ຮອງ​ນາຍົກລັດຖະມົນຕີ ບຸນ​ທອງ ຈິດ​ມະ​ນີ ​ເຄື່ອນ​ໄຫວ​ຊີ້​ນຳ​ວຽກ​ງານ​ທີ່​ແຂວງ​ອັດ​ຕະປື

- advert banner 728 90 728x90 - ຮອງ​ນາຍົກລັດຖະມົນຕີ ບຸນ​ທອງ ຈິດ​ມະ​ນີ ​ເຄື່ອນ​ໄຫວ​ຊີ້​ນຳ​ວຽກ​ງານ​ທີ່​ແຂວງ​ອັດ​ຕະປື

ຈາກເຫດການສັນເຂື່ອນ D ຫລື Saddle dam D ຂອງເຂື່ອນໄຟຟ້າເຊປຽນ-ເຊນໍ້ານ້ອຍແຕກພັງ ໃນຄໍ່າຄືນຂອງວັນທີ 23 ກໍລະກົດຜ່ານມາ ເຮັດໃຫ້ມວນນໍ້າຈໍານວນ 500 ລ້ານກວ່າແມັດກ້ອນ ໄຫລລົງສູ່ເມືອງສະຫນາມໄຊ ແຂວງອັດຕະປື ຢ່າງໄວວາແລະ ມາຮອດປັດຈຸບັນ ກໍນັບເປັນເວລາ 1 ເດືອນກວ່າແລ້ວ ການຄົ້ນຫາຜູ້ສູນຫາຍຍັງຄົງສືບຕໍ່ເພື່ອຊ່ວຍເຫລືອຜູ້ປະສົບໄພ ແລະ ຟຶ້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບໃຫ້ກັບຄືນສູ່ສະພາບປົກກະຕິໂດຍໄວ ເຊິ່ງມີຢູ່ 13 ບ້ານ ໄດ້ຮັບຜົນກະທົບ, ໃນນັ້ນ ມີ 6 ບ້ານ ທີ່ເປັນບ້ານລຽບຕາມສາຍນ້ໍາເຊປຽນໄດ້ ຮັບຜົນກະທົບ 100%; ມີປະຊາຊົນທີ່ຖືກຜົນກະທົບ ແລະ ເສຍຫາຍຫນັກ 1.611 ຄອບຄົວ, 7.095 ຄົນ ໃນນີ້ມີຜູ້ເສຍຊີວິດ 39 ຄົນ ແລະ ສູນຫາຍອີກ 95 ຄົນ (ອີງໃສ່ຕົວເລກວັນທີ 25 ສິງຫາ2018). ນອກນີ້ ຍັງມີສັດລ້ຽງ ແລະ ພື້ນທີ່ກະສິກໍາຂອງປະຊາຊົນເສຍຫາຍຢ່າງຫລວງຫລາຍ, ຍ້ອນຄວາມເປັນຫ່ວງເປັນໄຍຂອງພັກ-ລັດຕໍ່ເຫດການດັ່ງກ່າວ, ກອງປະຊຸມກົມການເມືອງສູນກາງພັກຄັ້ງວັນທີ 30 ກໍລະກົດ 2018 ໄດ້ເຫັນດີໃຫ້ລັດຖະບານ ແຕ່ງຕັ້ງຄະນະສະເພາະກິດເພື່ອກວດກາເຫດການດັ່ງກ່າວ ແລະ ມາຮອດວັນທີ 8 ສິງຫາ 2018, ນາຍົກລັດຖະມົນຕີໄດ້ອອກຂໍ້ຕົກລົງເລກທີ 54/ນຍ ແຕ່ງຕັ້ງຄະນະຮັບຜິດຊອບສືບສວນ-ສອບສວນສາເຫດຄູກັ້ນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກພັງ ແລະ ອອກຂໍ້ຕົກລົງ ເລກທີ55/ນຍ ແຕ່ງຕັ້ງຄະນະກວດກາຄວາມຮັບຜິດຊອບຂອງບຸກຄົນທີ່ຕິດພັນກັບສາເຫດທີ່ເຮັດໃຫ້ຄູກັນນໍ້າຂອງເຂື່ອນໄຟຟ້າເຊປຽນ-ເຊນໍ້ານ້ອຍແຕກພັງ ໂດຍມີທ່ານ ບຸນທອງ ຈິດມະນີ ຮອງນາຍົກລັດ ຖະມົນຕີ, ປະທານອົງການກວດກາລັດຖະບານ, ຫົວຫນ້າຄະນະຕ້ານການສໍ້ລາດບັງຫລວງຂັ້ນສູນກາງເປັນຜູ້ຊີ້ນໍາທັງສອງຄະນະ.ຈາກນັ້ນ ຄະນະດັ່ງກ່າວໄດ້ສ້າງແຜນການເຄື່ອນໄຫວ ແລະ ແຕ່ງຕັ້ງບັນດາຫນ່ວຍງານຮັບຜິດຊອບຊ່ວຍວຽກຕ່າງໆຂຶ້ນມາ ພ້ອມທັງເຊີນຜູ້ຊ່ຽວຊານຈາກຕ່າງປະເທດເພື່ອມາກວດກາຊ່ວຍ ແລະ ມາຮອດວັນທີ19-20 ສິງຫາ 2018, ທ່ານ ບຸນທອງຈິດມະນີ ພ້ອມດ້ວຍ ທ່ານ Schlies ANTON ຈາກປະເທດສະວິດ ແລະ ນັກວິຊາການກ່ຽວຂ້ອງຈໍານວນຫນຶ່ງ ໄດ້ລົງໄປກວດສະພາບການແຕກ ພັງຕົວຈິງຂອງສັນເຂື່ອນ D ແລະ ພຶ້ນທີ່ເຂື່ອນອື່ນໆ, ພ້ອມທັງໄດ້ຮັບຟັງລາຍງານສະພາບໂດຍລວມເຕັກນິກຂອງໂຄງການ, ສາເຫດສັນເຂື່ອນແຕກພັງຈາກບໍລິສັດຜູ້ລົງທຶນ, ລາຍງານກ່ຽວກັບຜົນຂອງການກວດສອບສາເຫດການແຕກພັງເບຶ້ອງຕົ້ນຈາກຜູ້ຮັບເຫມົາ ແລະ ປຶກສາຫາລືບັນຫາຕ່າງໆຮ່ວມກັບບໍລິສັດຮັບເຫມົາ ແລະ ວິຊາການຝ່າຍຕ່າງໆ ໃນການກວດກາເຕັກນິກການກໍ່ສ້າງລວມທັງການຊອກຫາສາເຫດຕົ້ນຕໍທີ່ສົ່ງຜົນເຮັດໃຫ້ສັນເຂື່ອນແຕກພັງຄັ້ງນີ້.

ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ໂອ້ລົມຕໍ່ແຂວງອັດຕະປືໂດຍເນັ້ນໃຫ້ສືບຕໍ່ເອົາໃຈໃສ່ຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພນ້ໍາຖ້ວມ, ສືບຕໍ່ເອົາໃຈໃສ່ຟື້ນຟູການເປັນຢູ່ຂອງປະຊາຊົນໃຫ້ຄືນສູ່ສະພາບປົກກະຕິໂດຍໄວເພື່ອເຮັດໃຫ້ປະຊາຊົນມີຊີວິດດີຂຶ້ນ. ສ່ວນບັນດາທ່ານທີ່ບຜິດຊອບໃນ ການກວດກາ, ສືບສວນ-ສອບສວນຕ້ອງ ໄດ້ເອົາໃຈໃສ່ຮີບຮ້ອນໃນການກວດກາຊອກຫາສາເຫດການແຕກພັງຂອງສັນເຂື່ອນ ໂດຍອີງໃສ່ບັນດາຂໍ້ມູນທີ່ທາງບໍລິສັດອອກແບບ, ບໍລິສັດຜູ້ຮັບເຫມົາກໍ່ສ້າງ, ບໍລິສັດລົງທຶນສະຫນອງໃຫ້ລວມທັງຂໍ້ມູນຈາກການລົງກວດກາຕົວຈິງ, ຂໍ້ມູນຈາກວີດີໂອ, ຮູບຖ່າຍຕ່າງໆທັງກ່ອນ ແລະ ຫລັງການກໍ່ສ້າງເພື່ອມາເປັນຂໍ້ມູນໃນການວິເຄາະຫາສາເຫດ, ພ້ອມທັງຍົກສູງສະຕິຕໍ່ຄວາມຮັບຜິດຊອບຕໍ່ຫນ້າທີ່ໄດ້ຮັບການມອບຫມາຍຈາກຂັ້ນເທິງ ເພື່ອຮັບປະກັນຄວາມໂປ່ງໃສ, ຍຸຕິທໍາໃນການກວດກາ. ບັນດາບໍລິສັດຜູ້ຮັບເຫມົາຕ້ອງໄດ້ເອົາໃຈໃສ່ສະຫນອງຂໍ້ມູນຕ່າງໆໃຫ້ແກ່ນັກວິຊາການທັງລາວ ແລະຕ່າງປະເທດ ແລະ ອໍານວຍຄວາມສະດວກໃນການເຄື່ອນໄຫວວຽກງານກວດກາຂອງຄະນະຮັບຜິດຊອບ ເພື່ອເຮັດໃຫ້ການກວດກາ, ສືບສວນ-ສອບ ສວນສໍາເລັດຕາມກໍານົດເວລາ ແລະ ສາມາດແກ້ໄຂບັນຫາທີ່ເກີດຂຶ້ນຢ່າງມີປະສິດທິພາບ, ປະສິດທິຜົນ, ຖືກຕ້ອງຕາມກົດຫມາຍ ແລະຄວາມເປັນຈິງ.

- Tiger Head 728x90 - ຮອງ​ນາຍົກລັດຖະມົນຕີ ບຸນ​ທອງ ຈິດ​ມະ​ນີ ​ເຄື່ອນ​ໄຫວ​ຊີ້​ນຳ​ວຽກ​ງານ​ທີ່​ແຂວງ​ອັດ​ຕະປື
- 1 1 - ຮອງ​ນາຍົກລັດຖະມົນຕີ ບຸນ​ທອງ ຈິດ​ມະ​ນີ ​ເຄື່ອນ​ໄຫວ​ຊີ້​ນຳ​ວຽກ​ງານ​ທີ່​ແຂວງ​ອັດ​ຕະປື
error: Content is protected !!