ກະຊວງສາທາເຕືອນຫ້າມບໍລິໂພກຜະລິດຕະພັນອາຫານເສີມ Lyn FS-Three ແລະ Lyn Block Burn Break Build
ວັນທີ 9 ສິງຫາຜ່ານມານີ້, ສູນຂໍ້ມູນຂ່າວສານທາງດ້ານການຄ້າ ສປປ ລາວ ໄດ້ແຈ້ງເຕືອນຫ້າມບໍລິໂພກຜະລິດຕະພັນອາຫານເສີມ Lyn FS-Three ແລະ Lyn Block Burn Break Build ຢ່າງເດັດຂາດ, ເພື່ອຫລີກລ້ຽງຜົນເສຍຫາຍທີ່ຈະເກີດຂຶ້ນ.
ຜະລິດຕະພັນອາຫານເສີມຫລຸດນໍ້າໜັກ Lyn FS-Three ແລະ Lyn Block Burn Break Build ມີລັກສະນະແຄັບຊູນສີຂາວໃນແຜງອາລູມີນຽມປລາສຕິກບັນຈຸໃນກ່ອງເຈ້ຍ, ຈາກຜົນການກວດວິເຄາະຜະລິດຕະພັນດັ່ງກ່າວພົບວ່າ: ມີສານບີຊາໂຄດິວ (Bisacodyl) ແລະ ສານໄຊບູຕຣາມິນ (Sibutramine) ຊຶ່ງເປັນສານທີ່ຫ້າມໃສ່ໃນອາຫານ ແລະ ເປັນອັນຕະລາຍຕໍ່ສຸຂະພາບ. ຊຶ່ງສານບີຊາໂຄດິວ (Bisacodyl) ມີຜົນຂ້າງຄຽງເຮັດໃຫ້ຮ່າງກາຍຂາດນໍ້າ, ລຳໃສ້ບີບຕົວ ແລະ ມີເລືອດອອກທາງຮູທະວານ. ສ່ວນສານໄຊບູ
ຕຣາມິນ (Sibutramine) ມີຜົນຂ້າງຄຽງເກີດພາວະຜິດປົກກະຕິຂອງຫລອດເລືອດຫົວໃຈ, ວິນຫົວ, ເຈັບທ້ອງ ແລະ ເປັນໄຂ້. ສະນັ້ນ, ກົມອາຫານ ແລະ ຢາ ຈຶ່ງແຈ້ງມາຍັງທ່ານຫ້າມບໍລິໂພກ ແລະ ຈຳໜ່າຍຜະລິດຕະພັນດັ່ງກ່າວ. ຖ້າຫາກເຈົ້າໜ້າທີ່ອາຫານ ແລະ ຢາ ພົບເຫັນແມ່ນຈະໄດ້ຢຶດອາຍັດ ແລະ ປະຕິບັດມາດຕະການຕາມກົດໝາຍວ່າດ້ວຍອາຫານ ສະບັບເລກທີ 33/ສພຊ, ລົງວັນທີ 24 ກໍລະກົດ 2013. ຢ່າງເຂັ້ມງວດສຳລັບຂໍ້ມູນເພີ່ມເຕີມ, ກະລຸນາພົວພັນໄດ້ທີ່ ກົມອາຫານ ແລະ ຢາ, ກະຊວງສາທາລະນະສຸກ ບ້ານສີເມືອງ, ຖະໜົນເສດຖາທີຣາດ, ນະຄອນຫຼວງວຽງຈັນ ສປປ ລາວ.
