ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ

- Gov - ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ
- Untitled design - ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ

ກອງປະຊຸມລັດຖະບານປະຈຳເດືອນສິງຫາ 2018 ໄດ້ຈັດຂຶ້ນໃນວັນທີ 22-23 ຜ່ານມານີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ແລະ ໄດ້ປຶກສາຫາລືພິຈາລະນາຫລາຍບັນຫາສໍາຄັນຂອງຊາດຄື: ຕີລາຄາກ່ຽວກັບສະພາບການຕ້ານໄພນ້ຳຖ້ວມໃນທົ່ວປະເທດ, ໂດຍສະເພາະໄພນໍ້າຖ້ວມຢູ່ເມືອງສະໜາມໄຊແຂວງອັດຕະປື, ອັນໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສີນຂອງປະຊາຊົນຈໍານວນຫລວງຫລາຍ, ພ້ອມທັງພື້ນຖານໂຄງລ່າງເສດຖະກິດ-ສັງຄົມ ເປັນຕົ້ນ: ເສັ້ນທາງ, ຂົວ, ພື້ນທີ່ຜະລິດກະສິກຳ, ແຫລ່ງນ້ຳກິນ, ນ້ຳໃຊ້, ໂຮງຮຽນ, ໂຮງໝໍ ແລະ ໄຟຟ້າເສຍຫາຍເປັນຈໍານວນຫລາຍ ແລະ ມາຮອດປັດຈຸບັນຍັງບໍ່ສາມາດປະເມີນຜົນເສຍຫາຍໄດ້, ຕໍ່ບັນຫາດັ່ງກ່າວ ລັດຖະບານໄດ້ຕິດຕາມຢ່າງໃກ້ຊິດ, ພ້ອມທັງລະດົມກຳລັງແຮງທົ່ວສັງຄົມໃນການແກ້ໄຂບັນຫາໄພພິບັດຢູ່ເມືອງສະໜາມໄຊ ແລະ ຕ້ານໄພນ້ຳຖ້ວມໃນຂອບ ເຂດທົ່ວປະເທດ. ປືກສາຫາລືກ່ຽວກັບການສ້າງແຜນງົບປະມານລັດປີ 2019 ໃຫ້ແທດກັບຕົວຈິງ, ຊຶ່ງຕ້ອງຄາດຄະເນລາຍຮັບງົບປະມານຈາກຖານລາຍຮັບທີ່ມີຕົວຕົນ, ຈຳກັດລາຍຈ່າຍທີ່ບໍ່ຈຳເປັນ ແລະ ບໍ່ອະນຸຍາດໃຫ້ສ້າງໂຄງການທີ່ບໍ່ມີງົບປະມານຮອງຮັບ, ປືກສາຫາລືການອອກວີຊາແບບອອນລາຍ, ການຄຸ້ມຄອງການຍົກຍ້າຍຕັ້ງພູມລຳເນົາຕາມລຳພັງໃຈ ແລະ ການສ້າງຄອບຄົວບໍ່ຖືກຕ້ອງຕາມລະບຽບກົດໝາຍ. ພິຈາລະນາການສະເໜີຂໍສືບຕໍ່ກິດຈະການໂຮງງານຜະລິດແຮ່ຫາຍາກຢູ່ເຂດນິຄົມອຸດສາຫະກຳຫລັກ 21, ການແກ້ໄຂໜີ້ສິນ ບ້ວງໄພພິບັດໃນໄລຍະຜ່ານມາ ແລະ ທິດທາງການແກ້ໄຂຜົນກະທົບຈາກໄພທຳມະຊາດຕາມເສັ້ນທາງຫລວງແຫ່ງຊາດ ແລະ ບັນຫາອື່ນໆ. ນອກນີ້, ກອງປະຊຸມໄດ້ພິຈາລະນາ ແລະ ເຫັນດີດ້ານຫລັກການຮັບຮອງເອົາຮ່າງກົດໝາຍ ສ້າງໃໝ່ ແລະ ປັບປຸງຈຳນວນ 5 ສະບັບ, ຮ່າງດຳລັດຈຳນວນ 2 ສະບັບຄື:  (1) ຮ່າງກົດໝາຍວ່າດ້ວຍລາຍເຊັນເອເລັກໂຕຣນິກ. (2) ຮ່າງກົດໝາຍວ່າດ້ວຍປະກັນສຸຂະພາບ. (3) ຮ່າງກົດໝາຍວ່າດ້ວຍການລົດໄຟ. (4) ຮ່າງກົດໝາຍວ່າດ້ວຍທະນາຄານທຸລະກິດ. (5) ຮ່າງປະມວນກົດໝາຍແພ່ງ. (6) ດຳລັດວ່າດ້ວຍການຄຸ້ມຄອງ ແລະ ນຳໃຊ້ຕາປະທັບ ແລະ (7) ດຳລັດວ່າດ້ວຍການຄຸ້ມຄອງດ່ານຊາຍແດນ.

