ເບິ່ງວິທີການເພື່ອຫລຸດຜ່ອນ ການສູບຢາຢູ່ບາງປະເທດ
ທຸກໆປີເມື່ອຮອດມື້ປິດທ້າຍຂອງເດືອນພຶດສະພາ, ໂລກທັງໂລກກໍພາກັນເຄື່ອນໄຫວສ້າງຈິດສຳນຶກໃຫ້ທົ່ວສັງຄົມຊາບເຖິງໄພອັນຕະລາຍຮ້າຍແຮງຂອງຢາສູບທີ່ກະທົບຕໍ່ສຸຂະພາບ, ສັງຄົມ ແລະ ເສດຖະກິດ. ເພື່ອຮ່ວມລະນຶກວັນສາກົນຕ້ານການສູບຢາ (31 ພຶດສະພາ) ໄວ້ແຕ່ເນີ້ນໆ, ຜູ້ຂຽນຂໍສະເໜີບາງບົດຮຽນ ກໍຄືມາດຕະການຂອງບາງປະເທດໃນການຫລຸດຜ່ອນ ຫລື ເກືອດຫ້າມສູບຢາດັ່ງຕໍ່ໄປນີ້: ທີ່ປະເທດອິນເດຍ, ຂ່າວໃນຕົ້ນເດືອນມີນາປີ 2016 ໃຫ້ຮູ້ວ່າ: ທາງການອິນເດຍໄດ້ກຳນົດແຜນປັບຂຶ້ນອາຍຸຂອງຜູ້ທີ່ຊື້ຢາສູບຈາກ 18 ປີໃນເມື່ອກ່ອນ ເປັນ 25 ປີ. ທາງການຂອງປະເທດນີ້ເຊື່ອວ່າ: ການປັບຂຶ້ນເກນອາຍຸດັ່ງກ່າວຈະຊ່ວຍຫລຸດຜ່ອນການຕິດຢາສູບແບບງອມແງມຂອງຊາວໜຸ່ມໃນອິນເດຍລົງ. ແຕ່ລະປີຄົນອິນເດຍທີ່ເສຍຊີວິດຈາກສາເຫດຢາສູບນັ້ນມີເກືອບ 1 ລ້ານຄົນ. ນອກຈາກການປັບຂຶ້ນອາຍຸຜູ້ທີ່ມີສິດສູບຢາແລ້ວ, ທາງການຍັງໄດ້ສັ່ງຫ້າມແກະຢາສູບຂາຍເປັນກອກ. ອິນເດຍມີຄົນເສຍຊີວິດຈາກພະຍາດທີ່ພົວພັນກັບຢາສູບເປັນທີ 2 ຂອງໂລກ ຮອງຈາກ ສປ ຈີນ ແລະ ຄາດວ່າຕົວເລກດັ່ງກ່າວອາດເພີ່ມຂຶ້ນເປັນ 1,5 ລ້ານຄົນຕໍ່ປີ ພາຍໃນທ້າຍທົດສະວັດນີ້. ຢູ່ ສ.ເກົາຫລີ, ທາງການໄດ້ປັບຂຶ້ນລາຄາຢາສູບສູງເກືອບຈຸເມກເຖິງ 80% ໂດຍບອກວ່າເພື່ອຫລຸດຜ່ອນການສູບຢາ. ມາດຕະການນີ້ໄດ້ປະຕິບັດມາແຕ່ວັນທີ 2 ທັນວາປີ 2015 ພາຍຫລັງສະພາແຫ່ງຊາດ ສ.ເກົາຫລີ ໄດ້ຮັບຮອງເອົາແຜນງົບປະມານປະຈຳປີ ເຊິ່ງລວມເອົາບັນຫາປັບຂຶ້ນລາຄາຢາສູບຈາກຊອງລະ 2.500 ວອນ (ປະມານ 18.000 ກີບ) ເປັນ 4.500 ວອນ (ປະມານ 32.400 ກີບ). ຢູ່ ສ.ເກົາຫລີ ຄົນທີ່ຢູ່ໃນເກນອາຍຸຜູ້ໃຫຍ່ທີ່ສູບຢານັ້ນມີເຖິງ 43,7% ເຊິ່ງຖືວ່າສູງທີ່ສຸດໃນກຸ່ມບັນດາປະເທດສະມາຊິກອົງການການຮ່ວມມືທາງເສດຖະກິດ ແລະ ການພັດທະນາ (OECD) ດ້ວຍນະໂຍບາຍປັບຂຶ້ນລາຄາຢາສູບນີ້, ທາງການ ສ.ເກົາຫລີ ເຊື່ອວ່າຈະສາມາດຫລຸດຈຳນວນຜູ້ສູບຢາລົງໃຫ້ເຫລືອພຽງ 29% ພາຍໃນປີ 2020. ສ່ວນຢູ່ປະເທດຟີລິບປິນ, ຂ່າວຈາກໜັງສືພິມ The Nation ສະບັບວັນທີ 15 ເດືອນເມສາຜ່ານມາ ບອກວ່າ: ສະມາຄົມຕ້ານການສູບຢາໄດ້ຮຽກຮ້ອງໃຫ້ສະມາຊິກລັດຖະສະພາປັບຂຶ້ນອາຍຸຂອງຜູ້ມີສິດຊື້ຢາສູບຈາກ 18 ປີ ເປັນ 21 ປີ. ເຫດຜົນເບື້ອງຫລັງຄຳຮຽກຮ້ອງດັ່ງກ່າວກໍແມ່ນເພື່ອຫລຸດຜ່ອນການສູບຢາແຕ່ໄວເດັກ ເພາະບັນດາບໍລິສັດຢາສູບໃນປັດຈຸບັນໄດ້ມີກົນອຸບາຍລໍ້ຊາວໜຸ່ມໃຫ້ຕິດຢາສູບຫລາຍຂຶ້ນ. ນອກນັ້ນ ກໍຍັງມີຕົວຢ່າງທີ່ດີຈາກ ສ.ອາເມລິກາ ທີ່ຫ້າມຂາຍຢາສູບໃຫ້ຜູ້ອາຍຸບໍ່ເຖິງ 21 ປີ ອັນໄດ້ເຮັດໃຫ້ການສູບຢາຫລຸດລົງ 12% ແລະ ການເສຍຊີວິດຈາກຢາສູບຫລຸດລົງ 10%.
