ຕາລີບັນປະຕິເສດຂໍ້ສະເໜີຢຸດຍິງ ຂອງລັດຖະບານອັບການິດສະຖານ
ກຸ່ມຕາລີບັນບໍ່ຮັບຂໍ້ຮຽກຮ້ອງຢຸດຍິງຂອງລັດຖະບານອັບການິດສະຖານ, ຂະນະທີ່ເກີດເຫດຕໍ່ສູ້ຄັ້ງໃໝ່ລະຫວ່າງເຈົ້າໜ້າທີ່ຝ່າຍຄວາມໝັ້ນຄົງກັບກຸ່ມຄົນຮ້າຍຍັງບໍ່ຮູ້ຝ່າຍ ບໍລິເວນມັດສະຢິດແຫ່ງໜຶ່ງໃນນະຄອນຫລວງກາບູນ.
#Kabul – dust and smoke rises from PD1, near the Eidgah mosque, as combat helicopter fires on insurgents hideout in Kabul city after massive rocket attack #Afghanistan pic.twitter.com/hHX3MeFSyC
— TOLOnews (@TOLOnews) August 21, 2018
ສຳນັກຂ່າວຕ່າງປະເທດລາຍງານວ່າ: ໂດຍອ້າງຂໍ້ມູນຈາກແຫລ່ງຂ່າວລະດັບສູງ 2 ຄົນໃນກຸ່ມຕາລີບັນ ເປີດເຜີຍກັບສຳນັກຂ່າວຣອຍເຕີວ່າ: ທ່ານ ໄຮບາດຸລເລາະ ອັດຮຸນຊາດາ ຜູ້ນຳສູງສຸດຂອງກຸ່ມຕາລີບັນ ປະຕິເສດຂໍ້ສະເໜີຂອງປະທານາທິບໍດີ ອັດຣາຟ ການີ ໃນການຢຸດຍິງ “ຊົ່ວຄາວ” ຄັ້ງໃໝ່ກັບກຸ່ມຕາລີບັນ ນັບແຕ່ວັນທີ 20 ສິງຫາຜ່ານມາ ເຊິ່ງເປັນວັນສະເຫລີມສະຫລອງວັນສະຖາປະນາອັບການິດສະຖານ ຄົບຮອບ 99 ປີ.
ກຸ່ມຕາລີບັນໃຫ້ເຫດຜົນຂອງການປະຕິເສດຂ້ໍສະເໜີດັ່ງກ່າວວ່າ: ການຕອບຮັບອາດເປີດໂອກາດໃຫ້ “ກອງທັບຕ່າງປະເທດ” ຂະຫຍາຍໄລຍະເວລາປະຈຳການຢູ່ອັບການິດສະຖານຕໍ່ໄປອີກ.
ໃນເວລາດຽວກັນ, ມີລາຍງານການຍິງຈະຫລວດຢ່າງໜ້ອຍ 9 ລູກ ເຂົ້າໃສ່ບໍລິເວນ ເຊິ່ງເປັນສະຖານທີ່ຕັ້ງຂອງສະຖານເອກອັກຄະລັດຖະທູດ ແລະ ສຳນັກງານຂອງອົງການສາກົນ ໃນນະຄອນຫລວງກາບູນ. ກະຊວງປ້ອງກັນປະເທດຂອງອັບການິດສະຖານເປີດເຜີຍຂໍ້ມູນໃນເບື້ອງຕົ້ນວ່າ: ກຸ່ມຄົນຮ້າຍຍັງບໍ່ຮູ້ແນ່ນອນວ່າເປັນຝ່າຍໃດ ຢຶດອາຄານຫລັງໜຶ່ງເຊິ່ງຕັ້ງຢູ່ໃກ້ກັບມັດສະຢິດ ແລ້ວລະດົມຍິງຈະຫລວດອອກມາ ສົ່ງຜົນໃຫ້ມີຜູ້ໄດ້ຮັບບາດເຈັບຈຳນວນໜຶ່ງ. ທັງນີ້ ມັດສະຢິດດັ່ງກ່າວຕັ້ງຢູ່ບໍ່ໄກຈາກທຳນຽບປະທານາທິບໍດີ.
