໜ້າ ກໍຄືຄວາມສາມາດໃນການນຳໃຊ້ຂອງລະບົບຕ່າງໆ, ຂໍ້ສະດວກ, ຂໍ້ຈຳກັດ ແລະ ທິດທາງແຜນການພັດທະນາໃນຕໍ່ໜ້າ. ພ້ອມກັນນັ້ນ, ທ່ານຍັງໄດ້ໄປເບິ່ງພື້ນຖານໂຄງລ່າງ, ການຈັດຕັ້ງປະຕິບັດວຽກງານຕົວຈິງຂອງພະນັກງານ-ວິຊາການ ລວມທັງເຄື່ອງໃຊ້ ແລະ ອຸປະກອນຕ່າງໆທີ່ມີຢູ່ໃນຕຶກສຳນັກງານໂຄງການສື່ສານຮັບໃຊ້ການນຳ ​ໂດຍທ່ານຮອງນາຍົກລັດຖະມົນຕີ ໄດ້ຊີ້ນຳໃຫ້ຄະນະຮັບຜິດຊອບໂຄງການດັ່ງກ່າວສ້າງແຜນການຂະຫຍາຍສາຍ​ໄຍແກ້ວໄປສູ່ເມືອງສະໜາມໄຊ ແຂວງອັດຕະປື ໃຫ້ໄວ ໄປຄຽງຄູ່ກັບແຜນການຂະຫຍາຍໄປສູ່ເມືອງຕ່າງໆໃນຂອບເຂດທົ່ວປະເທດ ໂດຍຈັດລຽງເປັນບູລິມະສິດ ແລະ ແທດເໝາະກັບເງື່ອນໄຂຕົວຈິງຄັກແນ່, ແລ້ວສະເໜີຂັ້ນເທິງພິຈາລະນາຮັບຮອງ ແລະ ຊີ້ນຳໃນຂັ້ນຕໍ່ໄປ ເຊິ່ງແຜນການອັນຮີບດ່ວນນີ້ ແມ່ນເລັ່ງໃສ່ຮັບໃຊ້ເຂົ້າໃນການຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຢູ່ເມືອງສະໜາມໄຊໃຫ້ກັບຄືນສູ່ສະພາບປົກກະຕິໂດຍໄວ ໂດຍສະເພາະແມ່ນວຽກງານສື່ສານ, ການປະສານງານ, ການໂຄສະນາເຜີຍແຜ່, ການປະຊຸມທາງໄກ ແລະ ອື່ນໆ ໃຫ້ມີຄວາມສະດວກ, ວ່ອງໄວ, ທັນການ ແລະ ມີປະສິດທິຜົນ, ພ້ອມທັງ ສາມາດສະກັດກັ້ນໄດ້ ບັນດາປາກົດການຫຍໍ້ທໍ້ຕ່າງໆ ແລະ ກາຍເປັນພື້ນຖານໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດໃນສະເພາະໜ້າ ແລະ ຍາວນານອີກດ້ວຍ. ນອກຈາກນັ້ນ, ທ່ານຮອງນາຍົກລັດ ຖະມົນຕີ ຍັງໄດ້ຊີ້ນຳໃຫ້ຄົ້ນຄວ້າຫາຊ່ອງທາງໃນການບໍລິການຮັບໃຊ້ສັງຄົມໃຫ້ກວ້າງຂວາງກວ່າເກົ່າ ເພື່ອເຮັດໃຫ້ການນຳໃຊ້ເງື່ອນໄຂທ່າແຮງທີ່ມີໃຫ້ເກີດປະໂຫຍດສູງສຸດຕໍ່ການຈັດຕັ້ງຂອງຕົນ ກໍຄືປະເທດຊາດ ແລະ ປະຊາຊົນ, ໃນນັ້ນແມ່ນໃຫ້ເອົາໃຈໃສ່ການເຄື່ອນໄຫວຖືກຕ້ອງຕາມລະບຽບກົດໝາຍ ແລະ ສົນທິສັນຍາສາກົນຕ່າງໆ, ຮັບປະກັນຄວາມປອດໄພ ກໍຄືຄວາມໝັ້ນຄົງຂອງຊາດ.

- Wave100S AD to Website 2020 0 - ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ
- WhatsApp Image 2020 05 27 at 5 - ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ
- WhatsApp Image 2020 05 27 at 5 - ຮອງນາຍົກລັດຖະມົນຕີ ມີ​ທິດ​ຂະຫຍາຍ​ລະບົບ​ສາຍ​ໄຍ​ແກ້ວ​ສູ່​ເຂດ​ປະສົບ​ໄພ​ເມືອງ​ສະໜາມ​ໄຊ
error: Alert: ເນື້ອຫາຂ່າວມີລິຂະສິດ !!