ເລັ່ງປະເມີນຄວາມເສຍຫາຍເບື້ອງຕົ້ນ ຈາກຄູກັນນ້ຳເຂື່ອນເຊປຽນ-ເຊນ້ຳນ້ອຍແຕກ
ຕາມການລາຍງານຂອງຄະນະຮັບຜິດຊອບສຳຫລວດເກັບກໍາຂໍ້ມູນ ແລະ ກໍານົດແຜນ
ການຟື້ນຟູການຜະລິດໃນເຂດພື້ນທີ່ໄພພິບັດ (ນ້ຳຖ້ວມ) ຢູ່ເມືອງສະໜາມໄຊ ແຂວງອັດຕະປື ຊຶ່ງໄດ້ລົງເຄື່ອນໄຫວເກັບກຳຂໍ້ມູນຜົນເສຍຫາຍເບື້ອງຕົ້ນໃນເຂດພື້ນທີ່ຕົວຈິງທີ່ໄດ້ຮັບຜົນກະທົບ ນັບແຕ່ວັນທີ 18-26 ສິງຫາຜ່ານມາ ລະບຸວ່າ: ເນື້ອທີ່ການຜະລິດກະສິກຳ ໂດຍສະເພາະແມ່ນເນື້ອທີ່ປູກເຂົ້ານາປີ, ເນື້ອທີ່ປູກພືດລະດູຝົນ, ສັດລ້ຽງຕ່າງໆ, ໜອງປາ ແລະ ລະບົບຊົນລະປະທານ, ໃນນັ້ນ ມີ 6 ບ້ານ ໄດ້ຮັບຜົນເສຍຫາຍໜັກ ແລະ ອີກ 7 ບ້ານ ໄດ້ຮັບຜົນກະທົບປານກາງ.
ຈຳນວນ 6 ບ້ານ ທີ່ໄດ້ຮັບຜົນກະທົບຮ້າຍແຮງໄດ້ແກ່ ບ້ານຫີນລາດ, ທ່າແສງຈັນ, ທ່າຫີນ, ບ້ານໃໝ່, ສະໝອງ ແລະ ບ້ານໃຫຍ່ແທ (ໂຄກກ່ອງ, ທ່າອວນ, ດອນມ່ວງ, ດອນບົກ) ຊຶ່ງມີເນື້ອທີ່ນາເສຍຫາຍ 1.097 ເຮັກຕາ (ເນື້ອທີ່ປັກດໍາທັງໝົດ 1.315 ເຮັກຕາ), ເນື້ອທີ່ປູກພືດເສຍຫາຍ 43 ເຮັກຕາ (ທັງໝົດ 53 ເຮັກຕາ), ສັດລ້ຽງປະເພດຄວາຍ 1.129 ໂຕ, ງົວ 4.340 ໂຕ, ໝູ 1.378 ໂຕ, ແບ້ 276 ໂຕ, ສັດປີກ 11.971 ໂຕ, ໜອງລ້ຽງປາ 267 ໜອງ, ຫລຸມປາໃນນາເຂົ້າ 937 ຫລຸມ, ໜອງທຳມະຊາດ ເສຍຫາຍ 19 ໜອງ, ວັງສະຫງວນ 7 ແຫ່ງເສຍຫາຍ. ສ່ວນ 7 ບ້ານ ທີ່ໄດ້ຮັບຜົນກະທົບປານກາງ ມີຄືບ້ານຕະມໍຢອດ, ປິນດົງ, ໄຊດອນໂຂງ, ໂພນສະອາດ, ໜອງແຂ້, ສົ້ມປ່ອຍ ແລະ ຫາດອຸດົມໄຊ ຊຶ່ງມີເນື້ອທີ່ນາ 643 ເຮັກຕາ, ເນື້ອທີ່ປູກພືດ 114 ເຮັກຕາ, ຄວາຍ 1.571 ໂຕ, ງົວ 2.408 ໂຕ, ໝູ 469 ໂຕ, ແບ້ 51 ໂຕ, ສັດປີກ 6.084 ໂຕ, ໜອງປາ 19 ໜອງ.
ຄະນະດັ່ງກ່າວ ໃຫ້ຮູ້ວ່າ: ນີ້ເປັນພຽງການສຳຫລວດເບື້ອງຕົ້ນ ຊຶ່ງໜ່ວຍງານກ່ຽວຂ້ອງດັ່ງກ່າວ ຍັງຈະສືບຕໍ່ດຳເນີນການສຳຫລວດຜົນເສຍຫາຍຕໍ່ໄປອີກ ເພື່ອເປັນຂໍ້ມູນໃນການສ້າງແຜນການຟື້ນຟູ ແລະ ພັດທະນາຊົນນະບົດໃນແຕ່ລະໄລຍະ ແລະ ເມື່ອບໍ່ດົນມານີ້ ໄດ້ມີກອງປະຊຸມກ່ຽວກັບການກໍ່ສ້າງພື້ນຖານໂຄງລ່າງຊົ່ວຄາວລະຫວ່າງຄະນະປະຈຳພັກແຂວງອັດຕະປື, ກະຊວງໂຍທາທິການ ແລະ ຂົນສົ່ງ ແລະ ກະຊວງພະລັງງານ ແລະ ບໍ່ແຮ່ ໄດ້ຕົກລົງເຫັນດີເປັນເອກະພາບ ບໍລິສັດ SK ຈາກ ສ.ເກົາຫລີ ໃນການກໍ່ສ້າງເຮືອນພັກຊົ່ວຄາວຈາກວັດສະດຸສຳເລັດຮູບ ຈຳນວນ 500 ຫລັງ ໂດຍຈະໃຊ້ເວລາພຽງ 30 ວັນ ເພື່ອຮອງຮັບປະຊາຊົນຜູ້ປະສົບໄພນ້ຳຖ້ວມທີ່ພັກອາໄສຢູ່ຕາມເຕັ້ນ ແລະ ໂຮງຮຽນຕ່າງໆໃນເຂດບ້ານດອນບົກ, ປິນດົງ ແລະ ຕະມໍຢອດ ໃຫ້ໄດ້ຍ້າຍເຂົ້າຢູ່ໂດຍໄວ ໂດຍອຳນາດການປົກຄອງບ້ານຈຳນວນໜຶ່ງໄດ້ມາເບິ່ງແບບຕົວຢ່າງເຮືອນທີ່ຕັ້ງໄວ້ຢູ່ຫ້ອງວ່າການແຂວງແລ້ວ ເພື່ອຈະໄດ້ປັບປຸງແບບຕາມຄວາມຕ້ອງການຂອງປະຊາຊົນຕື່ມອີກ.