ລະດັບນ້ຳຂອງສືບຕໍ່ເພີ່ມຂຶ້ນນະຄອນຫລວງເຕືອນປະຊາຊົນກຽມຮັບມືນ້ຳຖ້ວມ
ຜູ້ປະກອບການ ແລະ ເຈົ້າຂອງຮ້ານຂາຍເຄື່ອງຢູ່ເຂດເສດຖະກິດສວນນາກຄະລາດແຄມຂອງ ເຂດບ້ານວັດຈັນ ເມືອງຈັນທະບູລີ ຈຳນວນຫລາຍໄດ້ພາກັນເລັ່ງຂົນຍ້າຍວັດຖຸຊັບສິນມີຄ່າອອກຈາກເຂດດັ່ງກ່າວ, ຫລັງຈາກນ້ຳຂອງໄດ້ໄຫລເຂົ້າຖ້ວມບໍລິເວນດັ່ງກ່າວໃນວັນທີ 19 ສິງຫາຜ່ານມາ. ນອກນີ້ ຍັງມີຫລາຍຈຸດທີ່ເປັນພື້ນທີ່ຕໍ່າລຽບຕາມແຄມນ້ຳຂອງກໍມີນ້ຳຍຶ່ງຂຶ້ນຖ້ວມແລ້ວເຊັ່ນ: ເຂດເມືອງສັງທອງ, ເມືອງຫາດຊາຍຟອງ ແລະ ຄາດວ່າລະດັບນ້ຳຂອງອາດຈະສູງຂຶ້ນອີກໃນ 2-3 ວັນຕໍ່ໜ້າ. ຕໍ່ສະພາບດັ່ງກ່າວ ຫ້ອງວ່າການນະຄອນ ຫລວງວຽງຈັນໄດ້ອອກແຈ້ງການໃຫ້ຊາວນະຄອນຫລວງວຽງຈັນ ໂດຍສະເພາະຜູ້ທີ່ອາໄສຢູ່ລຽບຕາມແມ່ນ້ຳຂອງໄດ້ກະກຽມຄວາມພ້ອມຮັບມືກັບໄພນ້ຳຖ້ວມຕະຫລອດ 24 ຊົ່ວໂມງ, ຫລັງຈາກລະດັບນ້ຳຂອງໄດ້ເພີ່ມຂຶ້ນຮອດ 11,20 ແມັດ (ເກີນເຂດເຕືອນໄພ) ແລະ ເຂດອັນຕະລາຍແມ່ນ 12,50 ແມັດ ໂດຍມອບໃຫ້ພາກສ່ວນກ່ຽວຂ້ອງເພີ່ມທະວີຄວາມເອົາໃຈໃສ່ຄື: ໃຫ້ຄະນະກຳມະການຄວບຄຸມໄພພິບັດຂັ້ນນະຄອນຫລວງເອົາໃຈໃສ່ຕິດຕາມ, ຊີ້ນຳ ແລະ ກະກຽມຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມ, ມອບໃຫ້ພະແນກກະສິກຳ-ປ່າໄມ້ນະຄອນຫລວງຕິດຕາມກວດກາປະຕູນ້ຳທຸກຈຸດ, ພະແນກໂຍທາທິການ ແລະ ຂົນສົ່ງກວດກາເສັ້ນທາງທີ່ອາດຖືກນ້ຳຖ້ວມຕັດຂາດ ແລະ ສົມທົບກັບຫ້ອງການຄຸ້ມຄອງ-ບໍລິຫານຕົວເມືອງວຽງຈັນກວດກາຄອງລະບາຍນ້ຳຈຸດຕ່າງໆໃຫ້ລະບາຍນ້ຳໄດ້ສະດວກບໍ່ອັ່ງຂັງ. ນອກນີ້ ມອບໃຫ້ບັນດາເມືອງທີ່ຕິດແມ່ນ້ຳຂອງ ແລະ ສາຂາແມ່ນ້ຳຂອງອອກແຈ້ງເຕືອນປະຊາຊົນຂອງຕົນທີ່ອາໄສ, ດຳເນີນທຸລະກິດ ແລະ ເຄື່ອນໄຫວຢູ່ລຽບຕາມແຄມແມ່ນ້ຳຂອງ ແລະ ສາຂາແມ່ນ້ຳຂອງ ໂດຍສະເພາະແມ່ນຜູ້ຢູ່ພື້ນທີ່ຕໍ່າສ່ຽງຕໍ່ການເກີດນ້ຳຖ້ວມ ຈົ່ງມີສະຕິເອົາໃຈໃສ່ຕິດຕາມລະດັບນ້ຳ ແລະ ຂໍໃຫ້ເກັບມ້ຽນວັດຖຸສິ່ງຂອງ ແລະ ສັດລ້ຽງໄປໄວ້ບ່ອນສູງປອດໄພ ແລະ ຫ້າມລູກຫລານບໍ່ໃຫ້ລົງຫລິ້ນຕາມແຄມນ້ຳ. ນອກນີ້ ມອບໃຫ້ບັນດາເມືອງລະດົມກຳລັງ ປກສ-ປກຊ ແລະ ຊາວໜຸ່ມແຕ່ລະບ້ານໃນການຮ່າຍ-ລຳລຽງດິນຊາຍໄປຈຸດກັ້ນຄູກັນນ້ຳ.
ຕາມການລາຍງານຂອງກົມອຸຕຸນິຍົມ ແລະ ອຸທົກກະສາດ ໃນວັນທີ 20 ສິງຫານີ້ ໃຫ້ຮູ້ວ່າ: ລະດັບນ້ຳຂອງ ແລະ ນ້ຳໄຫລເຂົ້າອ່າງນ້ຳງື່ມໃນວັນທີ 21-22 ສິງຫານີ້ ຈຸດວັດແທກຂອງຫລວງພະບາງຈະມີລະດັບ 16,35 ແມັດ, ວຽງຈັນ (ຫລັກ 4) 12,22 ແມັດ, ປາກຊັນ 14,13 ແມັດ, ທ່າແຂກ 12,99 ແມັດ, ສະຫວັນນະເຂດ 10,74 ແມັດ, ປາກເຊ 11,84 ແມັດ, ມະຫາໄຊ (ເຊບັ້ງໄຟ) 15,21 ແມັດ, ຂົວເຊບັ້ງໄຟ 20,62 ແມັດ ແລະ ໜ້າເຂື່ອນນ້ຳງື່ມ 211,82 ແມັດ.
