ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ

ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ - advert banner 728 90 728x90 - ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ

ໂດຍ : ມຶກບໍແຫ້ງ

ການພັດ​ທະ​ນາເຂື່ອນໄຟຟ້າ​ນ້ຳ​ຕົກ​ແມ່ນ​ທ່າ​ແຮງ  ແລະ ເປັນຂະ​ແໜງທີ່ສຳຄັນຂອງລັດຖະບານ ໃນການພັດທະນາປະເທດ ແຕ່​ຄວາມ​ປອດ​ໄພ​ຂອງ​ການກໍ່​ສ້າງນັ້ນ​ຮັບ​ປະ​ກັນ​ແລ້ວຫຼື​ຍັງ?

ໃນແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ຂອງລັດຖະບານ ແຕ່ປີ 2016-2020 ໄດ້ເນັ້ນໜັກວ່າ ການ​ພັດ​ທະ​ນາ ໄຟຟ້າ​ນ້ຳ​ຕົກເປັນກຸນແຈສຳຄັນ ທີ່ຈະຊ່ວຍໃຫ້ ສປປລາວ ບັນລຸການຈະເລີນເຕີບໂຕ ທາງດ້ານເສດຖະກິດ ແລະການຫຼຸດຜ່ອນຄວາມທຸກຍາກ. ອີງຕາມ ກະຊວງພະລັງງານ ແລະບໍ່ແຮ່ໃຫ້ຮູ້ວ່າ ໃນປັດຈຸບັນ ສປປລາວ ມີໂຮງຜະລິດໄຟຟ້າທີ່ດຳເນີນການຜະລິດຈຳນວນ 54 ໂຄງການ, ກຳລັງກໍ່ສ້າງ 46 ໂຄງການທີ່ຈະສຳເລັດພາຍໃນປີ 2021 ແລະ ມີຈຳນວນ 112 ໂຄງການ ທີ່ມີແຜນການກໍ່ສ້າງ.

ແຕ່ເຫດເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນວັນທີ 23 ກໍລະກົດ 2018 ທີ່ຜ່ານມາ ເຊິ່ງເປັນໄພພິບັດ ທີ່ຮ້າຍແຮງເປັນປະຫວັດການຂອງຊາດ, ນຳມາເຊິ່ງການສູນເສຍທີ່ໃຫຍ່ຫຼວງ ບໍ່ວ່າ ຊີວິດ ກໍຄືຊັບສິນ ທີ່ບໍ່ມີຫຍັງແລ້ວຈະມາທົດແທນໄດ້ ໂດຍສະເພາະຜູ້ສົບໄພໃນເທື່ອນີ້ ທີ່ມີຫຼາຍພັນຄົນ ໄດ້​ກາຍ​ເປັນ​ສິ່ງ ທີ່​ພວກ​ເຮົາ​ຄວນ​ຄິດ​ຫງຳ​ຄືນ​ກ່ຽວ​ກັບ ຄວາມ​ປອດ​ໄພ​ຂອງ​ການ​ກໍ່ສ້າງເຂື່ອນ​ໄຟ​ຟ້າ​ນ້ຳ​ຕົກ.

ໃນ​ຄວາມ​ເປັນ​ຈິງ​ແລ້ວ ມີບັນດານະໂຍບາຍຕ່າງໆຂອງລັດຖະບານ ທີ່ລະບຸຈະແຈ້ງ ກ່ຽວກັບຜົນປະໂຫຍດ ແລະການຫຼຸດຜ່ອນຄວາມສ່ຽງ ຂອງຂະແໜງພະລັງງານໄຟຟ້າ ດັ່ງທີ່ ໄດ້ກ່າວໄວ້ໃນ ແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 (ໜ້າທີ 96) ເວົ້າວ່າ “ຂະແໜງພະລັງງານໄຟຟ້າ ຈະຕ້ອງມີ ບັນດານະໂຍບາຍ ແລະກົດລະບຽບຮອງຮັບ ເພື່ອຮັບປະກັນ ຜົນປະໂຫຍດທາງດ້ານເສດຖະກິດ ແລະສັງຄົມ ທີ່ຮັບຮູ້ໂດຍ ປະຊາຊົນທ້ອງຖິ່ນ ແລະຄົນລາວທົ່ວໄປ”.

ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ - lattana 1 - ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ
ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ - 1 1 - ເຂື່ອນ: ເອົາ​ຄວາມ​ປອດ​ໄພ​ໄວ້​ກ່ອ​ນ

ພ້ອມນັ້ນ, ຈາກຄວາມພະຍາຍາມຂອງລັດຖະບານ ສົມທົບກັບການສະໜັບສະໜູນ ຂອງສາກົນ ລັດຖະບານໄດ້ ມີມາດຕະການ ເພື່ອຕິດຕາມກວດກາ, ເພີ່ມພູນຜົນປະໂຫຍດ ແລະຫຼຸດຜ່ອນຜົນກະທົບຂອງໂຄງການ ພັດທະນາ ໄຟຟ້າພະລັງງານນໍ້າ, ຍົກຕົວຢ່າງ ການຮັບຮອງເອົາ “ນະໂຍບາຍ ການພັດທະນາ ໄຟຟ້ານ້ຳ​ຕົກແບບ​ຍືນ​ຍົງ ຂອງສປປລາວ” ໃນປີ 2015 ແລະຫຼັງຈາກນັ້ນ ກໍໄດ້ມີ “ບົດແນະນຳການຈັດຕັ້ງປະຕິບັດ” ໃນ ປີ 2016 ເຊິ່ງນຳໃຊ້ກັບໂຄງການໄຟຟ້າພະລັງງານນໍ້າ ທີ່ມີກຳລັງການຜະລິດ ຕັ້ງແຕ່ 15 ເມກາວັດ ຂຶ້ນໄປ.

ມີບາງຕອນນະໂຍບາຍການ​ພັດ​ທະ​ນາ ໄຟ​ຟ້າ​ນ້ຳ​ຕົກ​ແບບ​ຍືນ​ຍົງ ລະບຸວ່າ “ຜູ້ພັດທະນາໂຄງການຕ້ອງ ນຳໃຊ້ອຸປະກອນ ທີ່ທັນສະໄໝທີ່ສຸດ ເພື່ອຮັບປະກັນຄວາມປອດໄພຕໍ່ຊີວິດ ແລະຊັບສິນຂອງປະຊາຊົນ ແລະ ປ້ອງກັນ ແລະຫຼຸດຜ່ອນທຸກຄວາມສ່ຽງ ຕໍ່ຊັບພະຍາກອນທຳມະຊາດ ແລະສິ່ງແວດລ້ອມໃນໄລຍະ ການອອກແບບ, ກໍ່ສ້າງ ແລະການດຳເນີນການຜະລິດ”.

ເປັນທີ່ຍິນດີຢ່າງຍິ່ງ ທີ່ລັດຖະບານໄດ້ປະກາດ “ໂຈະຊົ່ວຄາວ ການພິຈາລະນາຮັບຮອງໂຄງການກໍ່ສ້າງ ແລະພັດທະນາເຂື່ອນໃໝ່”, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຢືນຢັນໃນ​ລະຫວ່າງກອງປະຊຸມລັດຖະບານສະໄໝວິສາມັນ ປະຈໍາເດືອນ ສິງຫາ 2018 (6-7 ສິງ​ຫາ 2018) ​ວ່າ: “ລັດຖະບານຈະໃຫ້ໂຈະຊົ່ວຄາວໃນການພິຈາລະນາຮັບເອົາ ການສະເໜີໂຄງການກໍ່ສ້າງ ແລະ ພັດທະນາເຂື່ອນໃໝ່ຕ່າງໆໄວ້ກ່ອນ ເພື່ອສຶກສາຄືນໃໝ່ ຍຸດທະສາດ ແລະ ແຜນພັດທະນາເຂື່ອນໄຟຟ້າ ໃນ ສປປ ລາວ ເພື່ອ​ເປັນ​ບ່ອນ​ອີງ​ໃຫ້​ແກ່​ການ​ດຳ​ເນີນ​ການ​ຕໍ່​ໄປ”.

ສິ່ງສຳຄັນ ຕ້ອງຮັບປະກັນວ່າ ບັນດາໂຄງການເຂື່ອນໄຟຟ້າ ຕ້ອງປະຕິບັດຕາມ ບັນດາກົດໝາຍ, ນະໂຍບາຍ ແລະບົດແນະນຳຕ່າງໆ ທີ່ກ່ຽວຂ້ອງຂອງລັດຖະບານຢ່າງເຄັ່ງຄັດ. ກ່ອນຈະເຮັດໄດ້ແນວນັ້ນ ຕ້ອງສ້າງຄວາມເຂັ້ມແຂງແກ່ຂະແໜງການ ທີ່ກ່ຽວຂ້ອງ ໃນລະດັບສູນກາງ ແລະທ້ອງຖິ່ນ ເພື່ອຕິດຕາມກວດກາ ແລະບັງຄັບໃຊ້ບັນດານິຕິກຳທີ່ກ່ຽວຂ້ອງຢ່າງມີຜົນສັກສິດ ຈຶ່ງ​ຈະ​ເຮັດ​ໃຫ້ ການ​ສ້າງ​ເຂື່ອນ​ໄຟ​ຟ້າ​ນ້ຳ​ຕົກ​ປອດ​ໄພຫຼາຍ​ຂຶ້ນ.

error: Content is protected !!