ໃນໂອກາດນີ້, ທ່ານນາຍົກລັດຖະມົນຕີ ໄດ້ມີຄໍາເຫັນຊີ້ນໍາໃຫ້ຄະນະນຳແຕ່ລະກະຊວງ, ອົງການທຽບເທົ່າ, ນະຄອນຫລວງ ແລະ ແຂວງ ຈົ່ງເພີ່ມທະວີຄວາມຮັບຜິດຊອບຕໍ່ການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນ ກາງພັກສະບັບເລກທີ 06/ຄລສພ, ລົງວັນທີ 16 ສິງຫາ 2018 ກ່ຽວກັບການນຳພາ-ຊີ້ນຳການປ້ອງກັນ ແລະ ຮັບມືໄພພິບັດທຳມະຊາດໃຫ້ເກີດດອກອອກຜົນເປັນຈິງ, ມອບໃຫ້ຄະນະສະເພາະກິດແກ້ໄຂໄພພິບັດລະດັບຊາດສົມທົບກັບທຸກພາກສ່ວນກ່ຽວຂ້ອງເອົາໃຈໃສ່ການຄຸ້ມຄອງ, ການບໍລິຫານ-ຈັດການແກ້ໄຂໄພພິບັດ, ຊ່ວຍເຫລືອ ແລະ ພື້ນຟູຊີວິດການເປັນຢູ່ຂອງປະຊາຊົນ ແລະ ຄຸ້ມຄອງນຳໃຊ້ເຄື່ອງບັນເທົາທຸກ, ອຸປະກອນ ແລະ ງົບປະມານຢ່າງມີປະສິດທິພາບ, ປະສິດທິຜົນ, ທົ່ວເຖິງ ແລະ ໂປ່ງໃສ, ໃຫ້ຄະນະສະເພາະກິດແກ້ໄຂໄພພິບັດລະດັບຊາດເອົາໃຈໃສ່ຄຸ້ມຄອງການຮັບເອົາການຊ່ວຍເຫລືອ ແລະ ແຈກຢາຍເຄື່ອງບັນເທົາທຸກໃຫ້ແກ່ຜູ້ປະສົບໄພໃຫ້ເປັນລະບົບ, ປະສານສົມທົບກັບຂະແໜງການທີ່ກ່ຽວຂ້ອງເພື່ອຈຳກັດຊ່ອງຫວ່າງ, ການສວຍໂອກາດລັກລອບນຳເຂົ້າ ແລະ ແຈກຢາຍເຄື່ອງບໍລິຈາກທີ່ບໍ່ຖືກຕ້ອງ ແລະ ບໍ່ຖືກຕາມເປົ້າ ໝາຍ. ໃຫ້ປັບປຸງຄະນະຮັບຜິດຊອບວາງແຜນຟື້ນຟູຫລັງໄພພິບັດໃຫ້ແທດກັບຕົວຈິງຕື່ມໂດຍມີຜູ້ຕາງໜ້າຈາກກະຊວງໂຍທາທິການ ແລະ ຂົນສົ່ງ ເປັນຫົວໜ້າ, ກະຊວງແຜນການ ແລະ ການລົງທຶນ, ກະຊວງກະສິກຳ ແລະ ປ່າໄມ້, ກະຊວງປ້ອງກັນປະເທດ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ ແລະ ພາກສ່ວນກ່ຽວຂ້ອງເຂົ້າຮ່ວມ ແລະ ລົງໄປສຳຫຼວດ, ວາງແຜນ ແລະ ລົງມືປະຕິບັດປະຈຳຢູ່ສະໜາມ. ໃຫ້ແຕ່ລະຂະແໜງການໂດຍສະເພາະຂະແໜງໂຍທາທິການ ແລະ ຂົນສົ່ງ ກະສິກຳ ແລະ ປ່າໄມ້, ສຶກສາທິການ ແລະ ກິລາ, ສາທາລະນະສຸກ ແລະ ພາກສ່ວນກ່ຽວຂ້ອງເອົາໃຈໃສ່ຊີ້ນຳ ແລະ ມອບໝາຍໃຫ້ພາກສ່ວນກ່ຽວຂ້ອງຂອງຕົນໄປປະຈຳ ແລະ ເຮັດຕາມພາລະບົດບາດຂອງຕົນ ເພື່ອຊ່ວຍເຫລືອແຂວງອັດຕະປືໃນການແກ້ໄຂໄພພິບັດ ແລະ ຟື້ນຟູ ຫລັງໄພພິບັດໃຫ້ແທດຕົວຈິງ, ທັນການ ແລະ ໜັກແໜ້ນກວ່າເກົ່າ. ໃຫ້ສືບຕໍ່ເລັ່ງປະຕິບັດການສືບສວນ-ສອບສວນ ຫາສາເຫດຂອງຄູກັນນ້ຳຂອງເຂື່ອນແຕກພັງໃນຄັ້ງນີ້ຢ່າງລະອຽດຮອບຄອບ ແລະ ໂປ່ງ ໃສ. ພ້ອມນີ້, ກໍສືບຕໍ່ເກັບກຳຂໍ້ມູນ ແລະ ຫລັກຖານຕ່າງໆທີ່ຈະເປັນປະໂຫຍດ ແລະ ເປັນພື້ນຖານໃຫ້ແກ່ການສືບສວນ-ສອບສວນໃນຄັ້ງນີ້. ໃຫ້ກະຊວງພະລັງງານ ແລະ ບໍ່ແຮ່ ຮີບຮ້ອນຄົ້ນຄວ້າສ້າງຕັ້ງໜ່ວຍງານຮັບຜິດຊອບສຶກສາຄົ້ນຄວ້າຄວາມປອດໄພຂອງເຂື່ອນ ໂດຍເຊີນນັກຊ່ຽວຊານສາກົນເຂົ້າຮ່ວມນຳ ແລະ ໃຫ້ດຳເນີນການກວດກາສະພາບໂຄງການເຂື່ອນໄຟຟ້າທັງໝົດຢູ່ໃນ ສປປ ລາວ ເປັນຕົ້ນ ແມ່ນໂຄງການທີ່ໄດ້ດຳເນີນງານແລ້ວ ແລະ ກຳລັງກໍ່ສ້າງ ເພື່ອໃຫ້ວຽກງານດັ່ງກ່າວດຳເນີນໄປໄດ້ຢ່າງມີປະສິດທິຜົນ. ໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປັນເຈົ້າການປະສານສົມທົບກັບກະຊວງປ້ອງກັນຄວາມສະຫງົບ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ພາກສ່ວນກ່ຽວຂ້ອງຕິດຕາມການເຜີຍແຜ່ ແລະ ໂຄສະນາຜ່ານສື່ສັງຄົມອອນລາຍທີ່ຂັດກັບດຳລັດວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນເຕີເນັດເພື່ອແກ້ໄຂໃຫ້ທັນເວລາ. ໃຫ້ກະຊວງອຸດສາຫະກຳ ແລະ ການຄ້າ ເປັນເຈົ້າການສົມທົບກັບພາກສ່ວນກ່ຽວຂ້ອງໃນການຄຸ້ມຄອງລາຄາສິນຄ້າໃນທ້ອງຕະຫລາດບໍ່ໃຫ້ມີການສວຍໂອກາດຂຶ້ນລາຄາສິນຄ້າໃນໄລຍະທີ່ມີນ້ຳຖ້ວມຢູ່ໃນຂອບເຂດທົ່ວປະເທດ ເປັນຕົ້ນແມ່ນເຄື່ອງອຸປະໂພກ-ບໍລິໂພກທີ່ຈຳເປັນ ເພື່ອບໍ່ໃຫ້ກະທົບຕໍ່ຊີວິດການເປັນຢູ່ຂອງປະຊາຊົນ ແລະ ໃຫ້ກະຊວງສຶກສາທິການ ແລະ ກິລາ ເປັນເຈົ້າການສົມທົບກັບພາກສ່ວນກ່ຽວຂ້ອງກະກຽມຄວາມພ້ອມໃນການເປີດສົກຮຽນໃໝ່ ເພື່ອຮັບປະກັນບໍ່ໃຫ້ມີສະພາບຫຍໍ້ທໍ້ ແລະ ຫາງສຽງກ່ຽວກັບການສອບເສັງ ແລະ ຄັດເລືອກນັກຮຽນເຂົ້າຮຽນຕໍ່ຢູ່ບັນດາສະຖາບັນການສຶກສາຕ່າງໆໃນຂອບເຂດທົ່ວປະເທດໃຫ້ຖືກຕ້ອງໂປ່ງໃສ.

- Wave100S AD to Website 2020 0 - ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ
- WhatsApp Image 2020 05 27 at 5 - ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ
- WhatsApp Image 2020 05 27 at 5 - ລັດຖະບານພິຈາລະນາຫລາຍບັນຫາສໍາຄັນຂອງຊາດໃນກອງປະຊຸມປະຈຳເດືອນສິງຫາ
error: Alert: ເນື້ອຫາຂ່າວມີລິຂະສິດ !!