ລັດຖະມົນຕີ ກະຊວງກະສິກໍາ ແລະ ປ່າໄມ້ລົງຊີ້ນໍາຄະນະຜັນຂະຫຍາຍດໍາລັດ 348/ລບ ແລະ ບົດແນະນໍາ 0830/ກປ
ໃນວັນທີ 10 ສິງຫາ ນີ້, ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ພ້ອມຄະນະ ໄດ້ລົງຊີ້ນໍາຄະນະຜັນຂະຫຍາຍ ດໍາລັດ 348/ລບ ແລະບົດແນະນໍາ 0830/ກປ ກ່ຽວກັບ ມາດຕະຖານພົ້ນທຸກ ແລະມາດຕະຖານພັດທະນາ ຢູ່ບ້ານໃຫຍ່ຈອມທອງ ເມືອງ ວຽງທອງ ແຂວງບໍລິຄໍາໄຊ. ເພື່ອຮັບປະກັນໃຫ້ການເຮັດທົດລອງ ດໍາລັດ ແລະ ບົດແນະນໍາດັ່ງກ່າວ, ກ່ຽວກັບ ມາດຕະຖານພົ້ນທຸກ ແລະ ມາດຕະຖານພັດທະນາ ຢູ່ບ້ານແຫ່ງນີ້ໃຫ້ໄດ້ຮັບຜົນ ໂດຍສະເພາະ ການນໍາສະເໜີແບບຟອມ ເກັບກໍາຂໍ້ມູນມາດຕະຖານພົ້ນທຸກ ແລະ ມາດຕະຖານພັດທະນາ ຂັ້ນຄອບຄົວ(F1), ແບບຟອມເກັບກໍາຂໍ້ມູນມາດຕະຖານພົ້ນທຸກ ແລະມາດຕະຖານພັດທະນາ ຂັ້ນບ້ານ(F2), ແບບຟອມເກັບກໍາຂໍ້ມູນຕາມມາດຕະຖານສ້າງບ້ານໃຫຍ່ ເປັນຕົວເມືອງນ້ອຍໃນຊົນນະບົດ(F3), ແບບຟອມເກັບກໍາຂໍ້ມູນມາດຕະຖານເມືອງພົ້ນທຸກ ແລະເມືອງເຂັ້ມແຂງຮອບດ້ານ (F4) ແລະ ແນະນໍາວິທີການຄົ້ນຄວ້າ ແຕ່ລະກຸ່ມມາດຕະຖານ ແລະ ວິທີການດໍາເນີນເກັບກໍາຂໍ້ມູນຄອບຄົວ. ນອກນີ້, ໄດ້ມີການຈັດແບ່ງກຸ່ມເພື່ອຄົ້ນຄວ້າ ໃຫ້ລະອຽດໂດຍມີຄະນະນໍາສູນກາງ, ແຂວງ, ເມືອງ ແລະ ວິຊາການ ປະສານສົມທົບກັນ ແລະ ຜ່ານການເຮັດວຽກໃນເບື້ອງຕົ້ນເຫັນໄດ້ວ່າ ທຸກພາກສ່ວນມີຄວາມຕັ້ງໃຈ ແລະ ເຮັດສໍາເລັດຕາມລະດັບຄາດໝາຍ.
ໃນໂອກາດດັ່ງກ່າວທ່ານ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ສະເໜີໃຫ້ການຈັດຕັ້ງປະຕິບັດວຽກງານການເຮັດທົດລອງດັ່ງກ່າວ ເອົາໃຈໃສ່ຕິດຕາມກວດກາການເກັບກໍາຂໍ້ມູນໃຫ້ລະອຽດ ພ້ອມທັງ, ສະຫຼຸບປະເມີນຜົນຕາມຄວາມຂໍ້ມູນຄວາມຈິ່ງທີ່ໄດ້ສໍາຫຼວດມາ. ພ້ອມນີ້ ສະເໜີໃຫ້ພະນັກງານລົງຮາກຖານ ຈົ່ງປະຕິບັດລະບຽບວິໄນຢ່າງເຂັ້ມງວດ ຕໍ່ການປະຕິບັດໜ້າທີ່ຂອງຕົນ ເພື່ອເຮັດໃຫ້ວຽກງານທີ່ຕົນຮັບຜິດຊອບນັ້ນ ໄດ້ຮັບຜົນສໍາເລັດຕາມລະດັບຄາດໝາຍວາງໄວ້.
