ຂ່າວລາວເຖິງຄາວຕ້ອງປ່ຽນແປງ!

- advert banner 728 90 728x90 - ຂ່າວລາວເຖິງຄາວຕ້ອງປ່ຽນແປງ!

ໂດຍ : ມຶກບໍ່ແຫ້ງ

 ເຫດການເຂື່ອນແຕກຢູ່ເມືອງສະໜາມໄຊ ບວກກັບໄພນໍ້າຖ້ວມຢູ່ຫຼາຍເຂດແຂວງຂອງລາວປີນີ້ ຊີ້ໃຫ້ເຫັນວ່າ ຄົນລາວ ກຳລັງຕ້ອງການຂ່າວ ທີ່ມີຄຸນນະພາບ, ວ່ອງໄວ, ໜ້າເຊື່ອຖື ແລະເຂົ້າເຖິງໄດ້ງ່າຍ ແຕ່ສິ່ງທີ່ເຮົາມີ ພຽງພໍລະບໍ່?

ຈາກເຫດການທີ່ຄົນລາວຈຳນວນຫຼາຍພັນຄົນ ໜີຕາຍຍ້ອນອຸບັດເຫດ ເຂື່ອນໄຟຟ້າເຊປຽນ-ເຊນໍ້ານ້ອຍ ແຕກໃນວັນທີ 23​ ກໍລະກົດ 2018​ ຜ່ານມາ ບວກກັບ ໄພນໍ້າຖ້ວມ ຢູ່ຫຼາຍເຂດແຂວງ ທີ່ນັບມື້ນັບຖີ່ ແລະຮຸນແຮງຂຶ້ນນັ້ນ ເຮັດໃຫ້ຄົນລາວ ມີໃຈຈົດຈໍ່ ແລະມີຄວາມຫິວໂຫຍຂ່າວ ຢ່າງເຫັນໄດ້ຊັດ ໂດຍສະເພາະ ເຫດເຂື່ອນແຕກຢູ່ເມືອງສະໜາມໄຊ ທີ່ກາຍເປັນ ຂ່າວລະດັບໂລກ ກໍວ່າໄດ້ ເພາະ ແຫຼ່ງຂ່າວ ບີຊີຊີ (BCC) ຂອງອັງກິດໄດ້ອອກຂ່າວວັນທີ 24 ກໍລະກົດ ພາຍຫຼັງມື້ເກີດເຫດ ໂດຍພາດຫົວຂໍ້ຂ່າວວ່າ: “ເຂື່ອນລາວແຕກ ຫຼາຍຄົນຕາຍ ເພາະນໍ້າຖ້ວມຫຼາຍໝູ່ບ້ານ”

ຫຼັງຈາກນັ້ນ, ແຫຼ່ງຂ່າວຊື່ດັງລະດັບໂລກ ເຊັ່ນ ອາລຊີລາ (Aljazeera) ກໍໄດ້ອອກຂ່າວວັນທີ 24 ກໍລະກົດ ແລະ ຊີເອັນເອັນ (CNN) ໄດ້ອອກຂ່າວວັນທີ 25 ກໍລະກົດ ເຊິ່ງສັງເກດເຫັນວ່າ ບັນດາແຫຼ່ງຂ່າວເຫຼົ່ານັ້ນ ຕັ້ງແມ່ນ ໄວແທ້ໆ!

ພ້ອມນັ້ນ ແຫຼ່ງຂ່າວອອນລາຍ ຂອງລາວ ຫຼາຍສຳນັກ ໄດ້ປະກາດຕົນເຕັມຕົວ ໃນການດຶງເອົາຄວາມສົນໃຈຂອງຜູ້ຄົນ ຈຳນວນຫຼາຍໃນການຕິດຕາມ ຜ່ານເຟສບຸກ (Facebook) ໂດຍມີການອັບເດດເຫດການ ໃນໄລຍະຫ່າງ 1 ຊົ່ວໂມງ ຫຼືໜ້ອຍກວ່ານັ້ນ, ພ້ອມນີ້ແຫຼ່ງຂ່າວ ຂອງປະເທດ ເພື່ອນບ້ານ ກໍເປັນສິ່ງປະຊາຊົນລາວ ເຂົ້າເຖິງຫຼາຍທີ່ສຸດ ແລະເຂົາເຈົ້າກໍລາຍງານແບບວ່າ ເຂັ້ມຂຸ້ນທີ່ສຸດ.

ແຕ່ຢ່າງໃດກໍຕາມ, ປະຊາຊົນຈຳນວນຫຼວງຫຼາຍ ອອກມາກ່າວຕຳໜິວ່າ ແຫຼ່ງຂ່າວທາງການຂອງລາວຍັງຊັກຊ້າ, ບໍ່ທັນເຫດການ ເພາະໂທລະພາບບາງຊ່ອງ ແມ່ນດຳເນີນລາຍການຕາມປົກກະຕິ ເຖິງແມ່ນວ່າເຫດເຂື່ອນແຕກ ນັ້ນ ໄດ້ເຜີຍແຜ່ໄປທົ່ວໂລກ ຜ່ານ ສື່ອອນລາຍ (ເຟສບຸກ) ແລ້ວກໍຕາມ.

