ຮອງນາຍົກລັດຖະມົນຕີ ສອນໄຊ ສີພັນດອນ ລົງຕິດຕາມສະພາບນໍ້າຖ້ວມ ຢູ່ເມືອງນາຊາຍທອງ
ໃນວັນທີ 28 ສິງຫານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ພ້ອມດ້ວຍຄະນະ ໄດ້ໄປເຄື່ອນໄຫວຕິດຕາມສະພາບນໍ້າຖ້ວມຢູ່ບ້ານແສນດິນ ເມືອງນາຊາຍທອງ ນະຄອນຫລວງວຽງຈັນ ແລະ ໄດ້ຮັບຟັງລາຍງານຈາກອຳນາດການປົກຄອງເມືອງດັ່ງກ່າວວ່າ: ບ້ານແສນດິນເປັນບ້ານໜຶ່ງທີ່ໄດ້ຮັບຜົນກະທົບຈາກໄພນໍ້າຖ້ວມ ມີ 282 ຫລັງຄາເຮືອນ, 309 ຄອບຄົວ, ມີເນື້ອທີ່ 1.400 ກວ່າເຮັກຕາ, ເນື້ອທີ່ທໍາການຜະລິດມີ 1.300 ກວ່າເຮັກຕາ ເຊິ່ງນັບແຕ່ວັນທີ 17-28 ສິງຫານີ້ ລະດັບນໍ້າງື່ມໄດ້ເພີ່ມຂຶ້ນຢ່າງຕໍ່ເນື່ອງ ແລະ ໄດ້ໄຫລເຂົ້າຖ້ວມເຮືອນຊານ ແລະ ເຂດທໍາການຜະລິດຂອງປະຊາຊົນເປັນຈໍານວນຫລວງຫລາຍ, ເສັ້ນທາງເຂົ້າບ້ານຖືກຕັດຂາດ, ປະຊາຊົນບໍ່ໜ້ອຍຂາດທີ່ຢູ່ອາໄສ ແລະ ເຄື່ອງອຸປະໂພກບໍລິໂພກ.
ຕໍ່ເຫດການດັ່ງກ່າວ ອໍານາດການປົກຄອງເມືອງ ແລະ ບ້ານ ໄດ້ສຸມທຸກກໍາລັງເຂົ້າໄປຊ່ວຍເຫລືອຜູ້ທີ່ໄດ້ຮັບຜົນກະທົບ ໂດຍໄດ້ມີການຍົກຍ້າຍປະຊາຊົນ 10 ຄອບຄົວ, ພ້ອມດ້ວຍວັດຖຸສິ່ງຂອງ ແລະ ສັດລ້ຽງມາຢູ່ທີ່ພັກປອດໄພ, ພ້ອມທັງໄດ້ສ້າງຄູກັນນໍ້າ ແລະ ຊ່ວຍເຫລືອດ້ານສາທາລະນະສຸກໃຫ້ຜູ້ຖືກຜົນກະທົບ. ສຳລັບຜົນເສຍຫາຍຍັງບໍ່ສາມາດປະເມີນໄດ້.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ຊີ້ນໍາໃຫ້ອໍານາດການປົກຄອງເມືອງ, ບ້ານ ແລະ ທຸກພາກສ່ວນກ່ຽວຂ້ອງ ເອົາໃຈໃສ່ໃນການຕິດຕາມ ແລະ ເຝົ້າລະວັງກ່ຽວກັບລະດັບນໍ້າຢ່າງໃກ້ຊິດ. ພ້ອມທັງເອົາໃຈໃສ່ປົກປັກຮັກສາວັດຖຸສິ່ງຂອງມີຄ່າຕ່າງໆຂອງປະຊາຊົນທີ່ຍົກຍ້າຍມາຢູ່ທີ່ປອດໄພນັ້ນ ເພື່ອບໍ່ໃຫ້ຕົກເຫ່ຍເສຍຫາຍ.
