ນ້ຳຖ້ວມຕອນໃຕ້ອິນເດຍ ຕາຍເພີ່ມເປັນ 77 ຄົນ
ເຈົ້າໜ້າທີ່ອິນເດຍແຈ້ງວ່າ: ເຫດນ້ຳຖ້ວມລັດເກຣລະ ທາງໃຕ້ຂອງປະເທດຄັ້ງຮ້າຍແຮງທີ່ສຸດໃນຮອບຫລາຍທົດສະວັດ ມີຜູ້ເສຍຊີວິດເພີ່ມເປັນ 77 ຄົນແລ້ວ.
ເຈົ້າໜ້າທີ່ແກ້ໄຂໄພພິບັດລັດເກຣລະ ເປີດເຜີຍວ່າ: ມີປະຊາຊົນອາໄສຕາມສູນບັນເທົາທຸກ 60.000 ກວ່າຄົນ, ກອງທັບບົກ ແລະ ກອງທັບເຮືອນຳເຮລິກົບແຕເລັ່ງອົບພະຍົບປະຊາຊົນທີ່ຕົກຄ້າງຕາມພື້ນທີ່ຕ່າງໆ. ຂະນະທີ່ທຸກພື້ນທີ່ລ້ວນຢູ່ພາຍໃຕ້ປະກາດເຕືອນໄພສີແດງ ເພາະຄາດວ່າຈະມີຝົນຕົກເພີ່ມໃນໄລຍະ 24 ຊົ່ວໂມງຕໍ່ໜ້າ. ບໍລິການຂົນສົ່ງທັງລົດໄຟ, ລົດໄຟໃຕ້ດິນ ແລະ ເຮືອບິນຖືກລະງັບໝົດ, ບ້ານຫລາຍຮ້ອຍແຫ່ງຈົມນ້ຳ, ຖະໜົນກວ່າ 10.000 ກິໂລແມັດເສຍຫາຍ.
ລັດເກຣລະຂຶ້ນຊື່ເລື່ອງຊາຍຫາດ, ເປັນພື້ນທີ່ທີ່ມີຝົນຕົກໜັກຊ່ວງລະດູມໍລະສຸມທຸກປີ ແຕ່ປີນີ້ເສຍຫາຍໜັກທີ່ສຸດໃນຮອບຫລາຍທົດສະວັດ. ເຊັ່ນດຽວກັບລັດຕິດກັນທີ່ເກີດນ້ຳຖ້ວມໜັກເຊັ່ນກັນ. ນາຍົກລັດຖະມົນຕີ ນາເຣນທາ ໂມດີ ກ່າວໃນວັນທີ 16 ສິງຫາວ່າ: ໄດ້ສັ່ງໃຫ້ກະຊວງປ້ອງກັນປະເທດເລັ່ງປະຕິບັດການຊ່ວຍເຫລືອ ແລະ ກູ້ໄພທົ່ວລັດເກຣລະ ແລະ ຂໍໃຫ້ຊາວລັດເກຣລະທຸກຄົນປອດໄພ.
