ຢຸດການຄົ້ນຫາຜູ້ສູນຫາຍຈາກໄພນໍ້າຖ້ວມຢູ່ເມືອງສະໜາມໄຊຊົ່ວຄາວຫລັງມີຝົນຕົກໜັກ
ທ່ານ ບຸນໂຮມ ພົມມະສານ ເຈົ້າເມືອງສະໜາມໄຊແຂວງອັດຕະປື ໃຫ້ຮູ້ວ່າ: ພາຍຫລັງເກີດຝົນຕົກໜັກໃນສອງສາມວັນຜ່ານມາ, ໄດ້ເຮັດໃຫ້ລະດັບນໍ້າເຊປຽນສູງຍຶ່ງຂຶ້ນຖ້ວມເທສະບານເມືອງສະໜາມໄຊ, ສົ່ງຜົນໃຫ້ການສັນຈອນມີຄວາມລຳບາກ ແລະ ເຮັດໃຫ້ພາລະກິດການຊອກຄົ້ນຫາຜູ້ສູນຫາຍມີຄວາມຫຍຸ້ງຍາກຂຶ້ນຕື່ມ, ຈຶ່ງຕ້ອງໄດ້ຢຸດພາລະກິດການຊອກຫາຜູ້ສູນຫາຍຊົ່ວຄາວ, ຈົນກວ່ານໍ້າຈະບົກແຫ້ງ ແລະ ມາຮອດວັນທີ 15 ສິງຫານີ້ ສາມາດຄົ້ນພົບຜູ້ເສຍຊີວິດຈຳນວນ 39 ສົບ, ໃນນັ້ນ 34 ສົບແມ່ນເກັບກູ້ຢູ່ພາກສະໜາມ, ສ່ວນອີກ 5 ສົບແມ່ນເສຍຊີວິດຢູ່ໂຮງໝໍ.
ທ່ານເຈົ້າເມືອງ ໃຫ້ຮູ້ວ່າ: ປັດຈຸບັນເຂດເມືອງສະໜາມໄຊຍັງມີສະພາບຝົນຕົກແຮງຕິດຕໍ່ກັນຫລາຍວັນຈົນແມ່ນ້ຳເຊກອງ ແລະ ຫ້ວຍຮ່ອງຕ່າງໆທີ່ປ່ອງໃສ່ແມ່ນ້ຳເຊກອງເພີ່ມລະດັບສູງຂຶ້ນຢ່າງຕໍ່ເນື່ອງ, ເຮັດໃຫ້ນ້ຳໄຫລຖ້ວມເທສະບານເມືອງສະໜາມໄຊໃນບາງຈຸດ, ເສັ້ນທາງການສັນຈອນຈາກແຂວງຫາຕົວເມືອງສະໜາມໄຊຖືກຕັດຂາດ 3 ຈຸດຄື: ຈຸດຫ້ວຍຫລັກດານ, ຫ້ວຍກະເສນ ແລະ ຂົວຂ້າມຫ້ວຍເບກຫັກຂາດ, ສົ່ງຜົນໃຫ້ການເດີນທາງເຂົ້າ-ອອກເມືອງພົບຄວາມຫຍຸ້ງຍາກ, ໂດຍໃຊ້ເຮືອຈັກນ້ອຍຂອງປະຊາຊົນຂົນສົ່ງຄົນທີ່ຂ້າມໄປ-ມາ, ສ່ວນພາຫະນະອື່ນໆແມ່ນບໍ່ສາມາດໄປໄດ້, ເຮັດໃຫ້ການຂົນສົ່ງເຄື່ອງຊ່ວຍເຫລືອຕ່າງໆໄປຫາຜູ້ປະສົບໄພພົບຄວາມຫຍຸ້ງຍາກຂຶ້ນຕື່ມ. ນອກນີ້ເຂື່ອນໄຟຟ້າເຊກະໝານ 1 ຈະໄດ້ປ່ອຍນ້ຳໃນເວລາ 14:00 ໂມງຂອງວັນທີ 16 ສິງຫານີ້, ຊຶ່ງຄະນະຮັບຜິດຊອບໄດ້ແຈ້ງໃຫ້ປະຊາຊົນທີ່ຢູ່ລຽບຕາມແຄມແມ່ນ້ຳເຊກອງ, ເຊກະໝານ ເກັບມ້ຽນວັດຖຸສິ່ງຂອງມີຄ່າ ແລະ ສັດລ້ຽງຂຶ້ນບ່ອນສູງປອດໄພ, ພ້ອມທັງກະກຽມເຮືອ ເພື່ອອົບພະຍົບປະຊາຊົນທີ່ຢູ່ຈຸດສ່ຽງທີ່ຈະຖືກນ້ຳຖ້ວມ.