- Tiger Head 728x90 - ຂ່າວລາວເຖິງຄາວຕ້ອງປ່ຽນແປງ!
- 1 1 - ຂ່າວລາວເຖິງຄາວຕ້ອງປ່ຽນແປງ!

ສິ່ງດັ່ງກ່າວພວກເຮົາຄວນຍອມຮັບກັບສະພາບຄວາມເປັນຈິງໃນປັດຈຸບັນ ແລ້ວຄວນຖືເອົາເປັນບົດຮຽນຈາກ ເຫດການນີ້ ໄປປັບປຸງ, ຫັນປ່ຽນ ແລະປັບໂຕໂດຍໄວ ເພື່ອຕອບສະໜອງຂ່າວໃຫ້ທັນກັບຄວາມຕ້ອງການ ຂອງປະຊາຊົນ ໂດຍການເລັ່ງປະຕິຮູບ ຈາກລະບົບອານາລອກ (analog) ໄປສູ່ ດີຈີຕອລ (digital) ທີ່ພວກເຮົາເວົ້າເຖິງເລື່ອງ ນີ້ມາຫຼາຍປີ ພໍສົມຄວນແລ້ວ.

ພວກເຮົາຈົ່ງໝູນໃຊ້ ສື່ສັງຄົມອອນລາຍໃຫ້ເກີດຜົນປະໂຫຍດສູງສຸດ, ໃນປັດຈຸບັນ ເຟສບຸກ, ເວບໄຊ໌ ແມ່ນເປັນແຫຼ່ງຂໍ້ມູນ ຂ່າວສານ ທີ່ປະຊາຊົນເຂົ້າເຖິງໄດ້ງ່າຍທີ່ສຸດ, ອີງຕາມຂໍ້ມູນຂອງ ເວບໄຊ໌ internetworldstas.com ໃຫ້ຮູ້ວ່າ ໃນທ້າຍເດືອນ 12 ປີ 2017 ຄົນລາວທີ່ສາມາດນຳໃຊ້ ອິນເຕີເນັດ ໄດ້ຮອດ 2.4 ລ້ານຄົນ ກວມເອົາ 35​% ຂອງປະຊາກອນທັງໝົດທີມີ 6.9 ລ້ານຄົນ ໃນນັ້ນ ຜູ້ທີ່ໄດ້ຕັ້ງ ເຟສບຸກສ່ວນຕົວ ມີຫຼາຍກວ່າ 2.2​ ລ້ານຄົນ, ເພາະສະນັ້ນ ເມື່ອແຫຼ່ງຂ່າວໃດ ລາຍງານຜ່ານເຟສບຸກ ຈະສາມາດເຂົ້າເຖິງຄົນລາວ ຫຼາຍທີ່ສຸດ, ຮູ້ທົ່ວເຖິງກັນໄວຫຼາຍທີ່ສຸດ.

ອາດເປັນທຳມະດາ ທີ່ວ່າ ສິ່ງໃດວ່ອງໄວ, ງ່າຍດາຍ ອາດເປັນໄພໄດ້ງ່າຍ, ການລາຍງານຂ່າວຜ່ານທາງ ສື່ສັງຄົມອອນລາຍ ກໍເຊັ່ນກັນ ປຽບດັ່ງມີດສອງຄົມ, ຄົມໜຶ່ງນັ້ນ ເຮັດໃຫ້ເຮົາຮັບຮູ້ໄດ້ໄວ ແຕ່ອີກທາງໜຶ່ງນັ້ນ ພວກເຮົາອາດຕົກເປັນເຫຍື່ອ ຂອງຂ່າວອັນຈອມປອມ, ໃສ່ຮ້າຍປ້າຍສີ ໂດຍສະເພາະ ຂ່າວອອນລາຍ ບາງກຸ່ມ, ຂ່າວຕ່າງປະເທດບາງສຳນັກ, ອັນນີ້ຄົນລາວຕ້ອງມີສະຕິ ແລະຮຽນຮູ້ຫຼາຍຂຶ້ນວ່າ ສິ່ງໃດຄວນເຊື່ອຖື ກ່ອນຈະແບ່ງປັນໃຫ້ຜູ້ອື່ນຮັບຮູ້ນຳ.

ເພາະສະນັ້ນ, ຂ່າວລາວ ຄວນໄດ້ຮັບການປັບປຸງ ໃຫ້ມີຄວາມວ່ອງໄວ ທັນເຫດການ, ມີຄວາມຊັດເຈນ ເຂົ້າໃຈງ່າຍ, ເກົາໃຫ້ຖືກບ່ອນຄັນ ມັນຈຶ່ງເປັນຕາອ່ານຫຼາຍຂຶ້ນ.

error: Content is protected !!