ທ່ານ ໂກຟີ ອານນັນ ອະດີດເລຂາ UN ເສຍຊີວິດ
ທ່ານ ໂກຟີ ອານນັນ ອະດີດເລຂາທິການສະຫະປະຊາຊາດ (UN) ແລະ ເຈົ້າຂອງລາງວັນໂນເບລສາຂາສັນຕິພາບ ໄດ້ເສຍຊີວິດແລ້ວດ້ວຍອາຍຸ 80 ປີ.
ມູນນິທິ ໂກຟີ ອານນັນ ຖະແຫລງຜ່ານທະວິດເຕີວ່າ: ມູນນິທິ ແລະ ຄອບຄົວ ອານນັນ ຂໍຖະແຫລງດ້ວຍຄວາມເສົ້າເສຍໃຈວ່າ: ທ່ານ ອານນັນ ເຖິງແກ່ມໍລະນະກຳໃນຕອນເຊົ້າວັນທີ 18 ສິງຫາ. ທ່ານເປັນລັດຖະບູລຸດຜູ້ຍິ່ງໃຫຍ່ ແລະ ຕໍ່ສູ້ເພື່ອໂລກທີ່ເປັນທຳ ແລະ ສັນຕິ, ຫລັງໝົດໜ້າທີ່ໃນ UN ທ່ານຍັງທຸ້ມເທເຮັດວຽກເພື່ອສັນຕິພາບໃນຖານະປະທານມູນນິທິ ໂກຟີ ອານນັນ ແລະ ປະທານກຸ່ມຜູ້ອາວຸໂສທີ່ຕັ້ງຂຶ້ນໂດຍທ່ານ ເນລສັນ ແມນເດລາ ອະດີດປະທານາທິບໍດີອາຟຣິກາໃຕ້ ເປັນແຮງບັນດານໃຫ້ແກ່ຄົນທຸກໄວ ບໍ່ວ່າບ່ອນໃດມີຄວາມທຸກ ຫລື ຕ້ອງການການຊ່ວຍເຫລືອ ທ່ານຈະເຂົ້າໄປຊ່ວຍເຫລືອດ້ວຍຄວາມເຂົ້າໃຈ ແລະ ເຫັນອົກເຫັນໃຈ.
ທ່ານ ອານນັນ ເປັນເລຂາທິການ UN ຄົນທີ 7 ແລະ ເປັນຊາວອາຟຣິກາຄົນທຳອິດທີ່ໄດ້ດຳລົງຕຳແໜ່ງນີ້ ຢູ່ໃນຕຳແໜ່ງສອງວາລະແຕ່ວັນທີ 1 ມັງກອນ 1997 ເຖິງ 31 ທັນວາ 2006 ໄດ້ຮັບລາງວັນໂນເບລສາຂາສັນຕິພາບຮ່ວມກັບ UN ໃນປີ 2001, ເກີດເມື່ອວັນທີ 8 ເມສາ 1938 ໃນການາ, ຊ່ຽວຊານທັງພາສາອັງກິດ, ຝຣັ່ງ ແລະ ອາຟຣິກາ, ຈົບການສຶກສາດ້ານເສດຖະສາດທີ່ວິທະຍາໄລມາຄາເລສເຕີ ລັດມິນນິໂຊຕາຂອງອາເມລິກາ ກ່ອນໄປສຶກສາຕໍ່ດ້ານຄວາມສຳພັນລະຫວ່າງປະເທດ ທີ່ນະຄອນເຈນີວາຂອງສະວິດ ແລະ ເລີ່ມເຮັດວຽກໃນ UN, ແຕ່ງງານກັບນາງ ຕິຕີ ອາລາກີຈາ ຊາວນີເຊຣີ ໃນປີ 2000 ມີລູກນຳກັນ 2 ຄົນ (ຍິງ 1 ຄົນ).
