ສໍາມະກອນ 33 ຄົນ ສໍາເລັດການ ຍົກລະດັບກໍາມະການຕັດສິນ ສາຍ ກ
August 21, 2018 - 10:11 AM

ທ້າຍອາທິດຜ່ານມາ ທີ່ຫ້ອງປະຊຸມສະຫະພັນບານເຕະແຫ່ງຊາດລາວ (ສຕລ) ໄດ້ມີພີທີປີດການຝຶກອົບຮົມຍົກລະດັບກຳມະການຕັດສິນ ລະດັບ ກ ກຽມຮັບໃຊ້ການແຂ່ງຂັນບານເຕະ ສາຍ ກ ປະຈຳປີ 2018 ໂດຍມີທ່ານ ຄໍາໄພ ປຣະເສີດ ຮອງປະທານ ສຕລ, ມີພາກສ່ວນກ່ຽວຂ້ອງ ແລະ ນັກສຳມະກອນ ຈຳນວນ 33 ຄົນ ເຂົ້າຮ່ວມ.
ການຍົກລະດັບກຳມະການຕັດສິນ ລະດັບ ກ ເພື່ອຮຽນຮູ້ເອົາສິ່ງໃໝ່ໆທີ່ທາງ ຟີຟາ ປັບປຸງໃໝ່ໃນການຝຶກອົບຮົມໃນຄັ້ງນີ້ ເພື່ອແກ້ໄຂບາງຈຸດອ່ອນ ແລະ ຂໍ້ຄົງຄ້າງທາງພາກທິດສະດີ ແລະ ພາກປະຕິບັດຕົວຈິງ, ພ້ອມທັງແລກປ່ຽນບົດຮຽນລະຫວ່າງກຳມະການດ້ວຍກັນ ແລະ ຄູຝຶກ ກໍຄືຜູ້ມີສ່ວນຮ່ວມອື່ນໆ. ນອກຈາກນັ້ນ ຍັງໄດ້ປັບປຸງການຕັດສິນໃຫ້ມີຄຸນນະພາບສູງຂຶ້ນເປັນກ້າວໆ ຕິດຕາມໃຫ້ທັນວິວັດທະນາການຂອງເກມການຫລິ້ນຂອງນັກກິລາ. ການຝຶກອົບຮົມໄດ້ດຳເນີນການຝຶກໄດ້ໃຊ້ເວລາ 4 ມື້ ໂດຍນັກສຳມະກອນຈະໄດ້ຮຽນຮູ້ທາງດ້ານທິດສະດີ ແລະ ການປະຕິບັດຕົວຈິງ.