ແຂວງໄຊຍະບູລີ ທໍາລາຍຊີ້ນສັດປ່າຈຳນວນຫລາຍ
ເມື່ອບໍ່ດົນມານີ້, ກອງກວດກາປ່າໄມ້ ພະແນກກະສິກໍາ ແລະ ປ່າໄມ້ແຂວງໄຊຍະບູລີ ໄດ້ທໍາລາຍຊີ້ນສັດປ່າຫວງຫ້າມເປັນຈຳນວນຫລາຍ, ພາຍຫລັງເຈົ້າໜ້າທີ່ປ່າໄມ້ໄດ້ລົງກວດກາລາດຕະເວນ, ພົບເຫັນທ້າວ ສິງທອງ ພິລັກ ອາຍຸ 46 ປີ ອາຊີບພະນັກງານຄູ ແລະ ທ້າວ ບຸນໄທ ມະນິວັນ ອາຍຸ 55 ປີ ອາຊີບປະຊາຊົນ ຢູ່ບ້ານຫ້ວຍຊ່າວ ເມືອງ ແລະ ແຂວງໄຊຍະບູລີ ໄດ້ຫາບຊີ້ນຊ້າງປ່າ ຈໍານວນ 88 ກິໂລກຼາມ (ຊີ້ນດິບ) ຄິດໄລ່ເປັນມູນຄ່າ 88 ລ້ານກີບ. ນອກນີ້ ເຈົ້າໜ້າທີ່ປ່າໄມ້ຍັງສາມາດຍຶດຊິ້ນສ່ວນສັດປ່າຕາມທ້ອງຕະຫຼາດ ຈໍານວນ 12,6 ກິໂລ ໃນນີ້ມີຊີ້ນຟານແຫ້ງ, ຊີ້ນໝູປ່າແຫ້ງ, ຊີ້ນໄກ້ແຫ້ງ, ກະຮອກແຫ້ງ ແລະ ນົກແຫ້ງ ເຊິ່ງການກະທຳດັ່ງກ່າວແມ່ນຜິດຕໍ່ກົດໝາຍວ່າດ້ວຍສັດນໍ້າ ແລະ ສັດປ່າ.
ທ່ານຫົວໜ້າກອງກວດກາປ່າໄມ້ແຂວງ ໃຫ້ຮູ້ວ່າ: ໃນໄລຍະຜ່ານມາ, ເຈົ້າໜ້າທີ່ກອງກວດກາປ່າໄມ້ແຂວງ ໄດ້ຈັດຕັ້ງພະນັກງານລົງເຜີຍແຜ່ລະບຽບ ກົດໝາຍກ່ຽວກັບການຄຸ້ມຄອງສັດນໍ້າ ແລະ ສັດປ່າໃຫ້ປະຊາຊົນບັນດາເຜົ່າຢູ່ບັນດາເມືອງ-ບ້ານທີ່ຫຼໍ່ແຫຼມມີຄວາມສ່ຽງຕໍ່ການລ່າສັດນໍ້າ ແລະ ສັດປ່າ ເຊິ່ງໄດ້ຕິດຕັ້ງໂປດສະເຕີ ແລະ ປ້າຍໂຄສະນາ ເພື່ອໃຫ້ປະຊາຊົນບັນດາເຜົ່າມີຄວາມເຂົ້າໃຈ, ມີຄວາມຮັບຮູ້ຕໍ່ລະບຽບກົດໝາຍ. ພ້ອມລົງຕິດຕາມກວດກາເປັນປະຈຳ ເພື່ອເກັບກໍາຂໍ້ມູນບຸກຄົນເປົ້າໝາຍທີ່ມີການຊື້-ຂາຍສັດນໍ້າ ແລະ ສັດປ່າແລະ ແຈ້ງເຊີນບຸກຄົນເປົ້າໝາຍຕ່າງໆເຂົ້າມາສຶກສາອົບຮົມ ແລະ ເຮັດບົດບັນທຶກ ເພື່ອບໍ່ໃຫ້ກັບມາເຄື່ອນໄຫວຜິດຕໍ່ລະບຽບກົດໝາຍອີກ.
