ມອບ-ຮັບສິ່ງເສດເຫລືືອທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວ

ພິທີມອບ-ຮັບສິ່ງເສດເຫລືອຂອງທະຫານອາເມລິກາທີ່ໄດ້ເສຍຊີວິດໃນປາງສົງຄາມຢູ່ລາວ ທີ່ຖືກຄົ້ນພົບຈາກການປະຕິບັດງານຮ່ວມໃນພາກສະໜາມລະຫວ່າງ ຄະນະວິຊາການລາວ-ອາເມລິກາຄັ້ງທີ 5 ປະຈໍາປີ 2017-2018 ຢູ່ແຂວງອຸດົມໄຊ ແລະ ແຂວງຫົວພັນ, ໄດ້ຈັດຂຶ້ນວັນທີ 14 ສິງຫານີ້ທີ່ສະໜາມບິນສາກົນແຂວງ ຫລວງພະບາງ ກ່າວ​ມອບໂດຍທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ, ຜູ້ຊີ້ນຳວຽກງານ MIA ແລະ ກ່າວຮັບໂດຍທ່ານນາງ ຣີນາ ບິດເຕີ (Rena Bitter) ເອກອັກຄະລັດຖະທູດສະຫະລັດອາເມລິກາປະຈໍາ ລາວ.

ໂດຍສືບຕໍ່ປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ຄອບຄົວ ກໍຄື ຍາດພີ່ນ້ອງຂອງທະຫານອາເມລິກາຜູ້ຫາຍສາບສູນໃນປາງສົງຄາມຢູ່ລາວ ແລະ ອີງຕາມການຮ້ອງຂໍຂອງລັດຖະບານອາເມລິກາໃນການແກ້ໄຂບັນຫາດັ່ງກ່າວ, ເລີ່ມແຕ່ປີ 1985 ເປັນຕົ້ນມາ ຄະນະວິຊາສອງຝ່າຍລາວ-ອາເມລິກາໄດ້ຮ່ວມກັນດໍາເນີນການສໍາຫລວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວທັງໝົດມີ 573 ຄົນ. ມາຮອດປັດຈຸບັນ, ລັດຖະບານລາວ ໄດ້ມອບສິ່ງເສດເຫລືອທະຫານອາເມລິກາທີ່ໄດ້ເສຍຊີວິດຢູ່ລາວທີ່ໄດ້ຮັບການສັນນະສູດແລ້ວ 282 ຄົນໃຫ້ແກ່ອາເມລິກາ ແລະ ອີກ 291 ຄົນທີ່ຍັງເຫລືອແມ່ນຈະໄດ້ຮ່ວມກັນສືບຕໍ່ຄົ້ນຫາໃນຕໍ່ໜ້າ.

ໄລຍະ 2017-2018 ຝ່າຍລາວໄດ້ປະຕິບັດນະໂຍບາຍຕໍ່ລັດຖະບານອາເມລິກາ ຄື: ໄດ້ອະນຸຍາດໃຫ້ເພີ່ມການປະຕິບັດງານຮ່ວມລາວ-ອາເມລິກາໃນພາກສະໜາມຈາກ 4 ຄັ້ງເປັນ 5 ຄັ້ງຕໍ່ປີ, ລວມທັງໄດ້ຜ່ອນສັ້ນຜ່ອນຍາວຫລາຍບັນຫາຕາມເງື່ອນໄຂ ແລະ ຄວາມສາມາດຕົວຈິງຂອງຝ່າຍລາວ ເພື່ອເຮັດໃຫ້ການຮ່ວມມືດ້ານມະນຸດສະທໍາດັ່ງກ່າວລະຫວ່າງ ສປປ ລາວ-ສະຫະລັດອາເມລິກາ ໄດ້ຮັບການຈັດຕັ້ງປະຕິບັດໃຫ້ດີຂຶ້ນເປັນກ້າວໆ.